Bıyl ǵana jaraqatynan aıyqqan Eldos Smetov boz kilemge oralǵan bette óziniń myqtylyǵyn qaıta dáleldedi. Naýryzda Ekaterınbýrgtegi Grand Slam jáne kúni keshe ǵana Hohhotta ótken Gran-prı týrnırlerine qatysyp, bul básekelerdiń ekeýinde de qarsylas shaq keltirmedi. Sonyń nátıjesinde álemdik reıtıngtegi jaǵdaıyn ol ájeptáýir jaqsartty. Desek te búgingi tańda Qazaqstannyń dzıýdoshylary arasynda eń úzdik kórsetkish Ǵusman Qyrǵyzbaevqa tıesili. Sońǵy kezderi halyqaralyq dodalarda aýyz toltyryp aıtarlyqtaı tabysqa qol jetkizip júrgen almatylyq óren 60 kılo salmaqtaǵy balýandar arasynda qazirgi kezde 7-orynǵa ornyqty.
66 kılo salmaqta kúsh synasyp júrgen jerlesterimizdiń arasynda Eldos Jumahanovtyń shabysy shıraq. Byltyrǵy jyldyń sońynda Sankt-Peterbýrgte kúmis jáne bıyl Hohhotta qola alǵan ol 10-oryndy ıelenýde. Osy salmaqtaǵy jas óren Erlan Serikjanov 41-satyǵa jaıǵasty. 73 kılo salmaq dárejesinde baq synaıtyn Jansaı Smaǵulov 9-oryndy enshilese, 90 kılo salmaqtaǵy Islam Bozbaev 12-satyǵa taban tirep tur. 100 kılo salmaq dárejesinde Vıktor Demıanenko 38-oryndy ıemdense, Maksım Rakov 48-satyǵa turaqtady. Mine, qazirgi kezde «TOP-50» dzıýdoshylar qataryna enip otyrǵan otandastarymyz osylar. О́kinishke qaraı, 73 jáne +100 kılo salmaqtaǵy órenderimizdiń aıaqalysy tym nashar.
Qyzdar arasynda Qazaqstannyń balýandary ishinde eń úzdik kórsetkish Otgonseseg Galbadrahqa tıesili. 48 kılo salmaq dárejesinde ol 7-oryndy oljalaýda. Biraq Olımpııa oıyndarynyń qola júldegeri byltyrǵy jyldyń jeltoqsan aıynan beri birde-bir jarysta boı kórsetpegenin aıta ketýge tıispiz. Esesine sonyń aldynda ózi qatysqan týrnırlerdiń barlyǵynan Otgonseseg oljaly oralǵan bolatyn.
Sonymen qatar «TOP-50» balýannyń sanatyna Sevara Nyshanbaeva (57 kılo, 24-oryn), Gúljan Isanova (+78 kılo, 28-oryn), Álbına Amenkeldıeva (78 kılo, 31-oryn), Zarına Raıfova (78 kılo, 34-oryn), Marııam Ordabaeva (63 kılo, 42-oryn) jáne Zere Bektasqyzy (70 kılo, 47-oryn) syndy jerlesterimiz enip otyr.
Ǵalym SÚLEIMEN,
«Egemen Qazaqstan»
ALMATY
