«100 jańa oqýlyq» jobasy otandyq bilim berý salasynyń damýyna tyń serpin beredi. Qazaq tiliniń qoldanys aıasyn odan saıyn keńeıte túsýge yqpalyn tıgizetin, qazaq tiliniń ǵylym tili retinde, saraptama tili retinde, bıznestiń tili retinde damýyna sebep bolatynyn eskere otyryp, elimizdiń joǵary bilim berý salasyn jedel jańǵyrtý qajet dep sanaımyz.
Jahandyq deńgeıdegi ǵylymı eńbekterdiń qazaq tilinde qoljetimdi bolýy ǵylymı-aǵartýshylyq ortanyń barlyq baǵyttar boıynsha jan-jaqty damýyna septigin tıgizip, erekshe múmkindikterge jol ashady.
Biz elimizdegi bilim men ǵylym jalpy jańǵyrý úrdisiniń negizgi tiregi bolýy kerek dep sanaımyz.
Ol úshin joǵary jáne joǵary bilimnen keıingi bilim berý salasynyń maqsat-mindetterine keshendi revızııa jasap, olardy damýdyń jańa talaptaryna sáıkestendirý qajet.
Orta bilim berý júıesindegi ózgerister dınamıkasy joǵary jáne joǵary bilimnen keıingi bilim berý salasyn da sapaly reformalaý qajettigin kórsetip otyr.
Tabysty synaqtan ótip, eń úzdik álemdik standarttar boıynsha jumys istep jatqan Nazarbaev zııatkerlik mektepteri men Nazarbaev Ýnıversıtetiniń tájirıbelerin belsendi túrde engizý qajet.
Bilim berýdiń básekege qabiletti úlgisin qalyptastyrý bilim berýdiń ádistemesi men oqýlyqtardyń mazmuny jetildirip, suranysqa ıe mamandyqtardyń tizimin jańartýdy talap etedi.
Tıisinshe, jańa mindetterge sáıkes ustazdardyń biliktiligin kóterý jáne stýdentter men oqytýshylardyń ózgeristerge daıyn bolýy meılinshe ózekti másele.
Joǵary oqý oryndaryna akademııalyq derbestik qaǵıdalaryn engizip, basqarý isi men sıfrly tásilmen bilim berýdi qamtamasyz etý kerek.
Túptep kelgende, bilim berý salasy adam kapıtalyn qalyptastyrýǵa, ekonomıkalyq bilimdi damytýǵa jáne tehnologııalar men ınnovasııalardyń transfertine baǵyttalǵany jón.
Rýhanı jańǵyrý – adam ómiriniń barlyq tustaryn qamtıtyn úrdis.
Damýdyń árbir kezeńi bizge zaman talaptarynan týyndaıtyn jańa mindetter júkteıdi.
Jastar uıymdary óz tarapynan osy mindetterdi júzege asyrýǵa barynsha qoldaý bildirip, jastardyń oǵan jumyla atsalysýy úshin eńbek etetin bolady.
«Qazaqstan-2050» JQ, «Jas Otan» JQ,
«Bolashaq» assosıasııasy,
«Qazaqstan jastary kongresi» ZTB,
«Qazaqstan stýdentteri alıansy» QQ
