Dáris barysynda mınıstr jastarǵa memlekettiń aqparat salasyndaǵy saıasaty týraly jan-jaqty áńgimeledi. Atap aıtqanda Memleket basshysy Nursultan Nazarbaevtyń «Rýhanı jańǵyrý» baǵdarlamasynyń túpki maqsaty men «Sıfrly Qazaqstan» baǵdarlamasynyń, «Prezıdenttiń bes áleýmettik bastamasy» atty halyqqa Úndeýiniń mańyzyn tarqatyp aıtty. Sonymen qatar búgingi jýrnalıstıkanyń jaı-kúıi, osy saladaǵy sapaly bilim jáne báseke, otandyq BAQ-ty damytýǵa qatysty sharalar, aqparat alý men taratý, aqparattyq qaýipsizdik máseleleri jan-jaqty aıtyldy.
Dáris sońynda Mınıstr Dáýren Abaev jas jýrnalısterge básekege qabiletti bolyp, qazaq jýrnalıstıkasynyń deńgeıin arttyrý úshin júıeli bilim alýdyń mańyzdylyǵyn aıta otyryp, olardy jańa tehnologııalardy úırenýge jáne sol tehnologııalardyń tili sanalatyn aǵylshyn tilin meńgerýge, jan-jaqty bolýǵa shaqyrdy. Sonymen qatar mınıstr «Egemen Akademııasy» jobasynyń artyqshylyqtary jaıly, onyń jýrnalısterdi daıarlaýda alatyn orny týraly pikirin bildirdi.
Is-sharaǵa jınalǵan jastar da belsendilik tanytyp, spıkerge óz saýaldaryn qoıyp, pikirlerimen bólisti.
Aıta keteıik, «Egemen Qazaqstan» gazetiniń janynan ashylǵan jobada ár kýrs úsh aı ýaqytty qamtıdy. Aptasyna bir ret bolatyn dáristi basylym qyzmetkerlerinen bólek arnaıy spıkerler de júrgizedi. Jas jýrnalıster bilikti mamandardyń dárisin tyńdaı otyryp, maqala jazý, hat qorytýdan bastap, basylymnyń baspahanadan shyǵýyna deıingi prosesimen jan-jaqty tanysady.
Sonymen qatar, dárister boıynsha tanymdyq maqala, esse jáne saraptamalyq maqala jazǵan belsendi qatysýshylarǵa kýrs aıaqtalǵan kezde arnaıy sertıfıkattar tabystalady. Akademııanyń alǵashqy maýsymda taqyryp tańdaý, taqyryp qoıý, zertteý maqalasyn jazý, saraptamalyq maqala jazý, mátindi óńdeý, suhbat alý, fotojýrnalıstıka, betteý sekildi taqyryptar qamtylady.
Mádına JÁLELQYZY,
«Egemen Qazaqstan»
