Qazaqstandyq rýh

Uıymnyń jańa tóraǵalary qyzmetine senim uıalatyp otyr

Lıtva astanasy Vılnıýste ótip jatqan Eýropadaǵy qaýipsizdik jáne yntymaqtastyq uıymyna múshe memleketter Syrtqy ister mınıstrleri keńesiniń 18-shi otyrysy keshe óz máresine jetti. Elimiz Syrtqy ister mınıstri Erjan Qazyhanov bastaǵan qazaqstandyq delegasııa qatysqan keńes aıasynda kóptegen sharalar júzege asyryldy. Sondaı ıgi sharalardyń biri «Qa­zaq­stan – Baltyq elderi turǵyn­da­ry­nyń kózimen» dep atalǵan foto jáne sýret kórmesiniń ótkizilýi bol­dy. Mun­da 50-ge tarta tanymal jáne áýes­qoı fotosýretshilerdiń jáne mektep oqýshylarynyń týyndylary qoıy­lyp­ty. Sýretterde negizinen tabıǵat kórinisteri, qazaqtardyń turmys-tirshiligi beınelengen. Al mektep oqýshylarynyń sýretterinde qazaqtyń ulttyq oıý-órnekteri, Astana men Báıterek kórinis tapqan. Kórmede biz Lıtva Respýblıkasy Seı­mindegi Qazaqstan-Lıtva depýtattyq toby­nyń jetekshisi Edmýndas Pýpınısti jolyq­tyr­dyq. Ol óz sózinde Qazaqstan týraly biletin lıtvalyqtar qatary arta bastaǵanyn atap kórsetti. Myna kórmege qoıylǵan sý­ret­terdiń kóptiginen osyny ańǵarýǵa bola­dy, degen ol osyndaı sharalardyń kóptep ót­kizilýi elder azamattarynyń bir-birin ta­nyp bilýde óte mańyzdy ekendigimen bólisti. Delegasııalar ótetin joldyń dálizine qoı­ylǵan kórmeni EQYU Is basyndaǵy tór­aǵasy, Lıtva syrtqy ister mınıstri Aýdronıýs Ajýbalıs ta arnaıy kelip tamashalady. Sondaı-aq kórmege qoıylǵan týyndylarmen elimiz Syrt­qy ister mınıstri Erjan Qazy­ha­nov bastaǵan qazaqstandyq delegasııa da kelip jaqyn ta­nysqandyǵyn aıta ketý kerek. Keńes otyrysy aıasynda Erjan Qazyha­nov BUU Bas hatshysynyń Aýǵanstandaǵy arnaıy ókili bolyp qaıta taǵaıyndalǵan Iаn Kýbıshpen kezdesý ótkizdi. Elimiz syrtqy saıa­sat vedomstvosynyń basshysy ózara áńgime ba­ry­synda osy eldegi qazirgi jaǵdaı jáne turaq­ty­lyqty qamtamasyz etý pers­pek­tıv­alaryn talqylady. Ásirese, Qazaq­stannyń BUU-men tyǵyz qatynasta áreket etýi mańyzdylyǵyna erekshe den qoıdy. Elimizde bıylǵy eginniń bitik shyǵýyna baı­lanysty Qazaqstan BUU-nyń Azyq-túlik jáne aýyl sharýashylyǵy uıymy men Búkilálemdik azyq-túlik baǵdarlamasy jelisi boıynsha Aýǵanstanǵa astyq pen janar-jaǵarmaı jetkizýge daıyn ekendigin bildirgen Erjan Qazyhanov osy oraıda onyń senimdi ári kedergisiz jetkizilýin qamatamasyz etýdiń mańyzyn ashyp kóretti. Sondaı-aq mınıstrdiń TMD-nyń Atqarý­shy hatshysy Sergeı Lebedevpen júzdesýi bol­ǵandyǵyn da aıta ketý kerek. Onyń ba­rysynda Máskeý qalasynda aldaǵy 20 jel­toqsanǵa josparlanyp otyrǵan TMD-nyń qurylýyna 20 jyl tolýyna oraı ótkiziletin sammıtke daı­yndyq  jaıy qaraldy. E.Qazyhanovtyń Estonııa syrtqy saıasat vedomstvosynyń basshysy Ýr­mas Paetpen kezdesýinde ekijaqty yn­tymaqtastyq máse­le­si, ásirese, Memleket basshysy N.Nazar­baev­­tyń 2011 jyldyń sáýirinde Tallınge jasaǵan saparynan keıin oń qarqyn alǵan­dyǵy oryndy ataldy. Sonymen qatar, qa­zaq-eston úkimetaralyq komıssııasy­nyń ma­ńyz­dy róli men ústimizdegi jyly Esto­nııanyń Astanada elshilik ashýy ekijaqty qarym-qatynastarda erekshe mańyzǵa ıe ekendigi  ortaǵa sa­lyndy. Erjan Qazyhanovtyń Lıtva Syrtqy ister mınıstri Aýdronıýs Ajýbalıspen kezdesýi kezinde ekijaqty jáne Eýropa Odaǵy men EQYU arasyndaǵy yntymaq­tas­tyqtyń jaı-japsary áńgime ózegine aınal­dy. Taraptar sondaı-aq Lıtva prezıdenti Dalıa Grıbaýskaı­te­niń Asta­naǵa saparynda joǵary deń­geı­degi qol jetkizilgen kelisimderdi júzege asyrý barysynda naqty ba­ǵyt­tar­dyń aıqyndalǵanyna qanaǵat­taný­shylyq bildirdi. EQYU máselesi Erjan Qazyha­nov pen Uıymnyń Bas hatshysy Lamberto Zannermen kezdesýinde jan-jaqty qozǵaldy. Osy rette Astanada qaýipsizdik jónindegi zertteý ınstıtýtynyń qurylýy múmkindigi de nazardan tys qalǵan joq. EQYU Parlamenttik Assambleıasynyń tór­aǵasy Petros Eftımıýmen júzdesýde de áńgime Uıym sheńberindegi ózara yqpal­das­tyq máselesine qurylǵandyǵyn aıta ketken jón. E.Qazyhanov EQYU PA tóraǵasyna Assambleıanyń elimizdiń 2010 jyly tór­aǵalyq etý barysynda qoldaý kórsetkenine rızashylyǵyn da jetkizýdi umytqan joq. Sondaı-aq, aldaǵy Parlament Májilisiniń saılaýy máselesi de sóz boldy. Uıym bul saılaýǵa EQYU PA qurmetti tóraǵasy Joao Soaresh bastaǵan qysqa merzimdi baıqaý­shylar mıssııasyn jibermekshi. Sonymen qatar, Vılnıýste Erjan Qazyhanovtyń Kıpr syrtqy ister mınıstri Erato Kozaký-Markýllıspen, ırlandııalyq áriptesi Eımon Gılmormen, Eýropa Odaǵynyń Ortalyq Azııa jónindegi arnaıy ókili Per Morelmen kezdesti. EQYU-ǵa múshe memleketter Syrtqy ister mınıstrleri keńesiniń 18-shi otyry­synyń qorytyndysy boıynsha baspasóz máslıhaty uıymdastyryldy. Ol týraly gazetimizdiń kelesi nómirinde áńgimelenetin bolady. Asqar TURAPBAIULY, «Egemen Qazaqstan» – Vılnıýsten.