Aýyldyń ıesi oblystyq máslıhattyń depýtaty Aleksandr Kasısın. Tańqaldyrǵan sharýashylyq. Osy jerdi Otanym, elim degen aýylda ósken nemis, orys, ýkraın ulty ókilderi turady. Seriktestik 1998 jyly qurylǵan. 2004 jyldary seriktestikte 5 myńǵa jýyq qara mal, 200 shoshqa, 300 jylqy, 4 myńdaı qus boldy. Inkýbator jumys jasady. Asyl tuqymdy mal ósiretin sharýashylyq atalǵan soń, sútti mol beretin iri qaranyń sımmental tuqymy jáne qazaqtyń aq bas sıyrlaryn ósire bastady. Sóıtip, sharýashylyqtaǵy iri qara mal tuqym erekshelikterine oraı, elıta-rekordty, birinshi elıtalyq klass baǵalaryn da alyp úlgerdi.
«Mundaı baǵaǵa biz mal sharýashylyǵyna ozyq tehnologııalardy engizý jáne isimizdi durys uıymdastyrý arqyly qol jetkizdik» deıdi sharýashylyq basshysy.
Munda árbir jańa týǵan tól erekshe kútimge alynady. Sodan keıin tuqym erekshelikterine saı kútip-baǵylyp, jem-shóptiń arnaıy quramy boıynsha azyqtandyryldy.Úsh adamǵa 300 bas sıyr bólinedi. Mal qoralary keń de jaryq, taza. Jumystyń bári mehanıka kúshimen atqaryldy. Malǵa kádimgi sý jylytyp beriledi. Sońynda osyndaı kútimde baǵylǵan maldyń tirideı orta salmaǵy 400 kılodan kem bolmaıdy eken.
Seriktestikte 3489 sút beretin iri qara mal, 643 jylqy, 400 shoshqa, 5 myńdaı qaz ósiriledi. Jylyna 412 tonna sút, 519 tonna et óndiriledi. Mal basynan jylyna 1087 buzaý, 158 qulyn alynsa, ınkýbatordan 20 myńdaı qaz balapandary ósip shyǵady.
Osyndaǵy, táýligine 30 tonna sút óndiretin «Klever» atty qondyrǵy, ol súttiń quramyn tekserip, bes mınót ishinde onyń tazalyǵyn, maılylyǵyn anyqtap beredi. Mal qoralary, mal semirtý alańdary, jem-shóp sehtary, maldárigerlik bólimshe, ınkýbator, avtogaraj, qyrman, qoımalary, elektr sehtary, aǵash sheberhanasy qaz-qatar tizilgen alyp keshendi quraıdy. Aınalada shashylyp jatqan bir buraý joq, tap-taza. Qalada asfalt ústinde júrgendeısiń. Seriktestik 22,6 myń gektar jerge júgeri, kúnbaǵys, tary, qaraqumyq, bıdaı, basqa da astyq daqyldaryn seýip, jaz boıy baptap ósiredi. Sheteldik tehnıkanyń egin egetin, júgeri jınaıtyn kanadalyq deısiz be, nemistiki deısiz be túr-túri, 132 traktory, 110 máshınesi, 66 júgeri jınaıtyn kombaındary, kanadalyq egin salý keshenderi bar. Jerge asa bir uqyptylyqpen qaraıdy. Ýaqytyly tyńaıtqyshtarmen tyńaıtylyp, qar toqtatylyp turady. Búkil aýyl turǵyndary osy sharýashylyqta eńbek etedi.
SÚT FERMASY – JAŃA JOBA
Mundaǵy barlyq tirlik avtomattandyrylǵan. О́tken jyly jeltoqsan aıynda «Galıskoe» seriktestiginde «QazAgroQarjy» AQ arqyly ınvestısııalyq joba sheńberinde 500 saýyn sıyrǵa arnalǵan taýarly sút fermasy ashyldy. Fermanyń jobalyq qýaty zamanaýı standarttarǵa saı jylyna 2000 tonnaǵa deıin sút óndirýge múmkindik beredi. Taýarly sút fermasyna «Agralız» atalatyn mal turatyn oryn, «Elochka» atty saýylatyn alańsha, «Braslav» atty qural-jabdyqtary jınaqtalymy Germanııanyń, Ýkraınanyń eń jańa tehnologııalarymen qamtylǵan. Osy jobanyń iske asyrylýy arqasynda qosymsha 13 turaqty jumys orny ashylyp, sút óndirisiniń kólemi ulǵaıdy. Jobanyń quny 415,8 mln. teńge. Saýylǵan sút oblys ortalyǵyndaǵy «Pavlodarmoloko» AQ-qa kúndelikti jetkiziledi. Qazirgi tańda fermada alǵash buzaýlaıtyn 300 qunajyn bar, aldaǵy ýaqytta olardy 500 basqa deıin jetkizý josparlanýda. Olar jyl boıy baılaýsyz, jaıylymsyz-aq, qysy-jazy keshen ishinde taza jerde baǵylady. Jem-shóp, jem jáne súrlem beriledi. Malǵa qyzmet kórsetýshiler ferma meńgerýshisi, 4 saýynshy, 4 malshy, 1 tehnık-uryqtandyrýshy, 1 jıystyrýshy, zootehnık, mal dárigerinen turady. Sonda 500 malǵa bar-joǵy onshaqty adam qaraıdy. Aldaǵy ýaqytta zamanaýı bul sút-taýarly fermasy ónim óndirisin ulǵaıtady, shyǵyndardy azaıtady, eńbek ónimdiligin arttyrady dep jobalanyp otyr. Maldy da tehnıka, kompıýter basqarǵan zaman degenimiz mine, osy. Bar bolǵany 4 saýynshy basqarý tetiginde otyryp, avtomatty qoldaný arqyly 500 sıyrdan bir sátte-aq sút saýyp alady.ǴAJAIYP QALAShYQ
Aleksandr Kasısın basqaratyn «Galıskoe» jaýapkershiligi shekteýli seriktestigine qarasty aýyl órkenıetti. Munda bári de qaladaǵydaı. Aýyl shetindegi taýarly sút fermasynyń qaz-qatar tizilgen keshenderi de ádemi kórinis berip tur. «Osyndaı jańa zaman aýylyn jasaý, sýy kókke shashyraıtyn fontandar ornatý, meniń bala kezgi armanym edi, kórip turǵandaryńyzdaı sol arman júzege asqandaı» deıdi Aleksandr. Aýylda mádenıet úıi, ortalyq murajaı, emhana, záýlim mektep, mańaıy baý-baqshaǵa tolyp turǵan aq shańqan sándi úıler, shashtaraz, monsha, sporttyq ortalyq jumys isteıdi. Dárigerlik ambýlatorııada kúndiz kelip jatyp emdeletin bólmeler bar. Ýchaskelik polısııa jáne úsh qoǵamdyq saqshy aýyldyqtar tynyshtyǵyn qorǵaıdy. Galıskoeda bári ózinde. Anaý-mynaý izdep qalaǵa barýdyń qajeti de joq. Mádenıet úıi men balalar ortalyǵynyń aldynda móldir sýly fontandar atqylap tur. Aınala taza. Asfaltti túzý kósheler. Barlyǵyna shamdar tartylǵan. Al, keshkilik aýyl kishigirim jarqyraǵan qalashyqty kózge elestetedi. Naýbaıhanasy, makaron sehy, toqashtar, táttiler pisiretin kondıter sehy aýyldyqtar qajetin óteýde. Alqap-alqap egin, jeıtin nany óziniki, bıdaı degeniń jetedi, artylǵanyn satady. Júgeri, qaraqumyq, kúnbaǵystan mol ónim alady. О́tken jyldary eki-úshten úsh-tórt páterli turǵyn úıler salyp aldy. Bul úrdis aldaǵy ýaqytta da jalǵasady. Ot jaqpaıdy. Ortalyqtandyrylǵan jylý júıesi bar, sý úıge kelip turady. Qaladaǵydaı kommýnaldyq qyzmet aqysyn tóleıdi. Jylyna 7 myń tonna kómir jaǵady. Aýyl ákimi Keńes Jandosovtyń aıtýynsha Galıskoeda 2 myńdaı adam, onyń ishinde, 105 qazaq, 615 orys, 402 ýkraın, 212 nemis, 258 ártúrli ult ókilderi turady. Tatý-tirlikti, birligi jarasqan aýyl dep osyny aıt. Farıda BYQAI. Pavlodar oblysy, Ýspen aýdany.
