Osy oraıda ótken aptada Aqtóbede Aqtóbe oblysynyń ákimi Berdibek Saparbaevtyń bastamasy boıynsha ótkizilgen halyqaralyq forým alǵa qoıylǵan maqsatty oryndap shyqty deýge bolady. Oǵan álemniń ár túpkirinen myńnan astam sarapshylar qatysty. Bul rette onyń geografııasynyń keńdigi men aýqymdylyǵy, taıaý jáne alys shet elderdegi memlekettik organdar men bıznes ókilderiniń jáne úkimettik emes uıymdar qaaýymdastyǵynyń bastaryn qosýǵa túrtki bolǵany – forýmnyń basty artyqshylyǵy boldy. Forýmda Qazaqstan Izraıl, Túrkııa, Polsha, Grýzııa jáne Qyrǵyzstan elderinen kelgen áleýmettik salanyń janashyrlary utymdy usynystary men kóńilge qonymdy oı-pikirlerin ortaǵa saldy.
Halyqaralyq forýmnyń ashylýynda Eńbek jáne halyqty áleýmettik qorǵaý mınıctri M.E.Ábilqasymova sóz sóıledi. Sondaı-aq forýmda áleýmettik problemalardyń sheshimin oń sheshimin tabýyna septigi men kómegin tıgize alatyn kásipkerliktiń jańa baǵyttary men joldaryn izdestirý jáne ony álemdik trendterdiń tasqynyna sáıkestendirý ári álemdegi elderge ortaq halyqaralyq tájirıbeni odan ári baıyta túsý jóninde qundy oı-pikirler aıtyldy.
Aqtóbe aımaǵynda jyl saıyn áleýmettik kásipkerlik nysandar men memleket-jekemenshik áriptestigi aıasynda boı kótergen sándi de sáýletti áleýmettik qurylystar keńinen qanat jaıyp keledi. Onyń ústine bıylǵy jyly óńirdegi atqarýshy organdar men bıznes jáne kásipkerlik qurylymdar ókilderi, úkimettik emes uıymdar ÚEU qaýymdastyǵy bir jaǵadan bas, bir jeńnen qol shyǵara otyryp, áleýmettik máselelerdi sheshý men retteý isine jańa serpin berýge bir kisideı jumylǵan. Munyń ishinde bıyl iske asatyn «Analarǵa taǵzym» jáne «Baqytty bala» jobalarynyń shoqtyǵy bıik turǵany da ózge bir áńgimeniń sybaǵasy. Bir sózben aıtqanda oblysta halyqraralyq forýmǵa qatysýshylar nazar aýdara alatyndaı oń mysaldar mol, ári úırenýge turatyndaı úrdister de jetkilikti. Osy oraıda óńirdegi atalǵan nysandardy tanystyrý rásimi jáne semnarlar men jańa formattaǵy sheberlik klastary ótkizilgeni –halyqaralyq sıpattaǵy basqosýdyń mazmunyn odan ári kóterip, pishinin túrlendire túskeni anyq. Eki kúnge sozylǵan halyqaralyq forýmnyń qorytyndysynda tıisti qarar qabyldanyp, birqatar memorandýmdarǵa qol qoıyldy.
Temir Qusaıyn,
«Egemen Qazaqstan»
Aqtóbe
