Forýmdy Atyraý oblysy ákimdiginiń qoldaýymen memlekettik qyzmet isteri jáne sybaılas jemqorlyqqa qarsy áreket Agenttigi oblystyq departamenti, oblystyq kásipkerler Palatasy uıymdastyrdy. Forým jumysyna QR kásipkerler quqyǵy boıynsha ókili Bolat Palymbetov qatysty.
Atyraý oblysynyń ákimi Nurlan Noǵaev forým qatysýshylaryna sáttilik tilep, sharanyń mańyzdylyǵyn atap ótti. Aımaq basshysy kásipkerler qoǵamdastyǵy men atqarýshy bılik arasyndaǵy dıalog problemalardy sheship, kedergilerdi joıýǵa yqpal eterine senim bildirdi.
– Memleket basshysy Nursultan Nazarbaev kásipkerlikti damytýǵa, shaǵyn jáne orta bıznesti qoldaýǵa únemi kóńil bólip keledi. Mundaı kezdesýler kásipkerlik salasyndaǵy máselelerdi kóterip, ortaq sheshimge kelýge múmkindik beredi, – dedi Nurlan Noǵaev. – Forýmǵa QR kásipkerler quqyǵy boıynsha ókildiń qatysýy sharanyń mańyzyn arttyra túsip otyr.
Oblys ákiminiń aıtýynsha, Atyraý aımaǵynda kásipkerlikti damytý boıynsha atqarylyp jatqan jumystyń aýqymy keń. Ol memleket tarapynan qarjylaı kómek qana emes, barlyq memlekettik qyzmetterdi laıyqty júrgizýmen baılanysty.
– El ekonomıkasy úshin kásipkerlikti damytý árqashan memlekettiń basymdylyǵy bolyp qala beredi. Sońǵy bes jylda tek jergilikti bıýdjetten aımaqtaǵy kásipkerlikti damytýǵa 1,2 mlrd teńge bólindi. 2018 jyly bıýdjetten 500 mln teńge bólindi, onyń basym bóligi aýyldaǵy bıznesti damytýǵa baǵyttalǵan. Atyraý oblysy munaıly óńir. Biraq sońǵy jyldary ekonomıkany dıversıfıkasııalap, agroónerkásip keshenin damytýǵa, ónim óndirýge kóńil bólip kelemiz, – dedi N.Noǵaev.
Aımaq basshysy ekinshi deńgeıli bankter men aýyl kásipkerleriniń seriktestigi kúrdeli ekenin atap ótti. Kóptegen aýyl turǵyndary nesıe alý kezinde kepil máselesimen betpe bet keledi. Osyny eskerip, jergilikti artqarýshy organdardyń aralasýymen aýyl bıznesin shaǵyn nesıeleý baǵdarlamasy engizildi. 2017 jyly «Bıznes Aımaq» baǵdarlamasy boıynsha jergilikti bıýdjetten 350 mln teńge bólindi, sonyń arqasynda 67 bıznes joba júzege asyryldy, 123 jumys orny quryldy. «Altyn Keme» baǵdarlamasy boıynsha 304 mln teńgeniń 13 jobasy maquldanyp, 25 jumys orny ashyldy. 2017 jyly Atyraý oblysynda «Bıznestiń jol kartasy-2020» baǵdarlamasy boıynsha 1 543,5 mln teńge bólindi. Jalpy 312 joba qarjylandyrylyp, 1210 jumys orny ashyldy.
Forýmda bıznes-ombýdsmen Bolat Polymbetov kásipkerler máselelerine toqtaldy.
– Sońǵy eki jylda kásipkerler quqyn qorǵaý boıynsha 12420 ótinish tústi, Atyraý oblysynda 378 ótinish. Aıta ketý kerek, problemanyń 90% aımaqtyq mańyzǵa ıe, jer alý, qurylys máselelerine qatysty, jergilikti jerde sheshilýi tıis.Bul týraly jergilikti atqarýshy organdar ókilderine kezdesý kezinde aıtamyz, – dedi Bolat Polymbetov.
Bıznes-ombýdsmen jergilikti atqarýshy organdar jer telimderin alý prosesi týraly tıisti aqparatty jarııalaýlary kerek ekenin atap ótti.
Oblys ákimi Nurlan Noǵaev bul máseleni sheshý jolynda jasalyp jatqan jumystardy baıandady.
– Kásipkerlermen kezdesýde ruqsat berý qujattaryna, jer máselesine qatysty suraqtar kóteriledi. Qazir elektrondy geoportal jasap jatyrmyz, sol arqyly barlyq másele elektrondy túrde sheshiledi, jer telimderine qatysty jumystar da ashyq bolady, – dedi aımaq basshysy.
