1995 jyly Qazaqstan halqy Assambleıasy qurylǵanda Qyzylordada koreı, ózbek, tatar jáne cheshen ulttyq-mádenı ortalyqtary bolǵan edi.
Búginde Qyzylorda oblysynda ózge etnos ókilderiniń úles salmaǵy jalpy alǵanda 4 paıyzdy quraıdy. Qazirgi tańda oblys kóleminde 11 etnomádenı birlestik jumys atqarady. Olardy atap aıtsaq, Qyzylorda oblysynyń Koreıler qaýymdastyǵy, «Slavıane», «Vaınah» cheshen, «Lev Ami» evreı, «Pontıısy» grek, «Viedegeburt» nemis, tatar, ózbek, túrik, qyrǵyz etnomádenı birlestikteri jáne «Rýsskaıa obshına» qoǵamdyq birlestigi jumys istep jatyr.
Etnomádenı birlestikterdiń mádenı kúnderi, ulttyq merekeleri, «Naýryz», «Qurban aıt», «Rojdestvo», «Sabantýı», «Solnal», «Ostern», «Pesah», «Maslenısa», Pasha merekeleri keńinen atap ótilip keledi. Munyń ózi oblystaǵy barlyq etnostardyń aýyzbirshilikte ómir súrýine, qoǵamdyq kelisimniń berik nyǵaıýyna úlken yqpal etedi.
Qazaqstan halqy Assambleıasynyń jergilikti jerlerdegi qyzmetin jandandyrý men qoǵamdyq kelisim ıdeıasyn ornyqtyrý maqsatynda Qyzylorda oblysy ákimi apparatynyń «Qoǵamdyq kelisim ortalyǵy» kommýnaldyq memlekettik mekemesi jumys isteıdi.
Búginde oblystyq Assambleıanyń bastamasymen kópetnosty mektepterde toleranttylyq klýbtary qurylyp, jumys isteýde. Toleranttylyq klýbtarynyń negizgi maqsaty – oqýshylardy qazaq halqynyń jáne Qazaqstanda turatyn barlyq etnostardyń salt-dástúri men ádet-ǵurpyn, tili men mádenıetin túsinýge, ulttyq qundylyqtarǵa uqypty qaraýǵa úıretý.
О́ńirde «Qazaqstanǵa ystyq yqylaspen», «Syr eli – dostyq mekeni», «Birligimiz jarasqan» atty jobalar sátti júzege asyrylyp keledi.
«Qazaqstanǵa ystyq yqylaspen» áleýmettik jobasynyń maqsaty qazirgi tańda shetelde turatyn, kezinde oblystan túlep ushqan otandastarmen júzdesýler uıymdastyrý bolatyn. Qazaqstannyń oń ımıdjin qalyptastyratyn bul jumystar óz nátıjesin berýde. Bul sharaǵa Reseı, Ýkraına, Reseıdiń Cheshen Respýblıkasy sııaqty birneshe memleketterge qonys aýdarǵan otandastarymyz kelip, qonaq boldy.
Oǵan qosa, shetelderde turyp jatqan qandastarymyzben baılanys ornatý maqsatynda «Atajurtyn ańsaǵan» atty joba júzege asyp keledi.
Sondaı-aq oblystyq Assambleıanyń «Syr eli – dostyq mekeni», «Dostyqta joq shekara», «Birligimiz jarasqan» kerýenderiniń aqparattyq-nasıhattyq toptary barlyq eldi mekenderde bolyp, Elbasynyń etnosaralyq tatýlyq pen qoǵamdyq kelisim saıasatyn nasıhattap otyrady.
О́tken jyly Syr eline «Yntymaqtastyq iskerlik jónindegi «Qazaqstan – Koreı ortalyǵy» AQ dırektory Vý Djong Hı myrza arnaıy kelip, «Dostyq» úıinde koreı dıasporasynyń ókilderimen kezdesti. Jaǵdaılarymen tanysty. О́z kezeginde osynda mekendep jatqan koreıler Qazaqstandy ekinshi Otany sanaıtyndyqtaryn aıtqan. Meımandos qazaq ultynyń taǵdyr-talaıymen jer aýyp kelgen aǵaıyndy ystyq qushaǵyna tartyp, baýyryndaı alqalaǵanyn aıtqan. Jıyn barysynda Vý Djın Hı myrza Elbasyna alǵysyn bildirgen edi.
Jaqynda Qyzylorda oblystyq orman sharýashylyǵy jáne janýarlar dúnıesi aýmaqtyq ınspeksııasy men Ońtústik Koreıa eli ókilderi birlesip, qalanyń turǵyndaryna 1757 túp alma aǵashy kóshetin tabys etti. Sonymen qatar Qazaly orman jáne janýarlar dúnıesin qorǵaý jónindegi memlekettik mekemesine baspanaly vagon, tirkemeli «Belarýs» traktory men «Ýaz» kóligin syıǵa tartty.
Oıaz baǵynda uıymdastyrylǵan sharada koreı eliniń ókili, professor Kım Gı Hen Syr óńiriniń jasyl jelekke aınalýyna tilektes ekendigin jetkizdi.
– Qazaqstan – kópetnosty memleket. Onyń ishinde Qazaly qalasynda birneshe etnos ókili bir úıdiń balasyndaı tatý-tátti ómir súrýde. Qazaqtardyń kóńili darhan, peıili taza, qushaǵy keń. Taǵdyrdyń aıdaýymen koreı ultynyń ókilderi Otanynan jer aýdarylyp, Qazaqstanǵa, onyń ishinde Qazaly qalasyna qonys tepken edi. Búginde osynda olardyń alpystan asa urpaǵy turyp jatyr eken. Bizdiń de Qazaqstanǵa degen dostyq kóńilimiz túzý. Osy ólkeniń jasyl jelekke oranyp kórkeıýin, turǵylyqty jandardyń deniniń saý bolǵanyn qalaımyz, – dedi ol.
«Kóp ultty bolý – bizdiń baqytymyz» degen edi Elbasy. Qazaqstan táýelsizdik alǵanda jergilikti ulttyń sany qyryq paıyzdan aspaǵan. Mundaı elderde alaǵaı da, bulaǵaı zaman bolǵanyn kóziqaraqty jandar jaqsy biledi. Osyndaı qıyn sátte Qazaqstandy mekendegen túrli etnos ókilderi táýelsizdiktiń ornyǵýyna bir kisideı eńbek etti. Olar yntymaqtyń yrysqa bastaıtynyn jaqsy biledi.
Baqtııar TAIJAN,
«Egemen Qazaqstan»
Qyzylorda oblysy
