Sýretterdi túsirgen Dmıtrıı Franchýk
Shyǵys Qazaqstan lıngvıstıka ortalyǵy dırektorynyń mindetin atqarýshy Elvıra Erkinbekqyzynyń aıtýynsha, 26-28 sáýir kúnderi ótip jatqan testileýge О́skemen, Semeı, Rıdder, Kýrchatov qalalary men Aıagóz, Besqaraǵaı, Borodýlıha, Glýbokoe, Zyrıan, Katonqaraǵaı, Kókpekti, Tarbaǵataı, Shemonaıha aýdandarynan 5358 adam qatysyp, onyń 1186-sy sertıfıkat alýǵa yqylas tanytypty. «Elbasynyń Jarlyǵymen bekitilgen tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasynda QAZTEST júıesine basymdyq berilgen. QAZTEST - el azamattarynyń memlekettik tildi meńgerý deńgeıin baǵalaıtyn birden-bir júıe. Bizdiń oblysymyz joǵaryda atalǵan memlekettik baǵdarlamadaǵy mindetterdi júzege asyrýǵa belsene qatysyp keledi. Testke qatysýǵa nıet bildirgen azamattarǵa til oqytý ortalyqtary tarapynan testtiń qurylymy men mazmuny jáne testilenýshilerge qoıylatyn talaptar jóninde jan-jaqty túsindirilip, tolyq aqparat berilgen», - deıdi ol.
QAZTEST júıesi boıynsha test tapsyrýǵa nıetti adamdardyń sany da jyl saıyn artyp keledi. «Atalǵan testileý tek otandastarymyzǵa ǵana emes, Qazaqstanda jumys istep júrgen shet el azamattaryna da memlekettik tildi meńgerýge septigin tıgizedi. QAZTEST arqyly 2020 jylǵa qaraı memlekettik tildi biletinderdiń úlesin 95 paıyzǵa jetkizý kózdelgen», - deıdi Ulttyq testileý ortalyǵynyń qyzmetkeri Sábıra Sapına.
Testileýge qatysqan adamdar da óz kezeginde QAZTEST júıesiniń mańyzdylyǵyn atap ótti. «Mundaı testileýge alǵash ret qatysyp otyrmyn. О́z basym eshqandaı qıyndyqty sezingen joqpyn. Aýdıo, leksıka-grammatıka jáne oqý sekildi úsh tapsyrmadan turatyn dıagnostıkalyq testileýdi tapsyrdym. Bolashaqta QAZTEST júıesi boıynsha sertıfıkat alǵym keledi. Árbir qazaqstandyq memlekettik tildi qanshalyqty dárejede biletinin árkez tekserip otyrǵany jón. Bul – bizdiń azamattyq paryzymyz», - deıdi О́skemen qalasynyń turǵyny, jergilikti ońaltý ortalyǵynyń psıhology Álibı Ryspaev. Al oblystyq Ishki ister departamenti qyzmetkeri Janar Ábdiqalyqova bul shara memlekettik tildiń qoldaný aıasyn keńeıtetin mańyzdy qadamdardyń biri dep sanaıdy. «О́zim memlekettik qyzmetker retinde birinshi ret osy testti tapsyrdym. Bul tek memlekettik qyzmetkerlerge ǵana emes, barsha qazaqstandyqtarǵa qajet, máni zor shara dep bilemin. Osy rette ózimniń áriptesterimdi, el azamattaryn memlekettik til mártebesin kóterýge shaqyramyn. Ana tilimizdiń tuǵyrynyń bıiktigi – elimizdiń, memleketimizdiń tuǵyrynyń bıiktigi. Memlekettik tildi bilmeıtin azamattar tilimizdi úırense deımin. Buǵan elimizde til úırenýge tolyq jaǵdaı jasalǵan. Testileý de sonyń bir aıǵaǵy dep oılaımyn», - deıdi ol.
Azamat QASYM,
«Egemen Qazaqstan»
О́SKEMEN
