Úshqońyr
Ol Bishkek qalasynyń týmasy, mamandyǵy qurylysshy, al, 60-jyldardan beri Almaty qalasynda turyp keledi. Fotoónerge degen qyzyǵýshylyǵy men súıispenshiligi onyń ekinshi mamandyǵyna aınalǵan. Alǵashqy fotoapparaty keńestik «Zenıt» bolsa, keıinnen kásibı kameraǵa almastyrǵan.
Avtor 2006 jyly alǵash ret Han Táńiri taý shatqalyna barǵanynda, Qazaqstannyń ásem tabıǵatyna tánti bolyp, sol kezden-aq fotosýret ónerindegi alǵashqy qadamdaryn bastap ketken. Tek Qazaqstan boıynsha ǵana emes, sondaı-aq alys-jaqyn shetel saıahattary onyń tyń týyndylarynyń paıda bolýyna shabyt berdi.
Fotosýretshiniń týyndylarynan Jer betindegi eń iri shól dala – Saharany, ádemi araldardyń biri – Grenlandııany, tarıhı Italııa men «muzdy el» Islandııanyń áserli jerlerin kórýge bolady. Al onyń Qytaı elinde túsirgen sýretterinen Ulttyq Szıýchjaıgoý parkindegi jasyl-sary Lı ózenin, Hýanlýngtyń kógildir kólin, Avatar ushpa taýlaryn tamashalaı alar edińiz.
Fotosýret sheberi jyldar boıy álemniń eń ádemi jerleri men alys shalǵaılaryn aralaǵan: ushaqpen Kamchatkany; ataqty Korıak, Avachın, Kozel janartaýlaryn; Tynyq muhıtyndaǵy Qorym jáne Avachın shyǵanaǵyn; Soloves araldaryn; Birikken Arab Ámirliginde áýe sharynan Aravııa shólindegi tańsári sýretterin de túsirip alǵan. Jaıaý júrip Gımalaıdy (Nepal) sonymen qatar deltaplannan Dhaýlagırı (8167 m), Anapýrný (8091 m) jáne Feva kóli men tabıǵattyń basqa da tamasha jerlerin taspalaǵan.
Kórmeniń erekshe bóligin elimizdiń kórikti jerlerinen jınalǵan «Qazaqstan tabıǵatynyń marjandary» atty fotojumystary quraıdy. Onda avtor, týǵan ólkesi men Ile Alataýynyń ásem kórinisterin, Almaty men Almaty oblysy aýmaǵyn, Kólsaı, Han-Táńiri, Sharyn kóli men Sharyn shatqaly, «Altynemel» ulttyq qoryǵy, «Baıanaýyl» ulttyq saıabaǵy, Jasybaı, Marqakól, Býrabaı, Zaısan, Qarakól, Qaıyńdy, Úlken Almaty ózeni, Buqtyrma sý qoımasy, Kaspıı teńizi, Kıyn Kerish taýlary, Mańǵystaýdyń aq taýy, Shakelmes, Aıǵaıqum, Mańǵyshlaq, Ústirt shatqaly, Úshqońyr jaılaýy, Aqtolaǵaı qyrqasy tańbalanǵan tartymdy fotojumystaryn usynady.
Fotolaryna qarap, netken ǵajap dúnıeler ekenine tańdaı qaǵasyz, netken ǵajap dúnıeler...
Shynynda da, bul kórmege fotosýretshi, saıahatshy Taımas Nurtaevtyń 150-den asa fotosýretteri qoıylyp, kóz jaýyn alardaı jaınap tur.
Saparbaı PARMANQUL,
«Egemen Qazaqstan»
ALMATY
Sýretterdi túsirgen
Taımas Nurtaev
