Jyl saıyn qalamgerlerdi jańa shyǵarma jazýǵa yntalandyryp, demeý bolyp kele jatqan ıgi shara óz jemisin bere bastady. Týǵan jer taqyrybyndaǵy jańa óleńder men poemalar dúnıege kelip, oqyrmandarǵa estetıkalyq lázzat syılap keledi.
«Baıqaýǵa qatysýshylar qatary jyldan-jylǵa artyp keledi. Shynynda da, aýyl taqyryby bul mańyzdylyǵy men jańalyǵy kóp taýsylmaıtyn taqyryp qoı. Baıqaýǵa qatysýshylar óz shyǵarmalarynda aýyldyń kelbetin, bet-beınesin, ondaǵy mádenıet pen ekonomıkalyq damýdy sıpattap jatady. Sonymen qatar, bul jınaqqa enip otyrǵan shyǵarmalar úlken qyzyǵýshylyq tanytýda. Qazirgi ýaqytta «Aýyl» partııasy óziniń fılıaldary arqyly oblystyq, aýdandyq, aýyldyq kitaphanalarǵa shyǵarmalar jınaǵyn taratyp jatyrmyz. Jalpy alǵanda, eki jyldan beri biz osy shyǵarmalardy toptastyryp, ár 3 janr boıynsha byltyr úsh tom, bıyl úsh tom jınaq shyǵardyq. Bul kitaptar ár jyl saıyn myń dana tırajben shyǵarylady», dedi «Aýyl» partııasynyń tóraǵasy, Parlament Senatynyń depýtaty Álı Bektaev.
Partııa tóraǵasy dramatýrgter shyǵarmashylyǵyna basymdyq berilgenin aıtty. «Aýyl» partııasy aýyldyń dástúrli ómir saltyn dáriptep, ondaǵy áleýmettik, rýhanı máselelerdi kórkem shyǵarmalar arqyly kópshilik nazaryna usyný maqsatynda 2016 jyldan beri «Aýylym – altyn tuǵyrym» ádebı-onlaın baıqaýyn uıymdastyryp keledi. Ádebıet portalymen birlese ótkiziletin nátıjesi boıynsha «Altyn tuǵyr» úsh tomdyq jınaǵyn basyp shyǵarý ıgi dástúrge aınaldy.
Jınaqtyń tusaýkeserine Parlament depýtattary, zııaly qaýym ókilderi, aqyn-jazýshylar men dramatýrgter, baıqaýdyń 2017 jylǵy jeńimpazdary da qatysty.
«Búgingi sharanyń máni óte zor. Elimizdegi halyqtyń teń jartysy aýylda turady. Ol bizdi azyq-túlikpen, et, sút jáne maımen qamtamasyz etip otyrǵan eńbekqor azamattar. Osy turǵydan, aýyldyń «altyn tuǵyr» dep atalýy jaı ǵana sóz tirkesi emes ekenin kórsetedi. Partııanyń mundaı baıqaýdy ótkizýi bolashaq dramatýrgter men prozaıkterdi shyńdaýǵa úlken úles bolyp tabylady», dedi qoǵam jáne memleket qaıratkeri Ádil Ahmetov.
«Altyn tuǵyr» jınaǵyna engen shyǵarmalarmen onlaın tanysý múmkindigi de qarastyrylǵan. Shyǵarmalardyń barlyǵy Ádebıet portalyna ornalastyrylǵan. Bıyl da jalǵasyn tapqan baıqaýdyń qorytyndysy Táýelsizdik kúni qarsańynda jarııalanady. Qalamgerlerdiń aýyl taqyrybyndaǵy tyń týyndylary qazirgi ádebıetimizdiń qoryna qomaqty úles bolyp qosylary sózsiz.
Baǵashar TURSYNBAIULY,
«Egemen Qazaqstan»
