Balandınge deıin júzý sportynan álem jáne Olımpııa oıyndaryna qatysqan sportshylarymyz boldy. Biraq olar Dmıtrıı Balandın jetken shyńǵa kóterile almaǵan edi. Dmıtrııdiń stýdentter arasyndaǵy Jazǵy Ýnıversıadada bir altyn, bir kúmis jáne eki qola medal jeńip alǵanyn, Azııa oıyndarynyń úsh dúrkin chempıony bolǵanyn jankúıer qaýym umyta qoımaǵan bolar.
Jýyrda ǵana 23 jasqa tolǵan sportshymyz keshe tórt jyl burynǵy jetistigin taǵy qaıtalady. Bul joly Ispanııanyń Malaga qalasynda sý sportynan ótken Ispanııa ashyq chempıonatynda. Bıylǵy maýsymnyń basty dodasy Indonezııada ótetin jazǵy Azııa oıyndaryna daıyndyqtaryn pysyqtap jatqan Qazaqstan quramasy atalǵan dodada segiz medal oljalady. Onyń úsheýin Dmıtrıı Balandın ıelendi. Úsheýi de altyn. Ispanııa birinshiliginde otandasymyz 200, 100 jáne 50 metr qashyqtyqqa brass ádisimen júzýde qarsylas shaq keltirmedi.
Sondaı-aq Qazaqstan chempıonatynyń rekordshysy Ádilbek Mýsın batterflıaı ádisimen 100 jáne 50 metr qashyqtyqqa jarysýdan bir kúmis, bir qola júlde enshiledi. Taǵy bir otandasymyz Ádil Qasqabaı 100 metrge erkin ádispen júzýde kúmis, 50 metrge júzýden qola aldy. Al Aıbek Qamzenov 50 metrge brass ádisimen júzýde qola medalǵa qol jetkizdi.
Álı BITО́RE,
«Egemen Qazaqstan»
