Jıynǵa eldiń barlyq óńirinen kelgen Assambleıa músheleri men ardagerleri, etnomádenı birlestikterdiń tóraǵalary, Parlament depýtattary, Úkimet músheleri, ortalyq jáne jergilikti atqarýshy organdardyń, saıası partııalardyń, dinı birlestikterdiń, úkimettik emes uıymdardyń basshylary, shyǵarmashylyq jáne akademııalyq zııaly qaýym ókilderi men buqaralyq aqparat quraldarynyń jetekshileri qatysty.
Sessııany ashqan Memleket basshysy Qazaqstan halqynyń Assambleıasy elimizdegi beıbitshilik pen turaqtylyqtyń basty kepili retinde mańyzdy ról atqaratynyn atap ótti.
– Qazaqstan san qyrly jańǵyrýǵa bet burǵan qazirgi tańda Assambleıaǵa da tyń mindetter júkteldi. Men naýryz aıynda áleýmettik jańǵyrý jolyndaǵy «Prezıdenttiń bes bastamasyn» usyndym. Onyń tabysty júzege asýy azamattardyń óz bolashaǵyna, memleketine, qoǵamyna, qala berdi bir-birine senimin arttyrady, – dedi Elbasy.
Qazaqstan Prezıdenti áleýmettik birlik saıasaty birtutas ult qalyptastyrý jolyndaǵy mańyzdy qadam bolyp sanalatynyn aıtty.
– Biz syrtqy jaǵdaılarǵa qaramastan, bes jańa jobany júzege asyrýdy bastadyq. Bul qarjymyzdyń jáne resýrstarymyzdyń kóptigine baılanysty bolyp otyrǵan joq. Kerisinshe, qazaqstandyqtardyń turmysyn jaqsartýǵa tyń serpin berýdi kózdegen shynaıy nıetimizge baılanysty iske asýda, – dedi Nursultan Nazarbaev.
Memleket basshysy «Bes áleýmettik bastamany» iske asyrýdyń negizgi úsh faktoryna toqtalyp, elimizdiń áleýmettik saıasatynyń basty erekshelikterin atap ótti.
Elbasy Qazaqstan qoǵamynyń birligin odan ári nyǵaıtý qajettigine aıryqsha toqtaldy.
– HHI ǵasyr áleýmettik, ekologııalyq, tehnogendik sııaqty jahandyq qaýip-qaterler eshqaıda joıylyp ketpeıtinin kórsetip otyr. Árkim óz bolashaǵyna ózi jaýap beretin ózgeshe kezeń kele jatyr, – dedi Qazaqstan Prezıdenti.
Sonymen qatar Nursultan Nazarbaev elimizde júzege asyrylatyn áleýmettik jobalardyń úsh qaǵıdatyn atap ótti.
Memleket basshysy «Bes bastama» qazirgi Qazaqstannyń eń mańyzdy bes áleýmettik problemasyn sheshýge baǵyttalǵanyn aıtty.
Elbasy áleýmettik bastamalardy iske asyrý úshin jumsalatyn qarajat Qazaqstan qoǵamynyń bolashaǵyna arnalǵan tikeleı ınvestısııa bolyp sanalatynyn atap ótip, Qazaqstan halqy Assambleıasyna birqatar jańa mindetter júktedi.
Sońynda Nursultan Nazarbaev halyqtyń birligin jańarǵan Qazaqstandy órkendetýdiń basty sharty dep atap, el turǵyndaryn alda kele jatqan Qazaqstan halqynyń birligi kúnimen quttyqtady.
Sessııa barysynda Vıtalıı Iono Tvarıonas pen Islambek Tóleýbaıuly Saljanov Qazaqstan halqy Assambleıasy Tóraǵasynyń orynbasarlary bolyp taǵaıyndaldy.
Sessııa sońynda Qazaqstan halqy Assambleıasynyń úndeýi qabyldandy. Onda Assambleıa Qazaqstan halqyn áleýmettik memlekettiń jáne ulttyq ál-aýqatty arttyrýdyń jańa modelin birge qurýǵa shaqyrdy.
