Otyrysta M.Áshimbaev Elbasynyń partııa qyzmetin jańǵyrtý jónindegi tapsyrmasy boıynsha qolǵa alynǵan partııalyq jobalarǵa keńinen toqtaldy.
Aıta keteıik, partııa jumysyn tyńǵylyqty saraptaýdyń jáne halyq tarapynan kelip túsken usynystardyń nátıjesinde 20-dan astam partııalyq joba daıyndaldy. Olardyń qatarynda jumysy qaıta jandandyrylǵan «Ardagerlerdi ardaqtaıyq» jáne «Kedergisiz keleshek» atty eki joba da bar.
Jıyndy ashqan «Nur Otan» partııasy Tóraǵasynyń birinshi orynbasary atalǵan tyń bastamalardyń basym baǵyttaryn sóz etti. Onyń aıtýynsha, jańa partııalyq jobalar uıymǵa degen senimdi kúsheıtýge, elimizdegi strategııalyq baǵdarlamalyq qujattardy júzege asyrýǵa júıeli túrde qatysýǵa, bilikti kadrlar tobyn qalyptastyrýǵa jáne partııa qyzmetin jańǵyrtyp, onyń jumysyna zamanaýı tehnologııalardy qoldanýǵa baǵyttalǵan.
Partııa Tóraǵasynyń birinshi orynbasary jańa jobalardyń barlyǵy Elbasynyń partııa qyzmetin jańǵyrtý jónindegi naqty tapsyrmasy boıynsha daıyndalǵanyn atap ótti. Sonyń nátıjesinde aldaǵy ýaqytta «Nur Otan» partııasynda alǵash ret jobalyq menedjment tájirıbesi qoldanylmaq. Bul tájirıbeniń álemdik deńgeıde aıasy keń. Sol arqyly partııanyń Ortalyq apparaty men barlyq fılıaldarynyń jumysy júıelenetin bolady. О́z sózinde M.Áshimbaev nurotandyqtar atalǵan bastamalardy dereý júzege asyryp qana qoımaı, kóp uzamaı olardyń nátıjesin de kórsetýi kerektigin aıtty. Sondaı-aq «Nur Otan» partııasy Tóraǵasynyń birinshi orynbasary «Sıfrly Qazaqstan» baǵdarlamasy aıasynda qolǵa alynǵan jobalarǵa da erekshe nazar aýdardy.
Jıynda shaǵyn jáne orta bıznesti qoldaýǵa baǵyttalǵan bastamalardy júzege asyrýdyń tıimdi tetikteri de sóz boldy. Atap aıtqanda, «Nur Otan» Biryńǵaı geoaqparattyq onlaın-qyzmet kórsetetin portal qurýdy josparlap otyr. Sol arqyly qazaqstandyq kásipkerler satylatyn nemese jalǵa beriletin kommersııalyq maqsattaǵy jer telimderi týraly jan-jaqty málimetterge qol jetkizbek.
Mektep ashanalary men sport alańdarynyń jumysy da partııa nazarynan tys qalǵan joq. Sondyqtan jańa partııalyq jobalar arqyly bul áleýmettik nysandardyń da jumysy jandanyp, zaman talabyna saı qyzmet kórsetpek. Partııanyń bastamasymen «Rýhanı jańǵyrý» baǵdarlamasy aıasynda elimizdegi kitaphanalar zamanaýı bilim ortalyǵy retinde qaıta qurylyp, kitap qorynyń elektrondy nusqalary daıyndalatynyn da atap ótken jón.
Otyrysta partııa hatshysy Tamara Dúısenova atalǵan jobalardy júzege asyrýdyń biryńǵaı algorıtmi týraly aıtty. Partııalyq jobalar «Sıfrly Qazaqstan», «Rýhanı jańǵyrý» sııaqty mańyzdy baǵdarlamalardy júzege asyrýǵa jáne shaǵyn jáne orta bıznesti qoldaýǵa baǵyttalǵan. Soǵan oraı partııa memlekettik jáne jergilikti atqarýshy organdarmen, «Atameken» UKP jáne úkimettik emes uıymdarmen birlesip jumys istemek.
Jıyn barysynda «Tegin 1000 IT-synyp» partııalyq jobasyn júzege asyrýdyń tıimdi tetikteri, osy joba aıasynda jylyna 150 myń qazaqstandyq mektep oqýshysy eýropalyq bilim berý tásilimen baǵdarlamalaý men robot tehnıkasynyń negizderin úırenetini, sondaı-aq IT-ortalyqtar bazasynda jylyna 35 myń qazaqstandyq aqparattyq tehnologııa salasynda bilim alyp, álemdik naryqta jumys isteýge múmkindik alatyny aıtyldy.
Jıynda óńirlerden kelgen ókilder de sóz alyp, jańa bastamalardyń shyn máninde aıasy keń ekenin, sondyqtan kúsh biriktirip jumys isteý kerektigin sóz etti.
Shara sońynda M.Áshimbaev barsha memlekettik jáne jergilikti atqarýshy organ ókilderiniń nazaryn jańa jobalardy júzege asyrýdyń basym baǵyttaryna aýdardy. Sondaı-aq ol barsha nurotandyqtarǵa Elbasy aıqyndap bergen mindetterdi abyroımen oryndap, kózdegen maqsattarǵa qol jetkizý úshin tynbaı eńbek etý kerektigin aıtyp, naqty tapsyrmalar berdi.
Joldybaı BAZAR,
«Egemen Qazaqstan»
