«Egemen Qazaqstannyń» arnaıy jobasy: Jasampazdyq jemisteri
Jıyrma jyldyń ishinde atqarylǵan ıgi isterdiń arqasynda árbir óńirimiz ózgerip, ómirimiz jaqsaryp keledi.
«Egemen Qazaqstan» gazeti osyndaı órkendi ózgeristerdi beıneleıtin materıaldardy turaqty jarııalap turady.
Tómende Qostanaı oblysynyń Naýyrzym aýdanyndaǵy Sholaqsaı aýylynan fotoreportaj berilip otyr.
AÝYL ADAMDARYMEN AJARLY
Naýyrzym aýdanyndaǵy Sholaqsaı aýyly oblys ortalyǵynan eki júz shaqyrym jerde ornalasqan. Táýelsizdiktiń eleń-alańyndaǵy qıyndyqtar shalǵaıdaǵy Sholaqsaı aýylynyń da esinde. Josparly ekonomıka ketip, naryq keldi. Sharýashylyqty jańasha uıymdastyrý kerek boldy. Túrli ult ókilderi aırandaı uıyǵan Sholaqsaı aýyly bar qıyndyqtardy jeńe bildi. Elbasy Nursultan Nazarbaevtyń sarabdal saıasatynyń arqasynda damýdyń dańǵyl jolyna túsken elmen birge eńsesin tiktedi.
90-shy jyldary О́mirzaq Ihtılıapovtaı bilikti uıymdastyrýshy kelmegende Sholaqsaı da «bolashaǵy joq» aýyldar qataryna enip, oblys kartasynan óship keter me edi, kim bilsin. О́mekeń aldymen sharýashylyqty durystady. Qazir «Sholaqsaı» jaýapkershiligi shekteýli seriktestigi 20 myń gektar jerge egin egedi. Mal da bar. Eshqandaı nesıe almastan, sharýashylyqtyń óz qarjysyna tehnıka parkin jańartty. Reseıden, Kanadadan jer óńdeıtin, egin sebetin keshen, germanııalyq kombaındar alyndy. Zamanaýı ozyq tehnıka bolmaı, jerdi kúte almaısyń. Dıqan kútimi keliskende ǵana jer-ana ıetinin sholaqsaılyqtar jaqsy biledi. «Sholaqsaı» oblystaǵy óz ushaǵy bar sanaýly sharýashylyqtyń biri. Qazir tehnıkalar baıaǵydaı qardyń astynda jatpaıdy, qysy boıy arnaýly angarlarda saqtalady. «Sholaqsaı» jaýapkershiligi shekteýli seriktestigi aýylda 500 adamdy jumyspen qamtyp otyr.
– Aýyldastardy jumyspen qamtý az. Adamdar aýylda turý úshin olardyń áleýmettik turmysyn jaqsartý kerek. Adam turmasa aýyl qalaı kórkeısin, – deıdi О́mirzaq Ihtılıapov.
Bilikti basshynyń sózi men isinde alshaqtyq joq. Sharýashylyq aýyl turǵyndaryna shóptiń tonnasyn 2 myń teńgeden satyp, ony ár úıge túsirip beredi. Oblystyń ózge aýdandarymen salystyrǵanda munyń óte arzan ekenin aıtqan lázim. Aýyl naýbaıhanasynda pisirilgen 800 gramm bólke nandy aýyldastar nebári 25 teńgeden alady. Al oblysta 600 gramm bólke nan 42 teńge turady. Sharýashylyq turǵyndarǵa kómirdiń tonnasyn 3 myń teńgeden túsirip berdi. Al oblysta kómirdiń tonnasy kem degende 7 myń teńge. О́tken jyly aýyl mektebi 12 mıllıon teńgege qaıta jóndeýden ótkizildi. Buryn qańqasy qalǵan balabaqshany qaıta jasap, qatarǵa qosý sharýashylyqqa 10 mıllıon teńgege tústi. Mektepti kompıýterlendirdi, ınteraktıvti taqta da alyp berdi. Shalǵaı aýyldyń balalary órkenıettiń jetistikterinen kenje qalyp otyrǵan joq. Aýylda klýb ta, meıramhana da bar. El ishi janazasyz, toısyz bolmaıdy, sondaı jıyndardyń barlyǵy da aýyldyń toıhanasynda ótedi.
Sholaqsaı aýylyna tabıǵattyń ózi nuryn tókken jer. Bul aýyldyń ár úıinde sýy bulaqtaı káýsar tushy qudyq bar. О́mekeń qaısybir jyldary jastar qalaǵa ketse, aýyldyń erteńi ne bolar eken dep oılanyp júretin. Áleýmettik turmysy jaqsy aýyldan jastar nege qashsyn. О́ziniń uly Mádıden bastap, qalaǵa túrli oqýǵa ketken mektep túlekteri aýylǵa keldi. Pedagogıka ınstıtýtyn bitirgen Mádı alǵashynda aýyl mektebinde muǵalim bolyp istedi de, sońǵy onshaqty jylda ákesine kómektesti. Qazir sharýashylyqty basqarýdy tolyqtaı óz mindetine alǵan. Ákesi bir izge salyp bergen sharýashylyqty Mádı odan ári damytqysy keledi. Jas sharýashylyq basshysynyń eginmen qatar, mal sharýashylyǵyn óristetkisi, jemis baǵyn ósirgisi jáne jas mamandarǵa arnap úı salǵysy keledi. Aýyl mektebi ujymynyń 80 paıyzy jas mamandar. Olardyń barlyǵy derlik Sholaqsaı aýylynyń óz jastary, keshe ǵana osy mektepti bitirip shyqqan túlekter. Jas bolsa da bilikti basshy Mádı olarǵa baspana qajettigin bilip otyr.
Mine, Táýelsizdiktiń ár tańy Sholaqsaı aýylyna nur septi. Kórkeıdi, erteńine de senimdi.
Qostanaı oblysy, Naýyrzym aýdany, Sholaqsaı aýyly.
________________________________
Arnaıy betti daıyndaǵan «Egemen Qazaqstan» gazetiniń Qostanaı oblysy boıynsha menshikti tilshisi Názıra JÁRIMBETOVA.
