Delegasııany bastap barǵan Atyraý oblysy ishki saıasat basqarmasynyń basshysy Jasulan Bısembıev, «Atyraý-Aqparat» medıaholdınginiń dırektory Baıazı Ábdeshev jáne «Rýhanı jańǵyrý» óńirlik jobalyq keńsesiniń jetekshisi Rınat Qulmaǵambetov sapar aıasynda Qazaqstannyń Astrahandaǵy konsýly Qanat Shekqalıevpen kezdesti. Kezdesý barysynda qos tarap Astrahan oblysynda turatyn qazaq dıasporasyna qatysty mańyzdy máselelerdi kóterdi. Reseı taratqan resmı málimetterde búginde Astrahan aýmaǵynda turatyn qazaqtardyń sany 149 myńnan asady.
Odan ári atyraýlyq delegasııa Astrahan oblysy úkimet tóraǵasynyń orynbasary – mádenıet jáne týrızm mınıstri Galına Zoteevamen júzdesti. Kezdesýge konsýl Qanat Shekqalıev arnaıy qatysty. Kezdesý barysynda 14-15 naýryz aralyǵynda munaıly ólkede bolyp ótken «Uly Dalanyń ulttyq dástúrleri» halyqaralyq forýmyna atsalysyp, belsendi qatysqany úshin Astrahan basshylyǵyna Atyraý oblysynyń ákimi Nurlan Noǵaevtyń atynan alǵys bildirildi. Sondaı-aq mınıstrge Qazaqstan Prezıdenti Nursultan Nazarbaevtyń «Rýhanı jańǵyrý» baǵdarlamasyn júzege asyrý barysy týraly aqparat berildi. Mádenıet jáne týrızm salasynda birlesken jobalardy júzege asyrý múmkindikterin qarastyrdy.
Ádette týrıster Astrahandaǵy Qurmanǵazy atyndaǵy mádenı ortalyqqa jáne Saraı – Batý keshenine qyzyǵýshylyq tanytyp jatady. Al búginde Atyraýdaǵy Saraıshyq murasyn saqtap qalý maqsatynda vızıt-ortalyq salý josparlanyp otyrǵanyn eskersek, týrıster úshin Saraıshyqtyń erekshe aımaqqa aınalary anyq. Qazaqstannyń kıeli jerler geografııasy qataryn «Mahambet» mavzoleıiniń, «Aqmeshit» kesheniniń tolyqtyrǵany belgili. Sonaý sarmattar dáýiriniń uly murasy – «Imanqara úńgiri», altyn adam tabylǵan «Araltóbe» qorǵany, «Ushqan ata», «Qulshan ata» mavzoleılerinde de týrıstik marshrýttardy damytý múmkindikteri joǵary.
Sapar aıasynda delegasııa Qurmanǵazy atyndaǵy mádenı ortalyqty aralady. Volodar aýdanyndaǵy Altynjar aýylynda ornalasqan ortalyqta uly kúıshiniń shyǵarmashylyǵyna arnalǵan mýzeı jasaqtalǵan. Reseılik áriptester týrıstik maýsym kezinde munda 25 myń adamǵa deıin bolatynyn aıtady.
Baqytgúl BABASh,
«Egemen Qazaqstan»
Atyraý – Astrahan – Atyraý
