Foto: Densaýlyq saqtaý mınıstrligi
Densaýlyq saqtaý mınıstrliginiń málimetinshe, 2023 jyly Qazaqstanda 236 aǵza transplantattaý otasy jasalǵan. 2024 jyly bul kórsetkish 260-qa jetse, 2025 jyly 310 operasııa júrgizilgen. Bul – sońǵy jyldardaǵy eń joǵary nátıje.
Al 2026 jyldyń I toqsanynda elimizde 77 transplantattaý jasaldy. Onyń ishinde:
– 55 operasııa tiri donorlardan;
– 22 operasııa qaıtys bolǵan donorlardan júzege asqan.
Transplantattaý qurylymynda búırek, baýyr, júrek, ókpe jáne kózdiń móldir qabyǵyn almastyrý otalary bar.
Salada balalar transplantologııasyn damytýǵa da erekshe nazar aýdarylyp otyr. 2025 jyly balalarǵa 16 aǵza transplantattaý otasy jasalǵan.
Soǵan qaramastan, transplantattaýdy qajet etetin pasıentter sany azaımaı tur. Qazirgi ýaqytta kútý tiziminde 4 600-den astam adam, onyń ishinde 119 bala bar.
Eń joǵary suranys búırek transplantattaýyna tıesili. Qazir búırek almastyrýdy 4 102 pasıent kútip otyr. Sonymen qatar:
– baýyr transplantattaýyn – 267 adam;
– júrek transplantattaýyn – 198 adam;
– ókpe transplantattaýyn 33 pasıent kútip otyr.
2023 jylmen salystyrǵanda kútý paraǵyndaǵy pasıentter sany 3,9 myńnan 4,6 myń adamǵa deıin ósken.
Mamandardyń aıtýynsha, transplantologııany damytýdyń negizgi tetikteriniń biri – qaıtys bolǵannan keıingi donorlyq júıesin jetildirý jáne qoǵamda aǵza donorlyǵy mádenıetin qalyptastyrý.
Sońǵy jyldary áleýetti qaıtys bolǵan donorlar sany da artqan. Máselen, 2023 jyly olardyń sany 49 bolsa, 2025 jyly 186-ǵa jetken. Al 2026 jyldyń I toqsanynda taǵy 55 áleýetti donor anyqtalǵan.
Sonymen qatar el turǵyndarynyń qaıtys bolǵannan keıingi donorlyqqa qatysty ustanymy eGov portaly arqyly jıi tirkele bastaǵan. Eger 2023 jyly júıede 38,7 myń erik bildirý tirkelse, 2026 jyldyń sáýirindegi jaǵdaı boıynsha bul kórsetkish 156 myńnan asqan.
Alaıda qaıtys bolǵannan keıingi donorlyqqa kelisim bergender sany ázirge tómen deńgeıde qalyp otyr. Qazirge deıin 15,1 myń azamat kelisimin tirkese, 140,8 myń adam donorlyqtan bas tartqan.
Elimizde alǵash ret 15 jastaǵy balaǵa júrek transplantasııasy jasaldy
