Astanada Táýelsizdiktiń 20 jyldyǵyna arnalǵan respýblıkalyq aqyndar aıtysy ótti. Ata-babadan asyl muranyń ardaqtysy bolyp jetken óreli ónerdi keıingi urpaqqa amanat etý, sóz óneriniń asyly aıtys arqyly tilimizdiń mártebesin arttyrýdy maqsat etken alaman báıge elorda tórinde úsh kúnge sozylyp, sheshendiktiń qadyr-qasıetin ardaq tutatyn kópshiliktiń qurmetine bólendi.
Mádenıet mınıstrliginiń qoldaýymen, «Samuryq-Qazyna» ulttyq ál-aýqat qorynyń demeýshiligimen ótken bul alaman báıgege elimizdiń bar aımaǵynda bolyp ótken jarystardan iriktelgen 42 aqyn qatysty. Sondaı-aq, bul sharaǵa irgedegi Qytaı, Mońǵolııa, Qyrǵyzstan, О́zbekstannan da aıtysker qandastarymyz qatysyp, óz ónerlerin órge ozdyrdy.
Elimizge tanymal qoǵam qaıratkerleri Myrzataı Joldasbekov, Seıit Qasqabasov, Asanáli Áshimov, О́mirzaq Aıtbaev, Farıza Ońǵarsynova, Bekbolat Tileýhan, Nesipbek Aıtuly tórelik etken qazylar alqasynyń sheshimimen bas báıge Qytaı Halyq Respýblıkasynan kelgen qandasymyz Jámıǵa Dáýletke buıyryp, oǵan tıesili 20 myń dollardy Mádenıet mınıstrliginiń jaýapty hatshysy Janna Qurmanǵalıeva tabystasa, I oryndy (bir jarym mıllıon teńge) Aqmola oblysynan saıysqa túsken jas qyran Álibek Serǵalı ıelendi. Al eki II oryndy (bir mıllıon teńgeden) qyzylordalyq Muhtar Nııazov pen astanalyq Erkebulan Qaınazarov qanjyǵasyna baılasa, úsh III oryn (bes júz myń teńgeden) Qyrǵyz Respýblıkasynan qatysqan Aaaly Tutqyshev pen Almaty jáne Astana aıtyskerleri Sara Toqtamysova men Aınur Tursynbaevaǵa buıyrdy.
Árıne, ózge de aıtysker aqyndar kádesiz qalǵan joq. Aqyn Farıza Ońǵarsynova Qytaıdan kelgen qos sińlisine óziniń «Daýa» atty kitabyn syılasa, «Egemen Qazaqstan» respýblıkalyq gazeti» AQ prezıdenti Saýytbek Abdrahmanov Baıqońyr qalasynyń aqyny Tóreǵalı Tóreálige arnaıy syılyǵyn tabystady. Al qazylar alqasynyń tóraǵasy Myrzataı Joldasbekov bolsa, Qytaı Halyq Respýblıkasy men Qyrǵyz Respýblıkasynan osy aıtysqa arnaıy kelgen ókilderge shapan jaýyp, syı-qurmet kórsetti. «Altyn qyran» kompanııasynyń basshysy Islambek Saljanov Mádenıet mınıstrliginiń úlgisimen alaman báıgege qatysqan barlyq aıtyskerlerge óz syı-sııapatyn jasady.
Bul aıtystyń bir ereksheligi – kórshi elderden de qandas baýyrlastar qatysyp, aıtystyń elaralyq sıpat alǵany boldy. Iá, bir ǵana Qytaıdan tórt, Mońǵolııa men Qyrǵyzstannan eki-ekiden saıypqyrandar ónerlerin ortaǵa salǵan bolsa, Qytaıdan kelgen Jamıǵa Dáýlet bas júldege ıe bolyp, ata-jurtynyń rızashylyǵyna bólendi.
Aıtystaǵy Balǵynbek Imashev, Aınur Tursynbaeva, Dáýletkereı Kápuly, Amanjol Áltaev, Serikzat Dúısenǵazın sekildi elge tanymal tarlanbozdardyń jóni bir bólek bolsa, bul joly Álibek Serǵalı, Muhtar Nııazov, Erkebulan Qaınazarov sııaqty jalyndaǵan jas periler báıge kórigin qyzdyryp, el-jurtty rıza etti. Muny elimizdegi týǵan tilin tórge ozdyrǵan Táýelsizdiktiń birden-bir kórinisi, kún ótken saıyn óz muratyna jetip kele jatqan ana tilimizdiń máýeli jemisi deýge bolady.
Berik SADYR.
––––––––––––––––––––––
Sýretterdi túsirgender Qaıyrbek MUQYShEV,
Sovetbek MAǴZUMOV.
