Teoman Hos shyǵarmashylyǵynyń bir ereksheligi, onyń ǵajaıyp eńbekterine boılaý úshin ishki álemiń darhan dalanyń keńdigimen úndesip, júregińde tabıǵatqa, tirshilikke degen súıispenshilik jatsa bolǵany. Sýretshiniń negizgi maqsaty, prınsıpiniń ózi osyndaı. «Týǵan ólkemniń peızajyn salǵanda, Otanyma degen bar mahabbatymdy beremin», deıdi ol.
Elimizdegi beıneleý óneriniń maıtalmandarymen birge túrli mádenı sharalarǵa qatysyp, zamanaýı qazaqstandyq sýretshilerdiń arasynda óz ornyn alǵan Teoman Hos Esik qalasynda dúnıege kelgen. Esiktegi pedagogıkalyq kolledjge oqýǵa túsip, ony 2007 jyly bitirgen.
О́te jaqsy pedagogtardan tálim aldym. Gúlnár Bazarbaıqyzy, Buharbaı Bógenbaıuly tárizdi ustazdarym bolashaq ómirime myqty irgetas qalady, – deıtin Teoman kolledjdi aıaqtaǵannan keıin-aq sýretshi retinde tanyla bastapty. Qazaq ulttyq óner akademııasynyń stanokty grafıka bólimine oqýǵa túskennen keıin birer sát shyǵarmashylyq joly ózge arnaǵa burylyp, rejısserlerden fılmge túsýge shaqyrtý alǵan. 2012 jyly «Gde-to na tom konse lınıı» fılmindegi basty róli úshin arnaıy júldege ıe bolǵan ónerpaz, osy ýaqytqa deıin 31 fılmge túsipti. Akademııany bitirgen soń Túrkııanyń «Ak deniz» ýnıversıtetiniń arnaıy shaqyrýymen eki jyl boıy ýnıversıtettiń kórkemóner fakýltetinde beıneleý ónerinen dáris oqıdy. 2014 jyly Qazaqstanǵa oralyp, Qazaq bas sáýlet-qurylys akademııasyna jumysqa ornalasqan.
Sýretterdi kóbine peızaj janrynda qaryndashpen jáne qylqalammen salatyn Teomannyń jumystary tabıǵattyń ózindeı tiri, shynaıy kórinedi. Afort jáne lıtografııada da sheberligin synap kórgen sýretshiniń janyna jaqyny – qaryndash.
– Maǵan týǵan óńirimniń qarapaıym tabıǵaty unaıdy. Men salǵan sýretter kórermenge bizdiń ǵajaıyp ólkemizdiń sulýlyǵyn kórip, sezinýdi, súıýdi, tamasha tabıǵatpen úılesimde ómir súrýdi úıretse eken deımin. Qazirgi ýaqytta otandyq sýretshilermen birge elimizdiń túpkir-túpkirinde ózimniń eńbekterimdi usynyp júrmin, – deıdi sýretshi.
2015 jyly Qazaqstan Sýretshiler odaǵynyń múshesi atanǵan Teoman Hos Qazaq handyǵynyń 550 jyldyǵyna oraı elordada ótken kórmege qatysqan. Á.Qasteev mýzeıinde ótken «Bizdiń dáýir» kórmesinde tórt birdeı týyndysy usynylyp, joǵary baǵa aldy. Elimizde jáne Túrkııada uıymdastyrylatyn sharalarǵa belsene qatysady. Shetelderde de jeke kórmelerin ótkizip júrgen sýretshiniń kóz tartar kartınalaryna qyzyǵýshylar – kóbine sheteldik kolleksıonerler. Saf ónerdi súıetin qazaqstandyqtar da onyń eńbekterin laıyqty baǵaǵa satyp alady.
Jaqsy kartına aldymen estetıkalyq talǵamnyń suranysyn óteýi kerek. Tabıǵat kórinisteri qarapaıym halyqtyń qyzyǵýshylyǵyna qaraı dúnıege kelgen týyndy deıtin de kózqaras joq emes. Alaıda Teomannyń qylqalamynan shyqqan maıda tolqyndar sheksizdikke ulasyp, qaryndashynyń ushynan týǵan qystaqtan saǵynyshtyń lebi eskende, onyń talantyna eriksiz tamsanasyz.
Nurbaný KAMAL,
jýrnalıst
Almaty oblysy
