Táýelsizdik shejiresi

«Egemen Qazaqstan». 1996 jyl. Dúısenbi, 16 jeltoqsan.

Prezıdenttiń óz qolynan joǵary nagradalar aldy «Egemen Qazaqstannyń» osydan 15 jyl burynǵy, ıaǵnı 1996 jyldyń 16 jeltoq­sa­nyn­daǵy nómiri joǵary­da­ǵy­daı taqyryppen ashy­lypty. QazTAG-tyń bul habarynda jeltoq­san­nyń 15-inde Prezıdent Nursultan Nazarbaev óz rezıdensııasynda qa­zaq­stan­dyq­tardyń bir tobyna Memlekettik nagradalardy tapsyr­ǵan­dy­ǵy, bul nagradalarǵa olardyń Otan­ǵa sińirgen eńbekteri úshin jáne respýblıka táýelsizdiginiń bes jyl­dy­ǵyna baılanysty ıe bolǵandyǵy aıtylady. «Osy saltanatty rásimdi asha kele eli­miz­diń basshysy egemendiktiń bes jyly ońaı­lyq­pen ótpegenin aıtty. Alaıda nagradamen atap ótilgen azamattardyń bári de júrgizilip jat­qan reformalarǵa belsendi qoldaý kórsetti, memleketti nyǵaıtysty, halyqpen birge onyń ýaıymy men shattyǵyn bólisti. Halyq ártisi Roza Baǵlanova, Qaırat Rysqulbekovtiń ana­sy Dámetken Asanbaeva Prezıdenttiń qoly­nan «Halyq qaharmanynyń» Altyn Jul­dy­zyn aldy. Dámetken ananyń ulyna bul jo­ǵa­ry nagrada 1986 jylǵy Jeltoqsan oqıǵa­la­ryn­da Respýblıka azattyǵy men táýelsizdigi jolynda kórsetken azamattyq erligi úshin, qaıtys bolǵannan keıin berilip otyr» delinipti. Habarda «Otan» ordeni «Qazaqstan joldary» AQ prezıdenti Shámil Bekbolatovqa, Abaı atyndaǵy Qazaq memlekettik aka­de­mııa­lyq opera jáne balet teatrynyń bas rejısseri Baıǵalı Dosymjanovqa, A.Baıtursynov atyndaǵy Til bilimi ınstıtýtynyń dırektory Ábdýálı Haıdarovqa tapsyrylǵandyǵy, QR Áskerı Áýe Kúshteriniń qolbasshysy Mu­hamed­jan Ybyraevqa «Dańq» ordeni berilgendigi aıtylady. Al belgili óner jáne mádenıet qaırat­kerleri Álibek Dinishev, Káýken Kenjetaev, Múlik Súrtibaev, aqyn Leonıd Krıvoshekov, Almaty qalasynyń ákimi Shalbaı Qulmahanov, sýretshi Sabyr Mámbeev, jýrnalıst Valerıı Mıhaılov, músinshi Hakimjan Naýryzbaev, Par­lament Senatynyń depýtaty Dáýlet Sembaev, Syrtqy ister mınıstri Qasymjomart Toqaev, Ál-Farabı atyndaǵy Qazaq memlekettik ulttyq ýnıversıtetiniń kafedra meń­gerý­shisi Maııa Shyǵaeva «Parasat» ordenine ıe bolypty. Osyndaı qurmetke respýblıkamyzdyń bas­qa da kóptegen azamattary bólengen. Betti ázirlegen  Suńǵat ÁLIPBAI.