«Egemen bolmaı el bolmas, etekten kesip jeń bolmas», degen eken babalarymyz. Mine, sol aıtylǵandaı, egemen bolǵan, el bolǵan kezden beri onyń jylnamasy men shejiresin qalt jibermeı jazyp kele jatqan basylym – «Egemen Qazaqstan». Tek osy qasıeti úshin de bas basylymnyń qadyr-qasıeti bizdiń ujym músheleri úshin joǵary dep sanaımyz. Egemendik tarıhynyń úshinshi onjyldyǵyna aıaq basyp otyrǵan syndarly sátimizde «Egemen Qazaqstan» el erteńi – jastardyń da kún saıyn asyǵa kútip oqıtyn basylymyna aınala alatynyna eshqandaı kúmánimiz joq.
«Egemende» jarııalanyp júrgen materıaldardyń mazmuny jan-jaqtylyǵymen, ári tereńdigimen oqyrmandy baýraı biledi. Búgingi zamanǵy jýrnalıstıkaǵa qoıylatyn basty talap – saraptaýlar men taldaýlarǵa jáne salystyrýlarǵa arqa súıeıtin súıekti materıaldar desek, mundaı dúnıeler bas basylymnyń kez kelgen nómirinen tabylady.
Men ózim arnaýly bilim beretin oqý ornynyń basshysy bolǵandyqtan, gazette bilim berý júıesine qatysty jarııalanyp júrgen materıaldardy únemi qadaǵalap, oqyp júremin. Sóz joq, táýelsizdiktiń 20 jyly ishinde eldiń bilim berý salasynda jańasha kózqarastar men krıterııler qalyptasty.
Egemendik talaptaryna sáıkes ulttyq tilimizde jańa oqýlyqtar jazyla bastady. Ras, alǵashqyda keıbir áttegen-aılar men orasholaqtyqtar bolǵanymen, keıin bul is bir izge túsip kele jatqany belgili. Bul jáıtterdi de kezinde «Egemenniń» betinen oqyǵanbyz. Endi zańǵar basylym jónindegi oı-pikirime qosa táýelsizdik jyldarynda Alash arysy Jahansha Dosmuhamedov atyndaǵy bizdiń kolledj ujymy da ulan-ǵaıyr isterge bastamashy bola bilgenin aıta ketkim keledi.
Atap aıtqanda, bizdiń oqý ornynyń bazasynda oqý baǵdarlamalary men memlekettik standarttar ázirlenip, ózimiz tektes respýblıkadaǵy pedagogıkalyq kolledjderge taratyldy. Sondaı-aq munda 48 arnaıy oqýlyq jazylyp, respýblıkanyń Bilim mınıstrligi tarapynan qoldaý tapty. «Bilim negizi – bastaýyshta». Mine, osyndaı bastaýysh bilim berý isiniń keıbir tolǵaǵy jetken máseleleri egemendiktiń alǵashqy jyldarynda bas basylym betinde jaryq kórgeni de aıan. Onyń ishinde osy joldar avtorynyń maqalasy da bar edi.
Aldaǵy 2012 jyly kolledjdegi jastar men stýdentter bas basylymdy jyl boıy rýhanı turǵydan serik etýge uıǵarym jasaǵany – bizdi súısindiredi. Kúni búginge deıin arnaýly oqý ornyndaǵy 120 adam «Egemen Qazaqstanǵa» jazyldy. Bul is odan ári jalǵasýda.
«Egemen» – qaı kezde de eldiktiń sózin aıtyp kele jatqan basylym. Ol bizge sonysymen de qymbat, sonysymen de baǵaly.
Shalqyma QURMANALINA, Jahansha Dosmuhamedov atyndaǵy pedagogıkalyq kolledj dırektory, pedagogıka ǵylymdarynyń doktory.
Oral.
