Dóńgelek ústel formatynda ótken kezdesý barysynda ekonomıkalyq damýdyń jáne saýda qatynastarynyń jahandyq úrdisteri, «jasyl» ekonomıkaǵa kóshý, balamaly energııa kózderin paıdalaný, Qazaqstannyń kólik-tranzıt áleýetin damytý jáne ekonomıkany sıfrlandyrý máseleleri talqylandy.
Kezdesýde Estonııanyń burynǵy Prezıdenti Toomas Ilves ulttyq ekonomıkany sıfrlandyrý tájirıbesi jóninde aıtyp, sıfrly ekonomıkaǵa tıimdi kóshý úshin saıası erik-jigerdiń bolýy mańyzdy ekenine toqtaldy. T.Ilves sıfrly qyzmetter kórsetýdi damytýdyń, jeli qoldanýshylarynyń sıfrly saýattylyǵyn arttyrýdyń jáne aqparattyq qaýipsizdikti qamtamasyz etýdiń mańyzdylyǵyn atap ótti.
Dúnıejúzilik saýda uıymy bas dırektorynyń orynbasary Alan Volf halyqaralyq elektrondy saýda júıesin damytýdyń qazirgi ahýaly men perspektıvalary jóninde áńgimeledi.
Eýropa qaıta qurý jáne damý bankiniń birinshi vıse-prezıdenti Iýrgen Rıgterınk Qazaqstan ekonomıkasynyń ósimin jáne onyń qaıta qurylyp kele jatqanyn atap ótip, elimizdiń kólik-tranzıt áleýetin, agroónerkásip kesheni men «Astana» halyqaralyq qarjy ortalyǵynyń múmkindikterin paıdalanýdyń mańyzdy ekenin aıtty.
Birikken Ulttar Uıymy Saýda jáne damý jónindegi konferensııasynyń Bas hatshysy Mýhısa Kıtýıı Qazaqstandaǵy kedendik deklarasııalaýdyń jeńildetilýi esebinen qol jetkizilgen oń nátıjelerge toqtaldy.
Beıbitshilik jónindegi Nobel syılyǵynyń laýreaty Radjendra Kýmar Pachaýrı klımat ózgeristeri saldarynan týyndaǵan problemalarǵa toqtalyp, «jasyl» tehnologııalardy damytýdyń jáne keńeıtýdiń mańyzdylyǵyn atap ótti. Radjendra Kýmar Pachaýrı Astanada ótken halyqaralyq EKSPO-2017 mamandandyrylǵan kórmesiniń taqyryby men onyń naqty nátıjeleriniń ózektiligine nazar aýdardy.
Beıbitshilik jónindegi Nobel syılyǵynyń laýreaty Rae Kvon Chýng ta «jasyl» ekonomıkaǵa kóshýdiń qajettigin aıtyp, balamaly energııa kózderin qoldanýdyń jaǵymdy tustaryn atap ótti.
«DP World» kompanııasy basqarmasynyń tóraǵasy Sultan Ahmed bın Sýlaıem logıstıkalyq jobalardy iske asyrý salasyndaǵy yntymaqtastyqty odan ári nyǵaıta túsýge múddelilik tanytty. Sultan Ahmed bın Sýlaıem Aqtaý qalasyndaǵy port pen «Qorǵas» shekara mańy yntymaqtastyǵy ortalyǵyn paıdalanýdyń tıimdiligi jóninde aıtty.
Doktor Entonı Taýnsend «aqyldy qalalardy» damytý jáne qalalardy basqarý úderisinde jasandy ıntellekt tehnologııalaryn qoldaný jónindegi oıyn ortaǵa saldy.
Álemniń jetekshi sarapshylarynyń baıandamalary tyńdalǵan soń Qazaqstan Prezıdenti jıynǵa qatysýshylarǵa Astana ekonomıkalyq forýmyna qatysqany jáne dóńgelek ústel otyrysynda aıtqan ıdeıalary úshin rızashylyq bildirdi.
– Eýropada Davos forýmy, bizde Astana ekonomıkalyq forýmy, al Tynyq muhıtynyń jaǵalaýynda Boao Azııa forýmy bar. Bul forýmdar bir ǵana maqsatty – qalyptasqan ahýaldan shyǵý jolyn izdeýdi kózdep otyr. Biz álemdik forýmdardyń bárimen yntymaqtastyq ornatyp, memleketter men halyqtardyń ıgiligi úshin jumys istegimiz keledi. Bul – damý, ilgerileý jáne túsinistik múmkindigi, – dedi Memleket basshysy.
Nursultan Nazarbaev jıynǵa qatysqan sarapshylardyń bári Astana ekonomıkalyq forýmynyń bedelin nyǵaıtýǵa jáne ony damytýǵa úles qosqanyn atap ótti.
Memleket basshysy Qazaqstannyń damý tarıhyna toqtalyp, elimizde etnosaralyq jáne ultaralyq kelisimdi saqtaý jáne nyǵaıtý jolynda atqarylǵan jumys tájirıbesi jóninde aıtty.
– Biz Konstıtýsııada, zańnamalyq deńgeıde jáne is júzinde barlyq azamattar quqyqtarynyń teńdigin qamtamasyz ettik. Qazaqstanda barlyq dinı konfessııalardyń ókilderi turady. Olarǵa dinı nanym-senim bostandyǵy berilgen. Dástúrli dinderdiń álemdik kóshbasshylary ózderiniń sezderin dál osy Astanada ótkizýge sheshim qabyldady. Bıyl kezekti VI sezd ótkeli otyr, – dedi Qazaqstan Prezıdenti.
Nursultan Nazarbaev Qazaqstannyń barlyq kórshiles eldermen dostyq jáne áriptestik qarym-qatynas ornatqanyn atap ótti.
Memleket basshysy elimizdegi barlyq azamattardyń turmysyn jaqsartýǵa baǵyttalǵan sharalardyń arqasynda bizdiń qoǵamda turaqtylyq pen kelisimge qol jetkizilgenin aıtty.
– Táýelsizdik jyldarynda ekonomıkamyz 25 ese ósti. Jan basyna shaqqanda ishki jalpy ónim 12 myń AQSh dollaryna jetti. Endi Ulttyq qorda jınaqtalǵan qarjynyń arqasynda ınfraqurylymdyq jáne ındýstrııalyq damý, sondaı-aq bilim berý men densaýlyq saqtaý salalaryna arnalǵan baǵdarlamalardy júzege asyryp kelemiz. Elimizde ómir súrý uzaqtyǵy 7 jylǵa uzardy. Bizdiń jas urpaǵymyz bilimdi jáne órshil maqsatpen bolashaqqa kóz tigedi, – dedi Qazaqstan Prezıdenti.
Sońynda Qazaqstan Prezıdenti Astana ekonomıkalyq forýmyna qatysýshylarǵa taǵy da rızashylyq bildirip, olardyń usynystary men ıdeıalary elimizdi odan ári damytý úshin mańyzdy ekenin atap ótti.
