Jańa basshyny aýdan aktıvine oblys ákiminiń orynbasary Shalqar Baıbekov tanystyrdy.
Ashat Saıdahmetuly 1968 jyly 1 naýryzda Semeı oblysy Aqsýat aýdany Qyzyl Kesik aýylynda dúnıege kelgen.
1991 jyly Qaraǵandy memlekettik ýnıversıtetin «ekonomıst» mamandyǵy boıynsha bitirdi. Eńbek jolyn 1994 jyly Aqsýat aýdandyq qarjy bóliminiń kirister túsýin boljaý jáne ekonomıkalyq taldaý bóliminiń aǵa ekonomısinen bastaǵan. Keıin Tarbaǵataı aýdandyq qarjy bólimi meńgerýshisiniń orynbasary, bıýdjet bóliminiń bastyǵy qyzmetterin atqardy.
2002-2005 jyldar aralyǵynda Tarbaǵataı aýdandyq ekonomıka bóliminiń, keıin aýdan ákimi apparatynyń qarjy-sharýashylyq bóliminiń bastyǵy boldy. Eki jyl Tarbaǵataı aýdandyq ekonomıka jáne bıýdjettik josparlaý bóliminiń bastyǵy laýazymynda qyzmet etti.
2009 jyldyń jeltoqsanynda Kókjyra aýyldyq okrýginiń ákimi bolyp taǵaıyndaldy. Sońǵy 8 jylda Tarbaǵataı aýdany ákiminiń orynbasary qyzmetin atqarǵan. Osydan bir aı buryn burynǵy ákim Ramıl Saǵandyqov ShQO veterınarııa basqarmasynyń basshysy bolyp taǵaıyndalýyna baılanysty aýdan ákiminiń orny bos turǵan bolatyn.
