Oblys ákiminiń orynbasary J. Súıinshálıevtiń aıtýynsha, Jaıyq ózeni arqyly ótetin kópir ótpesi respýblıkalyq mańyzdaǵy «Atyraý — Oral» avtokólik jolyn oblystyq mańyzdaǵy «Atyraý — Inder» avtokólik jolymen baılanystyratyn Mahambet aýylynda salynyp jatyr. Kópir «Aqtóbe — Atyraý — Astrahan» avtojolynyń bir bóligine aınalady: ol Aqtóbeden Astrahanǵa deıingi joldy qysqartyp, tranzıttik kólik aǵynyn Atyraýǵa kirgizbeı ótkizýge múmkindik beredi. Qurylys jumystary bıyl aıaqtalady.
Oblystyń Mahambet aýdanyndaǵy jańa kópir qosymsha kólik dálizin quryp, oblys ortalyǵyn keptelisterden aıtarlyqtaı aryltady. Joldyń júretin bóligi eki jolaqtan turatyn bolady, kópir boıynda kóliktiń jáne óńir turǵyndarynyń turaqty ári qaýipsiz qozǵalysyn qamtamasyz etetin jaıaý joldar qarastyrylǵan. Sonymen birge, jobalanǵan kópir ótpesi aýdanda shaǵyn jáne orta bıznestiń damýyna serpin beredi.
Eske sala keteıik, Premer-Mınıstr Baqytjan Saǵyntaev Elbasynyń tapsyrmasy boıynsha Atyraý oblysyna keldi. Sapardyń maqsaty — Memleket basshysynyń «Qazaqstannyń úshinshi jańǵyrýy: jahandyq básekege qabilettilik», «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýlary men Bes áleýmettik bastamasy aıasynda bergen tapsyrmalarynyń oryndalý barysymen tanysý.
