Dóńgelek ústelde Úkimet basshysy Baqytjan Saǵyntaevpen qatar Qazaqstandaǵy Fransııa elshisi Fılıpp Martıne, Fransııa-Qazaqstan saýda-ónerkásip palatasynyń prezıdenti Jerar Frıes jáne palatanyń basqa da músheleri boldy.
Yntymaqtastyq kezdesý barysynda eki tarapqa da ózekti sanalatyn – aýyl sharýashylyǵy, agroónerkásip kesheni, bilim berý men bilikti kadrlardy daıyndaý jáne de «Sıfrly Qazaqstannyń» damýy máseleleri aıasyndaǵy taqyryptar talqylandy. Sondaı-aq Fransııa-Qazaqstan saýda-ónerkásip palatasynyń 2 jyldyq qyzmetiniń nátıjeleri aıtyldy.
«О́tken jyly Qazaqstan men Fransııa arasyndaǵy dıplomatııalyq qarym-qatynastyń 25 jyldyǵyn atap ótsek, bıyl elderimiz arasyndaǵy strategııalyq áriptestiktiń 10 jyldyǵy. Osy jyldar boıy Fransııa bizdiń dosymyz ári senimdi áriptesimiz bolǵany barynsha mańyzdy. Biz ekonomıka, bilim, ǵylym, bıznes, týrızm syndy birqatar baǵytta yntymaqtastyqtamyz. Búgin osy zalda Qazaqstanda jumys isteıtin fransýz bıznesiniń ókilderi otyr. Osy múmkindikti paıdalana otyryp, Qazaqstan Úkimeti sizderdi baǵalaıtyndyǵyn ári barlyq deńgeıde qoldaý kórsetetindigin atap ótkim keledi», dedi Qazaqstan Premer-Mınıstri dóńgelek ústel barysynda. Sonymen qatar ol Fransııa Qazaqstannyń Eýropadaǵy negizgi saýda áriptesteriniń biri ekendigin basa aıtty. «Búginde Qazaqstanda fransýz kapıtalynyń qatysýymen 140-qa jýyq birlesken kompanııa jumys isteıdi. Olardyń qatarynda Alstom, Airbus syndy iri kompanııalardyń ókilderi bar. Biz fransýz bıznesi Qazaqstanda ózin barynsha jaqsy sezingenin qalaımyz jáne bul baǵytta belsendi jumys júrgizip jatyrmyz», dedi B.Saǵyntaev. Úkimet basshysy qazirgi ýaqytta Fransııa azamattary Qazaqstanǵa vızasyz kele alatyndyǵyn, eki eldiń arasynda tikeleı áýe reısi ashylǵandyǵyn atap ótti. «Qazirgi ýaqytta Qazaqstan óz damýynyń óte qyzyqty ári qarqyndy kezeńinde tur. О́tken jyly ekonomıka ósimi 4 paıyzdy qurap, ónerkásiptiń turaqty ósimi tirkeldi. Biz osy oń dınamıkany saqtap, arttyrýǵa nıettimiz», dedi Úkimet basshysy.
Bıyl eki el arasynda strategııalyq áriptestik ornaǵanyna 10 jyl. Bul áriptestik 2008 jyly Qazaqstan Prezıdenti Nursultan Nazarbaevtyń Fransııaǵa resmı saparynyń nátıjesinde qol qoıylǵan sharttan bastaý alǵan edi. Negizinen eki el arasyndaǵy jańa formattaǵy kezekti damý órisi 2000-shy jyldardyń basynda bastaldy. Sonyń nátıjesinde búgingi tańda Fransııa elimizde kólemi boıynsha úshinshi iri ınvestor-memleket bolyp sanalady.
Dınara BITIK,
«Egemen Qazaqstan»
