Otandasymyz Davıd Leme men Karım Ashýr anderkardynda argentınalyq boksshy Djonatan Hose Enızben judyryqtasyp, qarsylasyn jetinshi raýndta tehnıkalyq nokaýtpen utty. Eki boksshy arasyndaǵy chempıondyq ataq sarapqa salynǵan jekpe-jek on raýndqa josparlanǵan bolatyn. Degenmen argentınalyq boksshynyń qaýqary jeti raýndqa deıin jetti. Dese de bul jekpe-jek jerlesimizge ońaıǵa soqqan joq. Bes raýnd boıy qarsylasynan basym bolǵan Júkembaev besinshi raýnda Enızdiń aýyr soqqysyn ótkizip alyp, nokdaýnǵa túsip qaldy.
Nokdaýnnan tez es jıip alǵan Batyr Júkembaev jekpe-jekti qaıtadan óz qolyna aldy. Jetinshi raýndta otandasymyz qarsylasyn eki ret nokdaýnǵa jiberip, Hose Enızdi jekpe-jekti jalǵastyra almaıtyn halge túsirdi. Nátıjesinde tóreshi kezdesýdi toqtatyp, chempıon retinde otandasymyzdyń qolyn kóterdi. 27 jastaǵy Júkembaev sporttyq mansabyndaǵy ekinshi chempıondyq ataǵyna qol jetkizdi. Buǵan deıin ol IBO International beldigin ıelengen-di. Osylaısha, Batyr Júkembaev kásipqoı bokstaǵy 13-shi jekpe-jegin ótkizip, 13-shi jeńisine qol jetkizdi. Onyń 11-de qarsylasyn merziminen buryn jeńgen.
Sonymen qatar bul boks keshinde eki qazaqstandyq boksyshy Nurzat Sabyrov (6-0, 5 KO) pen Sadrıddın Ahmedov te (2-0, 2 KO) judyryqtasty. Sabyrov argentınalyq qarsylasyn tóreshiler sheshimi boıynsha jeńse, Ahmedov 34 jastaǵy taǵy bir argentınalyq boksshy Arıel Alehandro Zampedrıdi birinshi raýndtyń orta tusynda nokaýtpen jeńdi.
Álı BITО́RE,
«Egemen Qazaqstan»
