«Rýhanı jańǵyrý» aıasynda byltyrǵy ótken 143 is-sharanyń basym bóligi jergilikti demeýshilerdiń qoldaýymen júzege asqan. Sonyń ishinde «Qazaqstannyń jeti keremeti» týrıstik-ólketaný aımaqtyq ekspedısııasy, «Jas ekologter» men «Meniń elim – Qazaqstan» respýblıkalyq forýmy, kolledj stýdentteri arasynda «Rýhanı jańǵyrý – bolashaqtyń kepili» festıvali, balalar men jasóspirimder ansamblderiniń sherýi, «Týǵan ólke News» aımaqtyq medıa-forýmy, «Bilim. Týrızm. Integrasııa» halyqaralyq ǵylymı-praktıkalyq konferensııasy ótti. «Atameken» kishi baǵdarlamasy boıynsha barlyǵy 93 joba tizilimge enip, sonyń 67-si márege jetti. «Áleýmettik bastamalar kartasy» aıasynda kásipkerler tarapynan 60 joba jasaldy. Sóıtip Aqsaı qalasynda sport kesheni, Bórli aýdanynda balabaqshalar, Qaztalov aýdanynda 12 mln teńgege ashyq aspan astyndaǵy mýzeı boı kóterdi.
«Rýhanı qazyna» kishi baǵdarlamasy boıynsha óńirde Qazaqstan boıynsha alǵash ret Batys Qazaqstan oblysynda «Rýhanı jańǵyrý» mýzeıi ashyldy. Sonymen qatar oblys aýdandaryna ekspedısııa júrgizý arqyly Qazaqstannyń vırtýaldy kartasy úshin qasıetti nysandardyń GPS koordınattary anyqtalyp, «Qasıetti Qazaqstan» ǵylymı-zertteý ortalyǵyna berildi.
Bıyl baǵdarlama aıasynda 414 is-shara josparlanyp otyr. Bul jobalar da negizinen demeýshiler esebinen júzege aspaq. «Tárbıe jáne bilim» kishi baǵdarlamasy boıynsha 88 is-sharaǵa 60 myńǵa jýyq adam tartylady. «Uly Jibek joly – uly dostyq joly» atty Oral-Saraıshyq-Atyraý-Pıatıgorsk baǵytymen halyqaralyq tarıhı ekspedısııa jolǵa shyǵady.
Ulttyq kodymyzdy saqtaýdyń bir joly retinde Batys Qazaqstan oblysynda dombyrany keńinen nasıhattaý qolǵa alyndy. Mektepterde dombyra úıirmeleri ashylyp, úzilistik qońyraý ornyna kúı áýeni oınatylady. Mamyr aıynyń ekinshi onkúndiginde Dombyra kúnin ótkizý josparlanǵan.
Oblysta mesenattardyń kómegimen 247 joba atqarylmaq. Olardyń ishinde aýyldyq mádenıet úıi, saýyqtyrý kesheni, taza aýyz sýmen qamtý júıesi sekildi iri jobalar da bar. Osyndaı úlken joba – Shyńǵyrlaý ózeninen ótetin kópir qurylysyn kásipker Mırbolat Tasmaǵambetov salyp, aýyldastaryna syılap úlgerdi.
Respýblıkalyq jalpyulttyq qasıetti nysandary qataryna kirgen ortaǵasyrlyq Jaıyq qalashyǵy, Bókeı ordasy tarıhı-mýzeı kesheni, Alash mýzeıi, Taqsaı obalar kesheni, Jumaǵazy haziret, aqyn, qoǵam qaıratkeri Ǵumar Qarash pen kúıshi-kompozıtor Dáýletkereı kesenelerine erekshe nazar aýdarylyp, kóńil bólinetin bolady. Syrym aýdanyndaǵy Alash mýzeıi kúrdeli jóndeýden ótti. Ǵumar Qarashtyń basyna kesene turǵyzylmaq. Jaıyq qalashyǵy aýmaǵyna ortaǵasyrlyq stılde kireberis qaqpa ornatylady. Bul sońǵy atalǵan jumystar demeýshilerdiń kómegimen júzege asyrylmaq.
Qazbek QUTTYMURATULY,
«Egemen Qazaqstan»
ORAL
