Elbasynyń «Rýhanı jańǵyrý» baǵdarlamasy aıasynda elordanyń 20 jyldyq mereıtoıy qarsańynda uıymdastyrylyp otyrǵan sporttyq sharanyń josparymen tanystyrý jáne jarysty joǵary deńgeıde ótkizý maqsatynda Mádenıet jáne sport mınıstri Arystanbek Muhamedıuly atalmysh salaǵa qatysty adamdardyń basyn qosyp jıyn ótkizdi.
Sońǵy jyldary elimizde Memleket basshysy Nursultan Nazarbaevtyń tikeleı tapsyrmasymen ulttyq sport túrlerinen halyqaralyq jarystar kóptep ótkizilýde. Atap aıtar bolsaq, aýdaryspaqtan alǵashqy Azııa chempıonaty 2014 jyly Astanada, ekinshisi 2016 jyly Qytaı elinde ótken bolsa, teńge ilýden birinshi ashyq Azııa chempıonaty 2015 jyly elorda tórinde uıymdastyrylǵan edi.
Májilistiń kún tártibinde alda atqarylatyn jumys jospary men reglamentteri, sheteldik sportshylardy vızamen qamtamasyz etý jáne qaýipsizdik máseleleri qaraldy.
«Bul retki jarystyń mańyzy zor, óıtkeni bizdiń ulttyq sportymyzdy tamashalaýǵa IýNESKO-nyń Dástúrli sporttar men oıyndar komıtetiniń ókilderi kelýge nıet tanytyp otyr», dedi uıymdastyrýshylar.
Beken QAIRATULY,
«Egemen Qazaqstan»
