Kollajdy jasaǵan – Amangeldi Qııas, «EQ»
Qalaı bastaldy?
Nurálı Ismaǵulov «Metaclinic.kz» ıdeıasy óz qajettiliginen týyndaǵanyn aıtady. Ol sozylmaly aýrýdyń saldarynan aýrýhanaǵa jıi baratyn bolypty.
Birde ol dárigerden: «Keıin túsinbegenimdi «WhatsApp» arqyly naqtylaýǵa bola ma?» dep suraıdy. Dáriger kelisedi. Biraq «Mundaıǵa aýrýhana ákimshiligi ruqsat etpeıdi», dep jaýap beredi. Iаǵnı keńes berýdiń ózi bar, biraq ol kóbine beıresmı, zańdy mártebesi anyq emes keńistikke kirip ketedi.
Osy áńgimeden keıin Nurálı «Eger adamdarǵa onlaın keńes kerek bolsa, ony nege zańdy ári júıeli qyzmetke aınaldyrmaımyz?» dep oılanady. Sebebi másele tek dáriger keńesiniń qoljetimdi bolýynda ǵana emes. Bul – pasıent qaýipsizdigi, dárigerdiń zań aldynda qorǵalýy jáne qyzmet sapasynyń bir standartqa túsýi degen sóz.
Jobany ol bıznes-seriktesimen birge bastaǵan. Ekeýi de kommersııalyq medısına salasynan. Nurálı sıfrlyq ónim jasaýǵa, marketıngke jáne bıznes qurýǵa jaýap beredi. Al áriptesi medısınalyq basqarý men klınıkalyq úderisterdi jolǵa qoıady. Sebebi olardyń óz oflaın klınıkasy da bar. Iаǵnı bul startap syrttan qarap jasalǵan ıdeıa emes, medısınanyń ishki jumysyn túsinetin adamdardyń praktıkalyq qajettiliginen týǵan joba. Sodan keıin startap «Astana Hub» qatysýshysy retinde tirkelip, júıeli damýǵa kirisken.
Qazir qaı kezeńde?
Qazir «Metaclinic.kz» – dárigerdiń onlaın-qabyldaýyn zańdy formatqa túsirgen sıfrlyq emhana retinde jumys istep tur. Servıs arqyly paıdalanýshy mamandy tańdap, yńǵaıly ýaqytqa jazylady, tólem jasaıdy, keıin dáriger qońyraý shalyp keńes beredi. Qajet bolsa, resmı medısınalyq qorytyndy da jiberiledi.
Jobanyń negizgi baǵyty eki arnaǵa súıenedi. Birinshisi – bir rettik konsýltasııa, ekinshisi – jazylym júıesi. Qoldanýshylar úshin eń qoljetimdi qyzmet retinde kezekshi terapevt nemese pedıatrdyń 15 mınýttyq keńesi 1000 teńgege usynylady. Mundaı konsýltasııaǵa jazylǵannan keıin dárigerler ádette 10 mınýttyń ishinde baılanysqa shyǵady. Al basqa mamandardyń onlaın-qabyldaýy dárigerdiń baǵyty men tájirıbesine qaraı orta eseppen 5–10 myń teńge aralyǵynda.
«Bizdiń dárigerlerdiń shamamen tórtten biri – dekrettegi áıelder. Olar klınıkaǵa kúnde baryp jumys isteı almaıdy. Biraq biliktiligin de, tabysyn da joǵaltqysy kelmeıdi. Sondyqtan qashyqtan keńes berý formaty olar úshin óte yńǵaıly. Keıbir mamandar aptasyna nebári bir-aq saǵat ýaqyt bóledi. Mysaly, eki ret 30 mınýttyq qabyldaý qoıyp, onlaın keńes berip otyrady. Jumys barysynda bizdi erekshe qýantqan jaǵdaılar da boldy. Sonyń biri – alys aýylda turatyn egde jastaǵy dáriger. Platformaǵa qosylǵannan keıin ol bir aıdyń ishinde tabysyn eki ese arttyrdy. Bul jaı ǵana statıstıka emes. Ol kisi arnaıy habarlasyp, alǵysyn aıtty. Mundaı mysaldar bizdi shabyttandyrady. О́ıtkeni servıs jas mamanǵa ǵana emes, jasy úlken dárigerge de túsinikti, qoldanýǵa jeńil ekenin kórsetedi», deıdi Nurálı Ismaǵulov.
«Metaclinic.kz» jumysynda eń basty talap – zańdylyq pen sapa baqylaýy. Platformaǵa kez kelgen dáriger qosyla salmaıdy. Aldymen qatań tekseris júrgiziledi. Olardyń dıplomy qaralady, sertıfıkatynyń jaramdylyǵy resmı derekkózder arqyly anyqtalady, qujattar rásimdeledi. Budan keıin dáriger oqytý kezeńinen ótedi. Tek standarttarǵa saı bolǵan maman ǵana pasıent qabyldaýǵa kirisedi. Komanda «lısenzııasy joq mekememen» jáne «sertıfıkaty eskirgen dárigermen» jumys istemeıtinin ashyq aıtady.
Búginde júıede shamamen 370 dáriger tirkelgen. Onyń 100–150-i kún saıyn belsendi qabyldaý júrgizedi. Osy ýaqytqa deıin platformany 3 myńnan astam pasıent paıdalanǵan.
Endigi meje qandaı?
«Metaclinic.kz» komandasy endigi kezeńde ónimdi keńeıtýdi jáne servısti úlken júıelermen biriktirýdi basty maqsat etip otyr. Sonyń biri – dárigerge jáne pasıentke arnalǵan eki bólek mobıldi qosymsha jasaý. Tájirıbe kórsetkendeı, dárigerlerge veb-nusqa árdaıym yńǵaıly bola bermeıdi. Kóp mamanǵa qabyldaýdy telefonnan júrgizý jeńil. Sondyqtan komanda ýaqytsha beıimdelgen nusqamen shektelmeı, tolyqqandy jeke qosymsha ázirleýdi josparlaǵan.
«Bizdiń baıqaǵanymyz – adamdardy onlaın medısınaǵa ákeletin basty sebep qashyqtyq emes, ýaqyt tapshylyǵy. Alǵashynda negizgi faktor aýyl men qala arasy, joldyń alystyǵy bolady dep oıladyq. Biraq derekter kerisinshe shyqty. Klıentterimizdiń basym bóligi – qala turǵyndary. Emhanasy bar, dárigeri bar. Biraq keptelistiń, qarbalas jumystyń saldarynan qala turǵyndarynda ýaqyt tyǵyz. Adam aýyrǵan kezde oǵan dál sol sátte jyldam keńes kerek. Onlaın-qabyldaý osy suranystyń qajettiligin óteıdi», deıdi joba jetekshisi.
Ekinshi úlken baǵyt – seriktestik arqyly ósý. Komanda servısti tek jeke saıt retinde emes, iri ekojúıelerdiń ishine kiretin ónim retinde qarastyrady. Budan bólek, fıtnes ındýstrııasyndaǵy iri kompanııamen kelissóz bastalǵan. Mundaı áriptestik «Metaclinic»-tiń aýdıtorııasyn keńeıtip qana qoımaı, medısınalyq keńesti basqa qyzmettermen biriktiretin jańa ónimderge jol ashýy múmkin.
Úshinshi maqsat – jańa naryqty baıqap kórý. Komanda jaqyn ýaqytta О́zbekstan naryǵynda qanatqaqty joba jasaýdy josparlap otyr. Bul bastama syrttan usynys retinde kelgen. Degenmen negizgi nazar ázirge el ishinde qala beredi. Komanda aldymen ishki naryqta ósip, qyzmettiń sapasyn kúsheıtip alýdy mańyzdy sanaıdy.
Tórtinshi, eń kúrdeli maqsat – jasandy ıntellektini sapany baqylaýǵa paıdalaný. Komanda JI-dy «dárigerdiń ornyna» emes, dáriger sheshimderin klınıkalyq hattamalarmen salystyratyn kómekshi retinde qarastyrady.
«Qaı baǵytta óssek te, biz úshin eń mańyzdysy – «Metaclinic» arqyly pasıent alatyn medısınalyq kómektiń sapasy. Sondyqtan qazir dárigerdiń qabyldaýyn jasandy ıntellekt kómegimen qosymsha baqylap kórýge kiristik. Júıe dáriger qabyldaǵan sheshimderdi ulttyq klınıkalyq hattamalarmen jáne halyqaralyq usynymdarmen salystyrady. Iаǵnı JI «dárigerdiń ornyna» sheshim shyǵarmaıdy. Ol tek qabyldaýdyń talapqa saı ekenine nazar aýdaryp, sapany turaqty deńgeıde ustaýǵa kómektesetin kómekshi qural bolady», deıdi Nurálı Ismaǵulov.
