Estelik kitap «Farıza Ońǵarsynova» atyndaǵy qaıyrymdylyq qorynyń qoldaýymen jaryqqa shyqqan. Qordyń tóraıymy – Almagúl Ońǵarsynova. Qurastyrǵan – jazýshy, jýrnalıst Gúlsim Orazalyqyzy. Osy basqosý-jıyndy júrgizgen Qazaqstan Jazýshylar odaǵy Basqarma tóraǵasynyń orynbasary Mereke Qulkenov «Bul jaı ǵana estelik kitap emes. Farıza aqynnyń bolmysyn jan-jaqty ashatyn basylym. Farıza aqyn Prezıdentten bastap barsha qazaqpen etene jaqyn aralasqan jan. Birine apa bolyp aqylyn aıtsa, birine qaryndas bolyp erkeledi. Bul jınaq osy turǵydan alǵanda qalamgerdiń keskin-kelbetin, tabıǵatyn, shyǵarmashylyǵyn kórsete biletin keremet jınaq bolyp shyqqan» dep atap ótti. Búginde kóptegen týyndylary alys-jaqyn shetel tilderine aýdarylyp, kóptegen ánderi mýzykaǵa negizdelgen Farıza aqyn týraly osy jınaqta Á.Kekilbaev, Á.Tájibaev, S.Qırabaev, O.Ábdikárimov, M.Joldasbekov, Q.Sultanov, B.Izmuhambetov, B.Saparbaev, Q.Kósherbaev, Sh.Berkimbaeva, t.b. kóptegen elimiz qaıratkerleriniń estelikteri toptastyrylypty.
Estelik kitap QR Reseıdegi Tótenshe jáne ókiletti elshisi Imanǵalı Tasmaǵambetovtyń Alǵy sózimen bastalǵan: «...ol úshin týǵan eliniń rýhanı keregi men talǵamdy tilegi qymbat edi. Onyń egemen elimizdiń damýyna qosqan súbeli úlesine barshamyz kýámiz. Bul ásirese, el eńsesin endi tiktep jatqan shaqta da, keshegi kemeline kelgen ýaqytta da naýqanshylyqtyń jalaýymen emes, halyqtyń shynaıy qalaýymen Májiliske birneshe ret saılanyp, eldiń sózin sóılegende kórindi. О́tkir synymen de, shyndyqty orǵan tilimen de qazaqtyń kim ekenin, halyqtyń qyzy ekenin dáleldep berdi». Iá, rasymen de Farıza Ońǵarsynova «Qazaq poezııanyń padıshasy» bolǵanyn halqy moıyndaǵan parasatty tulǵa. Búginde jazǵandary eldiń mırasyna aınalǵan Farıza aqyn jaıynda osy basqosýda kóptegen tebirenisti estelikter ortada toǵysty. Shyǵarmashylyqtyń jaýapty júgin arqalaı júrip, eldiń qamyn oılaı júretindigin, ár qazaqqa janashyrlyǵyn isimen dáleldegen qaıratker qalamger ekendigi jıi tilge tıek etildi. Aqynnyń daýysymen jazylǵan «Podmoskovnye vechera» áni qoıylǵanda kópshiliktiń júreginde saǵynysh sezimi oıanyp, kózderge jas irkildi.
Qazaqstannyń Halyq ártisi S.Orazbaev «Búkil qazaq halqy nege Farızany jaqsy kórdi? О́ıtkeni Farızanyń bolmysy – erekshe qubylys edi» dep eske alsa, aqyn, qoǵam qaıratkeri T.Medetbek «Farızanyń adýyndy aqyn ekendigi, aıbarly adam ekendigi jalpaq jurtqa málim. Farıza er adamdardyń ózi bara bermegen bıikke, órege kóterilgen aqyn. О́zine tán bolys-bitimimen jańa dúnıelerdi týǵyzǵan ǵajaıyp tulǵa» dedi. Al aqynnyń kóz tirisinde qurbysy bolǵan Shámshi Berkimbaeva «Farıza aqyndy búginde ısi qazaq saǵyna izdeıdi. Bizderdi Farıza aqynnyń keshteri bilim oshaqtarynda jıi ótip jatatyndyǵy qýantady. Halyq aqynynyń artynda qalǵan murasynyń árıne keleshek urpaqqa, paıdasy zor» dep atap ótti. Ári keler jyly týǵanyna 80 jyl tolýyn ózindik deńgeıde atap ótsek degen usynysyn bildirdi. Ǵalym, professor Á.Beısenova aqyn haqynda «Farıza bir azamattyń taýqymetin tartýdaı-aq tartqan aqyn, ol qoǵamdyq máselelerden tartynyp qalǵan joq. Farıza qazaq qyzdarynyń qorǵaýshysy, qoldaýshysy edi. Qazaq qyzdaryn elin súıýge, otbasyn saqtaýǵa shaqyrǵan Farızadaı aqyn bolǵan joq», dedi. Aqyn H.Esenǵaraeva «Farıza apamyz ómirge bosqa kelip ketken joq. О́z eńbeginiń arqasynda uly tulǵaǵa aınaldy. О́z formatyn ózi jasaǵan eńbekqor jan. Ýaqytty ózine jumys istete bilgen yqtııatty da, qýatty jan. Aqyn qalaı jazdy, jurt júregin qalaı baýrap aldy, onyń syry nede dep ár kez jaýap izdeısiń. Ol ózin aıalamaı, aıamaǵan jan. О́zine qoıǵan talapty ózgeden de talap etetin» dep eske aldy. Al Aqyn Maraltaı Raıymbekuly estelik lebizin óleńmen órip, «Naızaǵaıdy» oqyp, kópshiliktiń kóńilin bir serpiltip tastady. Qazaqstannyń eńbek sińirgen ártisi Sulýshash Nurmaǵambetova estelik sózderinen keıin «Jaqsy kórý» áni týraly syr shertip, Farıza Ońǵarsynovanyń búginde ómirden ótip ketken Temiráli Baqtygereevtyń ánine jazylǵan «Keshir meni» áýezdi ánin oryndady. Keshtiń sońy stýdentterdiń kúmbirlegen kúıine ulasty.
Elvıra SERIKQYZY,
«Egemen Qazaqstan»
ALMATY
