Elimizde tuńǵysh ret Qazaqstan Respýblıkasynyń basketboldan ulttyq stýdenttik lıgasy, «Jas Otan» Jastar qanaty jáne QR Ulttyq basketbol Federasııasynyń qoldaýymen ótken chempıonat eki kezeńnen turdy. Alǵashqy aınalymda ótken jyldyń qazan aıynan bastap aımaqtar boıynsha «Ortalyq», «Almaty», «Ońtústik», «Soltústik», «Shyǵys», «Batys» dıvızıondary qurylyp, 30-dan astam stýdenttik top ózara saıysqa tústi. Nátıjesinde, Almaty qalasyndaǵy fınalǵa 16 erler jáne 8 qyzdar toby ótti.
Chempıonatty ótkizýdegi maqsat – jastar arasynda salaýatty ómir saltyn ustanýdy dáripteý, elimizde basketbol oıynyn keńinen taratý jáne joǵary oqý oryndarynyń komandalaryna qoldaý kórsetý. Aqtyq kezeńde úzdik oıyn kórsetken top mamyr aıynda Máskeýde ótetin ISBC Halyqaralyq Kýbogyna qatysady. Elimizdiń stýdentteri basketboldan halyqaralyq týrnırde alǵash ret baq synamaq. Álemniń 12 elinen kelgen eń úzdik oıynshylarmen jarysqa túsedi. Týrnırge jaqyn jáne alys shetelderden Reseı, Ispanııa, Serbııa, Latvııa jáne Gresııa quramalary qatysady.
– Chempıonat stýdentter arasynda úlken básekelestik týdyrdy. Chempıonattyń qazaq basketboly tarıhynda stýdentter arasynda alǵash ret ótkenin atap aıtý kerek. Joǵary oqý oryndarynyń stýdentteri óz komandalaryna keremet qoldaý kórsetti. Stýdentter lıgasy basketbol sport túriniń elimizde, ásirese jastar arasynda keńinen tanylýyna yqpal etedi, – dep atap ótti «Jas Otan» Jastar qanatynyń tóraǵasy Danııar Súndetbaev.
Qyzdar Ýnıversıtetiniń stýdentterinen quralǵan komanda alǵashqy aınalymda M.H. Dýlatı atyndaǵy Taraz memlekettik ýnıversıteti, KEÝK, Narhoz ýnıversıtetiniń toptarynan basym túsip jartylaı fınalǵa joldama aldy. Al, jartylaı fınalda Pavlodar memlekettik pedagogıkalyq ýnıversıtetiniń quramasynan aılasyn asyryp, fınalda ál-Farabı atyndaǵy Qazaq Ulttyq ýnıversıtetiniń sportshylaryn 57:51 esebimen oısyrata jeńdi. Jeńimpazdar arnaıy kýbokpen jáne 1 mıllıon teńge kólemindegi qarjylaı syılyqpen marapattaldy.
