Kóshpeli otyrysta sóz bastaǵan Birǵanym Áıtimova senatorlardyń qazaq kınematografııasynyń túıtkildi máselelerin, sapasyn kóterý, ulttyq fılmderdiń básekelestigin arttyrý, aımaqtarda kınokórsetilimderdiń qoljetimdi bolýyn, otandyq kınonyń shetelde moıyndalýyn zerttep jatqandaryn jetkizdi.
Mańyzdy kezdesý barysynda tanymal rejısserler, akterler jáne prodıýserler senatorlarǵa jumys barysyndaǵy erekshelikter men kıno týraly zańnyń qabyldanýynyń qajettiligin aıtty. Naqtyraq aıtar bolsaq, rejısser Rústem Ábdirash ulttyq kıno qordyń qurylyýynyń mańyzdylyǵyn, kınoprokatshy Baýyrjan Shúkenov kınematografııa salasyndaǵy quqyqtyq retteý máselesi men shalǵaıdaǵy halyqqa kınonyń qoljetimdi bolýyna nazar aýdarý kerektigin aıtty. Rejısser-anımator Adaı Ábildınov anımasııalyq kınonyń tárbıe quraly retinde damýyn sóz etse, kınorejısser «Dýblıaj» ShО́B jetekshisi Bolat Qalymbetov elimizdiń kınoprokatyna túsken fılmderdi dýblıajdaý mindettelgen ýaqytta, «Qazaqfılm» negizindegi dýblıaj birlestiginiń zor múmkinshiligi týraly aqparat berdi.
– Búginde «Qazaqfılm» kınostýdııasy – ulttyq brend jáne Qazaqstan kınoındýstrııasynyń qozǵaýshy kúshi. Biz – Qazaqstannyń kınematografısteri elimizdiń «Kınematografııa týraly» zańyn kútip júrgenimizge kóp boldy. Bul zań: kınematografısterdiń, kıno óndirýshilerdiń, prokatshylardyń, dıstrıbıýtorlardyń jumysyn rettep otyrady. Kkıno ındýstrııanyń ekonomıkalyq tetikteriniń damýyn qalyptastyrýǵa múmkindik beredi. Sonymen qatar salyqtyq artyqshylyqtar, kedendik jeńildikter jáne memlekettik sýbsıdııalaý mehanızmi sııaqty naryqtyq mehanızmder arqyly jaǵymdy ınvestısııalyq klımat qalyptastyrady, – dedi Sh.Aımanov atyndaǵy «Qazaqfılm» AQ Prezıdenti Baqyt Qaıyrbekov.
KSRO halyq artısi Asanáli Áshimov «Qazaqfılm» kınostýdııasyna ulttyq kompanııa mártebesin qaıtarý týrasynda sóz qozǵap: «Bul kınostýdııa elimizdiń barlyq kınogerlerin biriktiretin ortaq shańyraq. Osy jerge bárimiz jınalyp kıno tóńireginde áńgime quramyz. Sondyqtan da kınostýdııanyń terrıtorııasy tek memleketke ǵana tıesili bolyp, jeke menshikke ótpeýi tıis. Kınostýdııaǵa ulttyq kompanııa dárejesin qaıtarý kerek, – dedi.
Jıyndy senator Birǵanym Áıtimova qorytyndylady. Ol búgingi kınematografııa jáne mádenıettiń, onyń ishinde áleýmettik salalardyń damýyn retteıtin zań jobasy qarastyrylǵan kezde otyrysta aıtylǵan pikirler men usynystar mindetti túrde eskeriletinin jetkizdi.
«Qazaqfılmge» kelgen depýtattar kınostýdııanyń tynys-tirshiligimen jáne onyń tehnıkalyq múmkindikterimen tanysty. Olarǵa fılmderdi jaryqqa shyǵarý úrdisiniń erekshelikteri týraly jáne Qazaqstannyń altyn qoryna engen fılmderdiń shyǵý tarıhy týraly da baıandaldy.
– Kınostýdııaǵa qazaq kınosynyń murajaıy kerek ekendigin túsindik. О́ıtkeni elimizdiń mádenı qundylyqtarynyń barlyǵy osy jerde. Osy jóninde biz depýtattyq saýal joldaıtyn bolamyz, – dedi ekskýrsııa sońynda depýtat Baqytjan Jumaǵulov.
Aınash ESALI,
«Egemen Qazaqstan».
ALMATY
