...jańalyǵyn jetkizedi
Shákárim murasy nasıhattaldy
Jýyrda S.Báıishev atyndaǵy Aqtóbe oblystyq ámbebap ǵylymı kitaphanasy ǵulama oıshyl, aqyn Sh.Qudaıberdiulynyń 160 jyldyǵyna oraı «Shákárim murasy – halyqtyń asyl qazynasy» atty oqyrman konferensııasyn uıymdastyrdy.
Shara barysynda avtomattandyrý bóliminiń qyzmetkerleri foto-shejire slaıd, beınematerıal usyndy. «Dana sózdiń darasy» atty kitap kórmesine bıblıografııalyq sholý jasaǵan kitaphana qyzmetkeri oqyrmandardy Shákárim Qudaıberdiulynyń osy kitaphana qorynda jınaqtalǵan tól týyndylary men ol týraly jazylǵan zertteýler men estelikter, arnaýlar jazylǵan kitaptarmen tanystyrdy. Sholýda aqynnyń ómirbaıany men shyǵarmashylyǵy, artynda qalǵan mol murasy týraly aıtyldy.
Basqosýda Aqtóbe gýmanıtarlyq kolledjiniń stýdetteri Shákárim Qudaıberdiulynyń «Jastarǵa», «Adamshylyq», «Bostandyq tańy atty» óleńderin oqyp, «Bul án burynǵy ánnen ózgerek» atty ásem ánin shyrqap, kórermenderdiń ystyq yqylasyna bólendi.
Nurlygúl BERDIǴALIEVA,
S.Báıishev atyndaǵy Aqtóbe oblystyq ámbebap ǵylymı kitaphanasynyń qyzmetkeri
...pikirin bildiredi
Jańǵyrýǵa barynsha úles qosaıyq
Bizdiń elimizdiń ónerkásibi, ǵylym, bilimi damyp keledi. Osyǵan táýbe deýimiz kerek. Ár adam óziniń Otan aldyndaǵy abyroıly boryshyn adal atqarýǵa mindetti. Qarııalar óz urpaǵymyzdy durys tárbıelep, el birligin, Otan tynyshtyǵyn saqtaýǵa, til, din, ata dástúrimizdi jańǵyrtýǵa barynsha úles qosaıyq! Meniń oıymsha, burynǵy ótken-ketken keleńsiz jaǵdaılardy dáripteý ár jerde beleń alyp bara jatqan sııaqty. Qazirgi zaıyrly, azamattyq qoǵamda munyń zııany shash etekten. Qazirgi zaman – bilim, ǵylymnyń, til, din, dástúrimizdiń jańǵyryp, dúnıe júzindegi órkendegen elderdiń qataryna qosylatyn, zamannyń aǵymyna ilesetin kezeń. Bizdiń elde ómirdiń barlyq salasy zańdastyrylyp, jańasha qarqynmen damyp keledi. Bul táýelsizdigimizdiń, egemendigimizdiń arqasy.
Endi eldi órkendetýge baǵyttalǵan aýqymdy jobalar iske assa, elimiz munan da órkendep, dúnıege tanylyp, ozyq elderdiń qataryna qosylamyz. Elimiz aman, jurtymyz tynysh bolyp, el birligi, tynyshtyǵy arta bersin!
Meshel DÁKIS,
eńbek ardageri
Aqmola oblysy
...dabyl qaǵady
Sýdyń da suraýy bar
Kópshilikke belgili jaıt, sý – búkil tirshiliktiń kózi. Sondyqtan da dana halqymyz ony ómir nárine balaǵan. «Sýdyń da suraýy bar» dep aıtatyn da atam qazaq. Demek, ol sý sarqylmasyn, toqtamasyn, azaımasyn degen nıetpen aıtylsa kerek. Al biz kúndelikti ómirde osyny uǵa alyp júrmiz be? Bul jerde bizdiń aıtpaǵymyz – sýdy ysyrap etpeý, shashyp-tókpeý. As úıde, jýynatyn bólmede «sý úıge kelip tur ǵoı» degen túsinikpen mólsherden tys shashyp-tógý kezdesetinin joqqa shyǵara alasyz ba?
Bıylǵy qys bizdiń aýdan úshin jyldaǵydan sýyq ári aıazdy kúnderi kóp boldy. Biraz úılerdiń sý qubyrlary eki-úsh kún qatyp qalyp, turǵyndar aýyz sýdan kóp qıynshylyq kórdi. Ánsheıinde aýyz sýǵa onsha mán bere bermeıtin turǵyndar osy joly onyń quny men qasıetin tereńirek uǵynǵandaı boldy.
Jer sharynyń tórtten bir bóligin qurlyq alyp jatsa, tórtten úsh bóligin sý alyp jatyr eken. Alaıda joǵaryda aıtyp ótkenimizdeı, «Sýdyń da suraýy bar» ekendigin umytpaı, memleketimizdiń basty tiregi ekonomıka bolsa, onyń bir jaǵyn sý qory túzetinin umytpaı, este saqtap, tirshilik tiregi, ómir nári – sýdyń qasıetin baǵalaı bileıik demekpin.
Káribaı ÁMZEULY
Ońtústik Qazaqstan oblysy,
Sozaq aýdany
...alǵys aıtady
Japondar jaqsylyq jasady
Mektep – bilim aıdynyndaǵy úlken keme. Osy bilim ordalarynyń zamanǵa saı jabdyqtalýy – búgingi kún turǵysynan úlken mánge ıe. Elimizde zamanǵa saı kúrdeli jóndeýlerden ótip jatqan mektepter men bilim oshaqtary barshylyq. Sonymen qatar halyqaralyq yntymaqtastyǵymyz ben birligimizdiń arqasynda Japon eliniń de sharapatyn kórip otyrǵan jaıymyz bar. Japon úkimeti «Shóp tamyry» baǵdarlamasy aıasynda elimizge túrli qajettilikterdi qamtamasyz etetin qaıyrymdylyq isterin júzege asyrýda. Qolǵa alynǵan baǵdarlamanyń maqsaty – úkimettik emes uıymdardyń, aýrýhana, mektep, taǵy basqa áleýmettik nysandardy kúrdeli jóndeýden ótkizýge jáne salýǵa jasalǵan jobalaryna qaıtarymsyz qarjylaı kómek kórsetý. Osy baǵdarlama aıasynda Mańǵystaý oblysynyń Túpqaraǵan aýdanynyń Shahty orta mektebi, «Jańaózen qyzmet kórsetý jáne jańa tehnologııalar kolledji jáne Munaıly aýdanynyń №1 jalpy bilim berý orta mektebi grantqa ıe bolyp, mekemeniń jylý júıesin jóndeýge arnalǵan qaıtarymsyz qarjy kómegine qol jetkizip otyr.
Osyndaı ıgi istiń sebepkeri bolǵan Japon úkimetine alǵys bildire otyryp, jaqsylyqtyń sharapatyn kórýine tilektestigimizdi jetkizemiz. Sondaı-aq osy baǵdarlamaǵa qatysýǵa jol kórsetip, jaqsy isterdiń jarshysy bola bilgen oblystyq bilim basqarmasyna, aýdandyq bilim bólimine de alǵysymyzdy bildiremiz.
Sánııa SÁRKENOVA,
№1 jalpy bilim beretin orta mekteptiń dırektory
Mańǵystaý oblysy
...áserimen bólisedi
Taraz tarıhymen tanysty
Atyraý oblystyq ardagerler keńesiniń uıymdastyrýymen quramynda 20 ardager bar top «Jibek joly» baǵytyndaǵy qasıetti Taraz qalasynda saıahatta bolyp qaıtty. Oblystyq keńestiń tóraǵasy top múshelerimen kezdesip, rýhanı jańǵyrý úderisine oraı uıymdastyrylyp otyrǵan bul saparǵa qatysýshylarǵa oń sapar tiledi.
Ardagerler kóne Taraz jerindegi Qarahan, Daýytbek, Tekturmas, Aısha bıbi kesenelerinde, Aqyrtas kesheninde bolyp, tylsym tarıh qoınaýyna úńildi. Taraz qalasyndaǵy Qazaq handyǵynyń 550 jyldyǵyna arnalyp salynǵan nysandarmen, oblystyq tarıhı-ólketaný mýzeıiniń, Tórtkól kerýen saraıynyń, Jambyl atyndaǵy rýhanııat ortalyǵynyń jádigerlerimen keńinen tanysty.
Top múshelerine «Qazaq handyǵyna – 550 jyl» monýmenti, Kereı men Jánibek handardyń eskertkishteri erekshe áser qaldyrdy. Ardagerler osyndaı taǵylymdy da áserli sapar úshin oblystyq ardagerler keńesine rızashylyq sezimderin bildirdi.
S.MUHAMBETOV,
Atyraý oblystyq ardagerler keńesi tóraǵasynyń orynbasary
