Sol úshin Qazaqstan halqy Assambleıasy «Rýhanı jańǵyrý» baǵdarlamasynyń «Jańa gýmanıtarlyq bilim.Qazaq tilindegi 100 jańa oqýlyq» jobasyn talqylaý boıynsha ótkizip jatqan biryńǵaı kún aıasynda oblysta birshama sharalar qolǵa alyndy. Oblystyq Halyqtar dostyǵy úıinde respýblıkalyq «National bookdating» aksııasyna oraılastyrylǵan stýdent jastardyń zııatkerlik oıyndary ótti. Onda Halyqtar dostyǵy úıindegi jastardyń aqparattyq-túsindirý tobynyń spıkeri Rýslan Murzaǵalıev «Jańa gýmanıtarlyq bilim. Qazaq tilindegi 100 jańa oqýlyq» jobasynyń júzege asyrylyp jatqany týraly aıtyp berdi.
Jastardyń zııatkerlik oıynyn uıymdastyrýshylar suraqtardyń barlyǵyn derlik «Rýhanı jańǵyrý» baǵdarlamasy tóńireginde oılastyrdy. Ár komandaǵa bes oqýshydan kirdi. Jarys qorytyndysynda oqýshylar 100 gýmanıtarlyq oqýlyq jónindegi vıktorınalyq suraqtarǵa da jaýap berdi. Qazylar alqasynyń sheshimimen qaladaǵy №7 orta mekteptiń komandasy birinshi oryndy jeńip aldy.
A.Baıtursynov atyndaǵy Qostanaı memlekettik ýnıversıtetinde «Jańa ónerkásiptik revolıýsııa jaǵdaıyndaǵy adam kapıtalynyń sapasy» taqyrybymen ótken halyqaralyq «Baıtursynov oqýlary» ǵylymı-tájirıbelik konferensııada da jańa» joba týraly aıtyldy.
– Alash zııalylarynyń qazaq tilinde oqýlyq jazý bastamasy «Rýhanı jańǵyrý» baǵdarlamasynda jalǵasyn taýyp, álemniń úzdik 100 oqýlyǵyn qazaq tiline aýdarý jumysy qolǵa alyndy. Bul ana tilimizdi damytýǵa, onyń básekege qabilettiligin arttyrýǵa qosylǵan úlken kómek. Osy arqyly qazaq jastarynyń bilim kókjıegin keńeıtip, básekege qabilettiligi arttyra túsetini sózsiz, – deıdi A.Baıtursynov atyndaǵy ýnıversıtet professory Almasbek Ábsadyq.
Jobany talqylaý áli de jalǵasyn tabady.
Názıra JÁRIMBET,
«Egemen Qazaqstan»
QOSTANAI
