Foto: Almaty qalasy PD
Almaty qalasy Polısııa departamenti quqyq buzýshylyqtardyń aldyn alý júıesine sıfrlyq tehnologııalardy kezeń-kezeńimen engizip keledi. Sonyń biri – ushqyshsyz ushý apparattaryn keńinen paıdalaný.
Sıfrlyq baqylaý – jedel eskertý
Arnaıy jaryq dabyl elementterimen jáne daýys zoraıtqysh qurylǵylarmen jabdyqtalǵan drondar qoǵamdyq keńistikterdi, jaıaý júrginshiler aımaqtaryn, aýlalardy jáne adam kóp shoǵyrlanatyn oryndardy patrýldeıdi. Qoqys tastaý, qoǵamdyq orynda túkirý, usaq buzaqylyq jasaý, joldy belgilenbegen jerden kesip ótý sekildi ákimshilik quqyq buzýshylyqtar anyqtalǵan sátte azamattarǵa birden daýystyq eskertý jasalady.
Basty mindet – aldyn alý
Polısııa málimetinshe, jańa tásildiń túpki maqsaty – jazalaý emes, tártip buzýdyń aldyn alý.
Ákimshilik polısııa basqarmasynyń bastyǵy Serik Shýmaevtyń aıtýynsha, drondar quqyq buzýshylyqtarǵa jedel áreket etýge jáne azamattarǵa tártip erejelerin sol mezette eske salýǵa múmkindik beredi.
«Bizdiń mindetimiz – quqyq buzýshylyqtardy tirkeý ǵana emes, eń aldymen olardyń aldyn alý. Daýys zoraıtqyshpen jabdyqtalǵan drondar qoǵamdyq tártip mádenıetin qalyptastyrýǵa yqpal etetin zamanaýı profılaktıkalyq qural», dedi ol.
Ushqyshsyz apparattardy paıdalaný qoljetimdiligi shekteýli aýmaqtardy da baqylaýǵa múmkindik beredi. Qosymsha narıadtar sanyn arttyrmaı-aq, qoǵamdyq oryndardaǵy baqylaý kúsheıtiledi. Bul – resýrsty tıimdi paıdalanyp, qaýipsizdikti arttyrýdyń bir joly.
Polısııa ókilderi jobanyń basty maqsaty – qoǵamdyq oryndarda ákimshilik quqyq buzýshylyqtar sanyn azaıtý, qorshaǵan ortaǵa jáne ózgege qurmetpen qaraý mádenıetin ornyqtyrý ekenin atap ótti.
Qala aspanynda qalyqtaǵan drondar endi tek baqylaýshy emes, tártipke shaqyratyn únge aınaldy.
