Jaqynda halyqaralyq deńgeıde ótetin «Salıýt talantov» baıqaýy aıaqtaldy. Álemdegi talantty balalardyń basyn qosatyn óner jarysy bıyl Parıj qalasynda uıymdastyrylypty. Osy baıqaýǵa Almaty oblysynyń Aqsý aýdanynan 6- synyp oqýshysy Dıdar Muqataı, qatysyp keldi. Jaı kelgen joq, júzdegen eldiń órenderiniń arasynan top jaryp, júldeli 1 oryn ıelenip qaıtty.
– Aqsý aýdanyndaǵy Q.Sátbaev atyndaǵy mekteptiń 6-synybynda oqımyn. Án aıtýdy 2-synyptan bastadym. Parıjge barardan buryn Astanada ótken «Aq kógershin» baıqaýynda bas júlde aldym. Shetelge shyqqanymda azdap tolqydym, biraq óte kóńildi boldy. Jańadan dostar taptym, tanystym. Bolashaqta qazaqtyń ánin álemge tanytyp, dúnıejúzin aralaǵym keledi. Meni ánshilikke baýlyp júrgen ustazym Ilıas aǵaıyma alǵys aıtamyn, – deıdi talapker ánshi.
Bolashaǵynan úlken úmit kúttiretin ónerli óren Fransııa astanasynyń tórinde «Aq jaıyq» ánin shyrqap, sheteldikterdiń tańdaıyn qaqtyrǵan eken.
Aıtpaqshy, Dıdar Muqataı halyqaralyq baıqaýlarda óner kórsetip júrgen jalǵyz jetisýlyq ónerpaz emes. Eskeldi aýdanyndaǵy «Aıana» jas bıshiler toby da Dıdarmen birge «Aq kógershin» halyqaralyq baıqaýynan birinshi oryn alǵan bolatyn.
Qalmahanbet MUQAMETQALI,
«Egemen Qazaqstan»
Almaty oblysy
