Astanada el Táýelsizdiginiń 20 jyldyǵy qarsańynda «Halyq Qaharmany», armııa generaly Saǵadat Nurmaǵambetov atyndaǵy «Jas ulan» respýblıkalyq mektebiniń jańa kesheni ashyldy. Onyń ashylý saltanatyna Elbasy – Qarýly Kúshterdiń Joǵarǵy Bas qolbasshysy Nursultan Nazarbaev qatysty.
Memleket basshysy mektep tárbıelenýshilerin jańa keshenniń ashylýymen quttyqtaǵan soń, Qorǵanys mınıstri Ádilbek Jaqsybekov mekteptiń oqý-materıaldyq bazasymen tanystyrdy. Qarýly Kúshterdiń Joǵarǵy Bas qolbasshysy 51 synyby bar 4 qabatty oqý ǵımaratynyń aýdıtorııalaryn, 500 oryndyq jataqhanasyn, kitaphana men oqý jáne májilis zaldaryn aralap kórdi. Mekteptiń ákimshilik ǵımaraty men ashanasy, sport kesheni de nazardan tys qalǵan joq. Elbasy sport kesheniniń 16 jolaqty, uzyndyǵy – 25, eni 11 metrlik basseınimen, ústel tennısi, boks, kúres, fýtbol zaldary men ashyq aspan astyndaǵy basketbol, voleıbol, fýtbol alańdarymen tanysty. Kelesi kezekte mektep oqýshylarymen kezdesip, olardy el Táýelsizdiginiń 20 jyldyǵy qarsańynda ashylǵan mekteptiń jańa keshenimen quttyqtady.
– Bul elimizdiń biregeı oqý orny ekenin bilesińder, – dedi Nursultan Ábishuly. – Mektep osydan 12 jyl buryn, ıaǵnı 1999 jyldyń qarasha aıynda bolashaq Otan qorǵaýshylardy tárbıeleıtin oqý orny retinde ashyldy. Endi sender jańa ǵımarattyń qabyrǵasynda oqýdy jalǵastyratyn bolasyńdar. Men senderdiń oqýda tabysty bolǵandaryńdy qalaımyn. О́ıtkeni, bizdiń bolashaǵymyz sender, jastarsyńdar. Men senderdiń árqaısyńnan áskerı qolbasshy shyǵady degen senimdemin.
Odan keıin Memleket basshysy Qazaqstan áskeri árqashan el táýelsizdiginiń kúzetinde ekenin, kez kelgen armııanyń jaýyngerlik qabileti ol qansha jerden zamanaýı qarý-jaraq jáne áskerı-tehnıkamen jaraqtandyrylsa da birinshi kezekte mamandardyń kásibı daıyndyǵy men moraldyq ahýalymen baılanysty bolatynyn atap ótti. «Sondyqtan, – dedi Elbasy, – ulandar bizdiń bolashaǵymyz. Ulandar erteńgi kúni Otanymyzdyń táýelsizdigi men qaýipsizdigin kúzetetin bolashaq óz isiniń sheberleri». Osylaı deı kele, el Prezıdenti mektep alǵash qurylǵan kezden beri balalar úıiniń tárbıelenýshileri men turmysy tómen otbasylarynan shyqqan balalardy oqýǵa qabyldaýǵa basa nazar aýdarylyp kele jatqanyn, bolashaqta mektep osyny ári qaraı jalǵastyra beretinin aıtty.
Memleket basshysymen kezdesýde mektep tárbıelenýshileri Elbasyna alǵys sezimderin bildirdi. Sonyń biri 7-synyp oqýshysy Ádilet Ospanov Prezıdentke memlekettiń «Jas ulan» mektebine jasap kele jatqan qamqorlyǵyna, elimizdiń áskerı salasyn damytýdaǵy isine rahmetin jetkizdi. «Bizdiń mektepte barlyq jaǵdaı jasalǵan. Biz Sizge mekteptiń oqý-materıaldyq bazasyn nyǵaıtyp, balalardyń oqýyna barlyq jaǵdaıdy jasap jatqanyńyz úshin alǵysymyzdy bildiremiz. Qazir bizde memlekettik jáne shet tilderi, áskerı tártip pánderi tereń oqytylsa, ulandardyń dene tárbıesi daıyndyǵyna erekshe mán beriledi. Bolashaqta biz shymyr, jınaqy da jigerli bolyp, Otanymyzdy qorǵaıtyn naǵyz erler bolyp ósemiz», – dedi ol.
Mekteptiń jańa kesheniniń aýmaǵy 24,165 sharshy metrdi alyp jatyr jáne 7 pavılonnan turady. Burynǵy ǵımarattyń kólemi 14 myń sharshy metr bolǵan eken. Mekteptiń jańa kesheni Qorǵaljyn joly boıynda ornalasqan.
Prezıdent Nursultan Nazarbaev ekinshi kezekte Astanadaǵy Baýyrjan Momyshuly kóshesinde ornalasqan jańa nysan – Oqýshylardyń shyǵarmashylyq saraıyna kelip, keshenniń jańa zaldary men bólmelerin aralap kórdi.
Jalpy aýmaǵy 60 myń sharshy metrdi alyp jatqan Oqýshylar saraıy – 4 qabattan turatyn, kópbeıindi, syrt pishimi kúrdeli ǵımarat. Birinshi qabatynda jeńil atletıkalyq manej, eki jattyǵý zaly, júzý basseıni, muz aıdyny, teatrlyq kórermen zaly, ashana, ákimshilik jáne tehnıkalyq bólmeler ornalasqan. Ekinshisinde ekspozısııa men taqyryptyq kórmelerdi udaıy uıymdastyryp turýǵa arnalǵan kórme zaly, Internet-ortalyq jáne kitaphana bar. Úshinshi qabatynda basketbol, kúres, tennıs zaldary, orkestr, bı, hor jáne drama ujymdary úshin daıyndyq zaly, medısınalyq ortalyq oryn tepken. Tórtinshisindegi 170 oryndyq planetarııde stereoskoptyq 3D tehnologııasyn paıdalaný arqyly panoramalyq, sferalyq jáne ǵalamsharlyq keskindeme kórsetýge múmkindik jasalǵan. Amfıteatr túrinde paıdalanylatyn kópbeıindi bólmeler, horeografııa zaly, saz synyby, ızostýdııa, sazdy-teorııalyq oqý synyptary, teatr stýdııasy, zerthana, beınefotostýdııa da osy qabatta.
Elordada boı kótergen biregeı ǵımarattardyń qataryn tolyqtyrǵan Oqýshylar saraıynda mektep jasyndaǵy balalar sportpen jan-jaqty aınalysýǵa múmkindik alady. Mundaǵy jeńil atletıka zalynyń trıbýnalary – 336, muz aıdynynyń ámbebap zaly – 384, basseın zaly 144 kórermenge eseptelgen.
Biregeı ǵımarattyń bir ereksheligi – onda 170 oryndyq planetarııi bar observatorııa jumys isteıdi. Sondaı-aq, planetarııde kúmbez ben qabyrǵalardaǵy ekrandardan medıamaterıaldardy kórsetýge múmkindik bar. Munda elektr jáne radıotehnıkalyq zerthana, kompıýterlik tehnıka zerthanasy, áýe, zymyran, keme úlgilerin jasaý zerthanasy ashylǵan.
Saraıda múmkindikteri shekteýli balalar men jasóspirimderge de barlyq jaǵdaı jasalypty. Máselen, jeńil atletıka jáne drama teatr zaldarynda arnaıy kóterý qurylǵylary ornatylǵan, basseınde «Delfın» kóterý qurylǵysy bar. Iаǵnı, ǵımarat arnaıy tetiktermen jáne pandýspen jabdyqtalǵan. Az qamtylǵan jáne kóp balaly otbasylardyń balalary, jetim balalar Oqýshylar saraıyndaǵy úıirmeler men seksııalarǵa tegin qatysa alady.
Oqýshylar saraıy tanymdyq, mádenı-aǵartýshylyq, sporttyq-saýyqtyrý, rekreasııalyq jáne uıymdastyrý-ádistemelik qyzmet atqaratyn Astananyń jetekshi áleýmettik, bilim berý ınstıtýty róline ıe.
Ǵımarattyń ishindegi 50 úıirmege bir mezgilde 3880 adamnyń qatysýyna bolady, alaıda, bir kúnniń ishinde ol budan úsh-tórt ese kóp bala qabyldaı alady. Balalar osy jerde júrip, kásibı turǵyda mamandanýǵa, shyǵarmashylyq áleýetin kóterýge múmkindik almaq.
Oqýshylar saraıyn aralaǵan Prezıdent: «Osyndaı Oqýshylar saraıy kóp óńirde joq. Bir ǵana keshende 50 úıirme ornalasqan, qalaýyń boıynsha sýret, bı, modeldeý, sporttyq úıirmeler, jeńil atletıkalyq manej jáne ózge de seksııalarǵa qatysa alasyń. Balalar óz bilimderin odan ári jalǵastyryp, óz qabiletterin kórsetý úshin negiz bolatyn bilimdi osydan alady. Biz bolashaq úshin jan-jaqty, mádenıetti, densaýlyǵy myqty urpaq tárbıeleımiz. Balalar, senderdiń barlyǵyńa baqyt tileımin», – dedi.
Saraıdaǵy jattyǵýlar ǵylym, óner jáne sport túrleri boıynsha úsh baǵytta júredi. Bolashaqta seksııalar sanyn 100-ge deıin jetkizý josparlanǵan. Oqýshylar saraıy jastardyń rýhanı jáne mádenı damýynyń mańyzdy ortalyǵyna aınalmaq.
Dastan KENJALIN,
Láıla EDILQYZY.
-----------------------------------------
Sýretterdi túsirgender S.BONDARENKO, B.OTARBAEV.
