Júzdesýge qatysýshylardy «7-20-25» jańa baǵdarlamasynyń sharttary qyzyqtyrdy. Atap aıtqanda, aýyldyq jerde turatyndardyń turǵyn úıi bolsa da baǵdarlamaǵa qatysýǵa bola ma, turǵyn úı qurylysyna úlestik turǵyda qatysatyn bolsa nesıe berile me, baǵdarlama ekinshi turǵyn úı alýǵa qoldanyla ma, jınaqtalǵan zeınetaqy esebinen alǵashqy 20 paıyz jarnany tóleýge bola ma, degen saýaldar qoıyldy.
Odan basqa, bes bastamadaǵy shaǵyn nesıe berý aýqymyn keńeıtý, oblysty keleshekte gazdandyrý máseleleri de qozǵaldy.
Aýyl turǵyndary Aleksandrov aýylyna baratyn joldy jóndeýge qarjy bólý jáne Vozvyshenka aýylyndaǵy sý qubyrynyń tarmaqtaryn jańǵyrtý qajettigin aıtty.
Senator O.Perepechına «Maslodel» jaýapkershiligi shekteýli seriktestiginiń ujymymen kezdesý barysynda tehnıka salasynyń, IT mamandary jetispeıtini týraly aıtyldy. Máselen, sút jáne sút ónimderin qoraptaý jelisin iske qosatyn bilikti mamandarǵa zárýlik bar ekeni atalyp ótildi. Petropavl qalasyndaǵy oblystyq aýrýhanada bolǵan kezde dárigerlik jabdyqtardyń jetispeýshiligi týraly másele qozǵaldy.
Senatorlar sapar sońynda Petropavl qalasyndaǵy jańadan salynyp jatqan qurylystarda – Solnechnyı-2 shaǵyn aýdany men Oqýshylar saraıynyń qurylysynda boldy.
