– Atyńyz tipti erekshe eken! – dep jatyrmyz aýyl mektebine kelgenimizde.
– Iá, sábı kúnimnen bastap, búgingi boıjetken shaqta da bárin tańǵaldyrǵan atym meniń osyndaı! – deıdi mektep dırektory Olımpıada Dosymjanqyzy.
Ákesi Dosymjan Bısmılláıuly 1942 jyly osy Aqjar aýylynda, anasy Nazym Qojabaıqyzy 1951 jyly Lebıaji aýdanyndaǵy Zor Oktıabr degen aýylda ómirge kelipti. Al úlken atalary Bısmılláı atyna zaty saı dinine berik, aýyldyń moldasy bolǵan eken. Dosymjan aǵamyzdyń mamandyǵy qarjyger, eńbek jolynda býhgalter, bas ekonomıst, sovhoz dırektorynyń orynbasary, keıin aýyldyń ákimi bolyp zeınetkerlikke shyǵypty. Maı aýdanynyń qurmetti azamaty. Anasy Nazym apaı Aqjardyń mektebinde 35 jyl boıy muǵalimdik qyzmetin atqarypty.
– Áke-sheshem ekeýi de zeınetker. Kúni búginge deıin Aqjar aýylynda turady. Jaıly jer izdep qalaǵa kóshken joq. Aýyldyń úlkenderiniń qatarynda el ishinde, bala-shaǵa ósirip, nemereleriniń ortasynda otyr, – deıdi Olımpıada.
Dosymjan aǵa men Nazym apaı Erjan, Altynjan, Rashıd, Rahat, Narıman, Nysana, Dınara jáne Olımpıada dep at qoıǵan 8 balany ómirge ákelipti. Qazir alty balasy aman-esen. Erjan men Narıman aýylynda «Aǵaıyndylar» sharýa qojalyǵyn basqarady. Rahat saýda salasynda, Nysana zańtaný magıstri, Dınara fılologııa ǵylymdarynyń kandıdaty, dosent, Astanada qyzmet etedi.
Al Olımpıada bolsa, 1998 jyly oblys ortalyǵyndaǵy pedagogıkalyq kolledjdi, 2001 jyly ýnıversıtetti bitirip týǵan aýyly Aqjarǵa oralady. Anasynyń ustazdyq jolyn jalǵastyryp, muǵalim mamandyǵyn tańdaıdy.
– Aıtyńyzshy, atyńyzdy kim qoıdy?
– Men 1980 jyly 12 qańtarda týdym. Atymdy 1980 jylǵy Máskeýde ótken Olımpıadanyń qurmetine arnap ákem qoıǵan. Anama da unap, ekeýi kelisip solaı ataǵan eken. О́zime de unaıdy. Mektepte oqyp júrgende, stýdent bolǵanda, ol kezde ınternet joq, kitaphanalarǵa baryp Máskeý Olımpıadasy týraly materıaldardy túgel qarap, oqyp shyqtym. Stýdent kezimde ózińiz aıtqandaı, barlyǵy tańǵalatyn. Leksııada bolmaı qalsam, «Olımpıada degen qyz qaıda?» dep birden suraıdy eken, – deıdi Olımpıada.
– О́zińdi úıde jáne dostaryń erkeletip qalaı ataıdy?
– Olıko deıdi!
Iá, bul kúnde Olımpıada basqaratyn Aqjar orta mektebi de elimizdegi bilim berý salasyndaǵy ózgeristerge saı jańartylǵan mazmunǵa kóshýde. Keń jolaqty ınternet júıesine qosylǵan. Informatıka pánin eksperıment retinde aǵylshyn tilinde kýrstar ótkizilýde. Mektepte «Dıplommen – aýylǵa!» baǵdarlamasy boıynsha Aına Myńjasarova, Gúljan Jaılaýbaevalar kelip qyzmet etýde.
– О́zińiz sportty jaqsy kóresiz be?
– Árıne jaqsy kóremin. Sport meniń ómirimde, janymda júr ǵoı! Basqa elde, ózimizdiń elde Olımpıada bolady, daıyndyq júrýde, bastaldy dese erekshe bir sezimde júremin. Júrek lúpildep, ózgeshe kúı keshemin. Tolqyp kózime jas keledi. О́ıtkeni men Olımpıada, sportshylarmen birgemin ǵoı! Keshki ýaqytta teledıdardan sport habarlaryn jıi-jıi kórgim-aq kelip turady. О́kinishke qaraı, ýaqyt bola bermeıdi. Ákem de, aǵalarym da, joldasym Baýyrjan da qazaqsha kúres, boks, bıatlon sııaqty sport túrlerin súısinip tamashalaıdy. Uldarym Asyl men Ádilet kórshi Kýrchatov qalasyndaǵy sport mektebinde qazaqsha kúreske qatysady, – deıdi Olımpıada.
Farıda BYQAI,
«Egemen Qazaqstan»
Pavlodar oblysy,
Maı aýdany,
Aqjar aýyly
