Qas-qaǵym sát. Bul da bir dáýren. Dáýir daryndarynyń tamasha bir sapary sol kezdegi Gýrev oblysy, Teńiz aýdany, Oktıabr keńsharynda jalǵasyn tabady. Qazir bul aımaq Atyraý oblysy, Qurmanǵazy aýdany, Nurjaý aýyldyq okrýgi dep atalatyny aıan.
– Shynynda da bul sırek sýret. Sonaý 1976 jyldyń naýryz aıynda Qazaq memlekettik akademııalyq drama teatrynyń beldi aktrısalary Sábıra Maıqanova, Habıba Elebekova, jas aktrısa Núketaı Myshbaeva, ataǵy endi dúrkirep shyǵyp kele jatqan Asanáli Áshimov, Quman Tastanbekov qosylǵan jas akterlary bar brıgada Nurjaý aýyldyq okrýgine keldi. Sol kezdegi Oktıabr keńsharynyń basshysy Muǵal Naýryzbaev elge bedeldi, respýblıkaǵa tanymal azamat bolatyn. Onyń sol kúni qoly bosamaı qalyp, qonaqtardyń jartysy – jigitter bizdiń úıge, qyzdar basqa úıge túsetin boldy. Men keńshardyń veterınarlyq dárigerimin. Qonaqtardyń jandarynda Qydyrsıyq esimdi aýdandyq gazettiń fototilshisi júr. Aktrısalar aýdan mingizip jibergen «Volgada». Asanáli men Qumandarǵa «ÝAZ» kóligi buıyrypty.
Maldyń tóldep jatqan kezi. О́zderi on shaqty adam. Olardyń Gýrevten bastalǵan sapary aýdanǵa, odan ári shopandar aýylyna ulasady. Sol zamanda tanymal óner ujymdary egin, tól alý naýqany kezinde eldi mekenderdi aralap, konsert qoıyp, halyqpen dıdarlasatyn úrdis bar edi. Almatydan kelgen ataqty akterlar bizdiń úıde eki kún qondy.
KSRO halyq ártisi Sábıra Maıqanovanyń áńgimeleri keremet qyzyqty. Al Asanáli Áshimov pen Quman Tastanbekovter óte qarapaıymdylyǵymen este qaldy. Asanáliniń ishigi bar eken. Qumanda qara ton boldy. Aktrısalar qundyz jaǵaly palto kıip alǵan. Ol kezde bul bizdiń aýyldyń áıelderine óte qymbat kıimder bolyp kórinetin. Janymyz qalmaı barymyzdy aldaryna tosyp, qurmettep kúttik. Bul kúnder bizge máńgilik este qalǵan syı boldy. Qazaqtyń qadirli ónerpazdary Almatyǵa qaıtqannan keıin otbasylyq albom qurastyryp, bir jasap qaldyq.
Bul sýrette eki birdeı ataqty akterdiń ortasynda otyrǵan tuńǵyshymyz Stella. Qazaq Ulttyq ýnıversıtetin bitirdi. Qazir Atyraý qalasynda turady. О́z mamandyǵy boıynsha bilikti qyzmetker. Uldy boldy, qyzdy boldy. Baqytty ana! – deıdi eldiń syıly azamaty, eńbek ardageri Nursıyq Aqmurzın aǵamyz.
Aınash ESALI,
«Egemen Qazaqstan»
ALMATY
