Maǵan senbeseńiz, Montaıǵa kelip kórińizshi; Dosqara kókemniń aıaq-qoly balǵa... jo-joq, jaı balǵany aıtaıyn dep otyrǵanym joq, naǵyz kýál (kývalda) balǵadaı. Tula boıy qum toltyrǵan qap sekildi – qap-qatty, shyp-shymyr. Al júgirgen kezde, onyń shańyna ózińiz turmaq, kózińiz de ilese almaı qalady.
Fýtbol alańynda qarsylastaryn erejege saı ıyqpen qaqqanda, keıbireýleri táltirektep, jıektegi syzyqtyń syrtyna shyǵyp ketip jatady. Onyń ústine shashy da buıra. О́ńi bolsa, qaratory. Bir sózben aıtqanda, álemge áıgili argentınalyq fýtbolshynyń bizdiń Montaıda týǵan bir úlgisi. Syńary. Áriptesi.
Sondyqtan Dosqara kókem fýtbol oınaǵanda aýzymyz ashylyp, kózimiz baqyraıyp, aıqaılap-shýlap naǵyz fanat jankúıerge aınalyp ketemiz. Ol da sony baıqap, keıde bizdiń kóńilimiz úshin bir aldap ótken qarsylasyn birneshe ret aldap, ártúrli fıntter jasap, esinen tandyryp ketedi. Ondaıda alań shetindegi jankúıerler máz bolyp, ishek-silesi qata kúlip, «áne, kórdiń be» degendeı bir-birin búıirden túrtip jatady.
Dosqara kókem áýeli kósheniń, sodan soń aýyldyń, sonsoń baryp, nebary on alty jasynda búkil keńshardyń qurama komandasynyń kapıtany boldy. Ol oınaǵan komandanyń sózsiz jeńetinine biz eshqashan da kúmándanbaıtynbyz.
Biraq sona-a-aý shóleıt dalanyń bir túkpirindegi alaqandaı aýyl – aınalaıyn Montaı – Argentına emes qoı. Sondyqtan onyń fýtbolynyń mynaý aıdaı álemge tanyla qoıýy qıyn. Sol sebepti Maradonaǵa buıyrǵan baqtyń Dosqara kókeme buıyrmasy da anyq...
Al ýaqyt, shirkin, kim-kimge de óz shartyn qoıady. Tamaq ishkiń kele me, eńbek et. Urpaq súıemin deısiń be, úılen. Shańyraq kóter. Bala-shaǵańdy asyra.
Mine, sony oryndaý úshin Dosqara kókem talaı-talaı jumystyń basyn shaldy. Dálirek aıtsaq, traktor aıdady, shóp shapty, mal baqty, qora tazalady. Tek fýtbol oınaýǵa murshasy, ýaqyty bolǵan joq.
Sebebi bizdiń Montaı, shynynda da, Argentına emes qoı.
Nurǵalı ORAZ,
«Egemen Qazaqstan»
