Jergilikti ónerpazdardan quralǵan trýppa elimizdiń birqatar oblysyna, Reseıdiń shekaralas aımaqtaryna gastroldik saparlarǵa shyǵyp, talǵampaz kórermenderdi qazaqy qaljyńǵa qaryq qylyp júrdi. О́mirde de, ónerde de oıyp turyp oryn alǵanmen túrli sebeptermen jumysyn toqtatqan ázil áleminiń ornyn endi «Teriskeı» satıra teatry basty.
Ony uıymdastyrýshylardyń biri, S. Muqanov atyndaǵy qazaq sazdy-drama teatrynyń beldi akteri ári rejısseri Boolatbek Shambetovtiń aıtýynsha jurtshylyq arzan, yrjaqaı shoýlardan mezi bolǵan syqyldy. Kez kelgen telarnany ashyp qalsań oı salarlyq eshteńesi joq, tabıǵatymyzǵa jat kórinister andyzdap qoıa beredi. Ásirese, shetelderge elikteýden, solyqtaýdan týǵan tatymsyz qoıylymdar jastardyń sanasyn ýlap, ulttyq naqyshtan ajyratyp barady.
«Onyń basty sebebi búgingi kúnniń ótkir máselelerin, tolǵaqty problemalaryn astarlap ta, tikeleı de jetkizetin salmaqty, mazmundy repertýarlyq shyǵarmalar tapshy. Ekinshiden, ezýińe mysqyl úıiretin, jaǵymsyz qubylystarǵa jıirkenish týdyratyn oıly satırany adamdar teledıdardan ǵana emes, jergilikti jerlerde tikeleı tamashalasa degen oı boldy», deıdi ol.
Bolatbek osydan onbes shaqty jyl buryn oblystyq telearna janynan «Oıpyrmaı» atty ázil-syqaq baǵdarlamasynyń ashylýyna uıytqy bolyp, biraz tájirıbe jınaqtapty. Jańa teatrǵa birqatar talantty, talapty áriptesterin tartypty. Qalalyq mádenıet úıinen oryn berilip, barlyq jaǵdaı týǵyzylypty. Keleshekte 500 oryndy qazaq teatry boı kóterse, óristeri keńeıedi degen úmitteri basym.
«Qazirgi kórermenderdiń talǵamy da, kózqarasy da múldem bólek. Satıra da– tárbıeniń mańyzdy quraly. Ol tek kúlkiden turmaıdy. Astarynda salmaqty oı, áleýmettik astar jatýy kerek. Keı jaǵdaılarda satıranyń rýhanı kúsh beretin, jaqsy kóńil-kúı syılaıtyn qudyretin elep-eskere bermeımiz. О́ńir turǵyndary alǵashqy qoıylymdy jýyq arada tamashalaıtyn bolady», deıdi B. Shambetov.
О́mir ESQALI,
«Egemen Qazaqstan»
