Búgingi tańda Atyraý oblysynda mánerlep syrǵanaýmen 3 jastan 14 jasqa deıingi balalar aınalysýda – barlyǵy 60-qa jýyq adam, kóp bóligi qyz balalar. Atyraýlyq mánerlep syrǵanaýshylar respýblıkalyq týrnırlermen qatar, halyqaralyq týrnırlerdiń jeńimpazdary. Denıs Tenniń Atyraýǵa kelýi jas sportshylardyń jańa jeńisterge umtylýyna serpin bolady jáne Atyraý oblysynda osy qysqy sport túriniń damýyna septigin tıgizedi.
- Balalar Denıstiń kelýin asyǵa kútti, sheberlik saǵatynda onyń barlyq qoıylymdaryn kórdi. Endi olar jańa jetistikter men jeńisterge umtylýǵa yntalanady,- deıdi jas syrǵanaýshylardyń biriniń anasy Vıktorııa Lı.
Sport jáne dene shynyqtyrý basqarmasynyń basshysy Azamat Bekettiń aıtýynsha, Atyraýǵa Sochıdaǵy Olımpıada oıyndarynyń qola júldegeriniń kelýi úlken mártebe.
-Sońǵy ýaqytta bizdiń óńirde sportpen shuǵyldanýǵa, jaýyngerlik ónerge kóp kóńil bólinýde. Qysqy sport túrlerine de nazar aýdaratyn kez keldi, atap aıtqanda Atyraý oblysynda qarqyndy damyp jatqan mánerlep syrǵanaý sportyna,- deıdi Azamat Beket.
Denıs Tenniń ózi atyraýlyq mánerlep syrǵanaýshylardyń daıyndyqtaryn joǵary baǵalap, sheberlik saǵatynyń Atyraý oblysyndaǵy osy sporttyń damýyna úlken úles qosatynyna sendirdi.
- Birinshi kezekte oblys basshylyǵynyń sportty, sonyń ishinde mánerlep syrǵanaýdy damytýǵa qosqan úlesin erekshe atap ótý kerek. Balalarǵa sapaly jattyǵý jumystary úshin barlyq jaǵdaı jasalǵan – jaqsy muz jabyndysy bar zamanaýı Muz saraıy, sonymen qatar tájirıbeli jattyqtyrýshylar bar. Atyraýdaǵy mánerlep syrǵanaýdyń bolashaǵy zor dep oılaımyn,- deıdi Denıs Ten.
