– Atamekenge 2004 jyly kóship keldik. Ákemniń týǵan-týystary, aǵa-ápkeleri 1992 jyly alǵash kósh bastalǵanda qozǵaldy. Baıan О́lkede ákem men aǵasy Dash qaldy. О́ıtkeni atamyz ben ájemiz jastary 80-ge kelgen edi. «Bizge qaraılaı bermeı, atajurtqa jetińder» degen amanattaryn aıtyp ketti. Sodan ata, ájem birinen soń biri dúnıe salǵan soń baryp jolǵa jınaldyq. Qujat jınastyrý rásimderi ári uzaq, ári qıyndaý tıdi. Baıan О́lkeniń Saqsaı degen jerinde turdyq. Men sonda 5-synypqa deıin oqydym, – deıdi О́zgeris.
Qazir О́zgeristiń ata-anasy, aýdan ortalyǵy Aqtoǵaı aýylynda turady. Qaryndasy Saırangúl jýyrda turmysqa shyqty. Qyz uzatý toıyn ótkizdi.
Inisi Baqdáýlet pedagogıkalyq ınstıtýttyń fılologııa bóliminde oqyp júr. Úlkender ózderi ǵumyr boıy arman etken atamekenge jete almasa da, amanattary oryndalyp, urpaq jalǵasýda.
Al О́zgeris oqýdy bitirgen soń, aýylǵa qaıtyp kelip «Aýyl tynysy» gazetinde tilshilik qyzmet atqarady. Kishkene kúninen-aq óleńder jazyp, jýrnalıst bolsam degen armany bar edi.
– Ákem Qýanar qoly sheber adam. Jolsaparda júrgende úıge baryp, ákem men anam jasaǵan ulttyq bolmysty naqyshty beıneleıtin qolóner álemin kórińiz. Ulttyq qolóner – bizdiń halqymyzdyń baılyǵy. Jahandaný qansha jerden jaqyndap kep tursa da, qalqan bolar bizdiń ulttyq muramyz jetedi ǵoı. Ákem Mońǵolııada turǵan kezden kıiz úı jasaýmen aınalysty. Qazir de kıiz úı, kıiz úıdiń qajetti jabdyqtaryn jasaıdy. О́tken jyly «Jas prodjekt» dep atalatyn qanatqaqty jobaǵa qatysyp, kıiz úı jasaý jobasy boıynsha grant ta utyp aldyq. Aǵashtan kıiz úıdi ákem jasasa, anam Maıragúl qajetti buıymdaryn tigýge kómektesedi. Alda jobalar da az emes, – deıdi О́zgeris.
– Esimińdi kim qoıdy?
– 1991 jyly Mońǵolııada zaman ózgerip, Keńes ókimeti tarap jatqan kez. Atam esimimdi qoıarda «úlken bir ózgeris kele jatyr!» dep qatty qýanyp, urpaqtarym atamekenge jeter kún jaqyn dep asyǵady.
Mine, osylaı atam qoıǵan atymdy,
Jalǵasyn dep jazylmaǵan jyrymdy,
«Bir ózgeris bolady áli kórde tur!
– sonda meniń túsinersiń janymdy»
( Keıin bári túsindi ǵoı marqumdy...) dep bastalatyn óleńin de oqyp berdi.
О́zgeris aqıyq aqyn Jumataı Jaqypbaevtyń 70 jyldyǵyna arnalǵan «Jumataı – jyr qaǵany» atty respýblıkalyq jyr músháırasyna qatysyp, 2-oryn alypty. Halyqaralyq «Meniń dosym» poezııa baıqaýynyń dıplomanty. О́leńderi «О́r úmitti ór jastar», «Qyrandar ǵana ushatyn bıik bar...», «Aq zańǵardaǵy asýlar» atty jınaqtarda jaryq kórgen. Biz de erekshe esimdi О́zgeris baýyrymyzǵa aldaǵy ýaqytta da ómiriń jaqsy ózgeristerge tola bersin dep tilek aıtqymyz keledi.
Farıda BYQAI,
«Egemen Qazaqstan»
PAVLODAR
