Baspasóz jıynynda oblys basshysy Elbasynyń «Rýhanı jańǵyrý» baǵdarlamasyn iske asyrý boıynsha júrgizilgen jobalar men atqarylǵan jumystar jaıyn egjeı-tegjeıli baıandady. Oblysta baǵdarlamalyq maqaladan týyndaıtyn «Atameken», «Tárbıe jáne bilim», «Rýhanı qazyna», «Aqparat tolqyny» kishi baǵdarlamalary men «Qazaq tilin latyn álipbıine kóshirý», «100 jańa kitap», «Týǵan jer», «Qazaqstannyń kıeli jerleriniń geografııasy», «Jahandaǵy zamanaýı qazaqstandyq mádenıet», «100 jańa esim» arnaıy jobalary sátti iske asyrylyp jatqandyǵyn atap ótti.
«Baǵdarlama aıasynda óńirlik jobalyq keńse qurylyp, sarapshylar keńesi óz jumysyna kiristi. Sondaı-aq «Rýhanı jańǵyrý» baǵdarlamasynyń jobalaryna arnalǵan ınteraktıvti alańdar ashyldy. О́ńirden shyqqan 80-ge jýyq kásipker-mesenattardyń esebinen jalpy quny 817 mıllıon teńge bolatyn 23 áleýmettik nysan paıdalanýǵa berildi. Bıyl jalpy quny 1,5 mıllıard teńge bolatyn 29 áleýmettik nysan el ıgiligine beriletin bolady», dedi ákim.
A.Myrzahmetov atap ótkendeı, Uly Jibek jolynyń boıyndaǵy ejelgi qala retindegi Taraz shaharynyń baı tarıhyn týrızm klasterin damytýda kádege jaratý jospary túzilgen. Nátıjesinde «Qazaqstannyń sakraldy geografııasy» arnaıy jobasynyń qasıetti 100 nysan tizimine oblystan 8 tarıhı-mádenı orny engizildi. Jambyl oblysynan Qazaqstannyń jergilikti mándegi óńirlik qasıetti oryndarynyń kartasyna usynylǵan 27 eskertkish Mádenıet jáne sport mınıstrliginiń jáne «Qasıetti Qazaqstan» ǵylymı-zertteý ortalyǵynyń qoldaýymen shyqqan «Qazaqstannyń jalpyulttyq qasıetti nysandary» jáne «Qazaqstannyń óńirlik qasıetti nysandary» kitaptaryna engen. Sondaı-aq Mádenıet jáne sport mınıstrligi, Jambyl oblysynyń ákimdigi jáne «Qazaqstan temir joly» AQ arasynda «Aqyrtas» tarıhı keshenin qalpyna keltirýdi birlese júrgizý boıynsha memorandýmǵa qol qoıylǵan.
Aıtqandaı, baǵdarlamalyq maqalanyń negizinde oblys ortalyǵynyń ózindik sáýlet kelbetin qalyptastyrýǵa jiti nazar aýdarylǵan. Sońǵy eki aı ishinde «Jeńis» saıabaǵyn qaıta jańǵyrtý jumystary qarqyndy júrgizilgen. Sol sekildi Taraz qalasyndaǵy burynǵy bazar aýmaǵyndaǵy «Shahrıstan» saýda ortalyǵynyń aýmaǵy da ózgeshe keıipke enbek. Munda «Kóne Taraz» arheologııalyq mádenı kesheninen bólek, Oqýshylar saraıy, Neke saraıy syndy ǵımarattar boı kóteredi. Bir sózben aıtqanda, eski bazardyń orny qalanyń rýhanı, mádenı ortalyǵy retinde qalyptasyp, qala turǵyndary men qonaqtary bir sát tynystaıtyn orynǵa aınalmaq.
Jalpy, qoǵamnyń sanasyna serpin beretin baǵdarlamanyń jekelegen tarmaqtary bilim salasynda da kórinis tabýda. Máselen, Jambyl oblysyndaǵy jalpy bilim beretin orta mektepterde «О́lketaný», «Týǵan ólke tarıhy», kolledjderde «Tarıhı ólketaný», «Ádebı ólketaný» kýrstary engizilip, aptasyna 1 ret «Qazaqstan tarıhy», «Qazaq ádebıeti», «Geografııa» sabaqtary mýzeılerde, tarıhı ǵımarattarda ótkizilýde.
«Qoryta aıtqanda, jambyldyqtar baǵdarlamada kózdelgen aıqyn maqsattarǵa qol jetkizýge qoldaý bildirý úshin bar múmkindikterin paıdalanýǵa ázir. Esesine jergilikti bılikte kıeli óńirdiń ózindik erekshelikteri men qundylyqtaryn jańǵyrtý, olardy nasıhattaý jumystaryn jalǵastyra berýge nıetti», dedi A.Myrzahmetov.
Dınara BITIK,
«Egemen Qazaqstan»
