Zamanaýı sıfrlyq tehnologııalarmen jabdyqtalǵan mýzeıden kásiporynda óndirilip jatqan altyn, kúmis, mys, myrysh, qorǵasyn (jasandy jáne tabıǵı qalpyndaǵy) quımalaryn qolǵa ustap kórip, naǵyz kennen jasalǵan taqta alańqaıy aldynda metallýrg kaskasyn, kostıýmin kıip estelik sýretke túsýge bolady.
Birneshe aýmaqqa bólingen mýzeı zalyna kompanııa kenishterinen alynyp jatqan mıneraldy shıkizattar túrleri qaz-qatar tizilip, kásiporynnyń óndiristik alańdary, Aqmola, Qaraǵandy oblystaryndaǵy metallýrgııalyq bólimsheleriniń panoramalyq fotosýretteri qoıylypty.
Munda avtomattandyrylǵan zamanaýı radıogıd júıesi de bar, ol kelýshilerge birneshe tilderdi qatar aýdaryp, jetkizip turýǵa múmkindik beredi. Aldaǵy ýaqytta mýzeıdiń ınteraktıvti júıesi de jasalmaq. «О́tken jyly kompanııa óziniń 20 jyldyq mereıtoıyn atap ótti.
Mýzeıdi jańartyp, dızaınyn zamanaýı etip, ózgertip, sıfrlyq jańa tehnologııalarmen jabdyqtaý týraly bastama sol kezde oıymyzǵa kelgen edi. Naýryz merekesi qarsańynda jańa mýzeıdiń jobasyn tolyq júzege asyryp bittik», - deıdi «Qazsınk» JShS-niń ákimshilik máseleler jónindegi atqarýshy dırektory Andreı Lazarev.
Azamat QASYM,
«Egemen Qazaqstan»
О́SKEMEN
