«Qazaqstanda 18 jasqa deıingi bala sany 5,5 mln.nan astam, onyń ishinde mektepke deıingi jastaǵy – 2 mln.nan astam, mektep oqýshylary - 3 mln.nan astam, 18 jasqa deıingi oqýshy jáne stýdent jastar – 300 myńnan astam. Halyqaralyq balalardyń quqyqtaryn qorǵaý kúni qarsańynda Mınıstrlik tarapynan «Nurly Bolashaq» aksııasy jarııalandy. 1 maýsym merekesi aıasynda elimizdiń barlyq negizgi alańdarynda festıvalder, teatrlandyrylǵan qoıylymdar, konserttik baǵdarlamalar, sporttyq jarystar, asfaltqa sýretter salý konkýrsy, jalpy 600-den astam is-sharalar ótedi dep josparlanǵan», dedi Balalardyń quqyqtaryn qorǵaý komıtetiniń tóraǵasy.
Sonymen qatar ol bul kúni respýblıkanyń barlyq óńirlerinde balalar men jasóspirimderdiń mýzykalyq orkestrler men ansamblder sherýi ótetinin, Astana qalasynda «Juldyzaı» erekshe qajettilikteri bar balalar shyǵarmashylyǵynyń respýblıkalyq festıvaliniń gala-konserti bolatynyn, mereke kúnderi «Balalar bastaýy» balalardyń áleýmettik jobalary, «Qazaqstan – meıirimdilik mekeni» aksııa konkýrstarynyń qorytyndylary shyǵarylatyn jetkizdi.
«1 maýsymnan bastap 1,5 mln. bala demalatyn 12,5 myńnan astam mektep janyndaǵy lager jumysyn bastaıdy. Jalpy balalardyń jazǵy demalysyn uıymdastyrý úshin aǵymdaǵy jylǵy jergilikti bıýdjet qarajat esebinen 4 mlrd.-qa jýyq teńge bólindi. Balalarǵa qatysty bolǵan oqıǵalardyń negizgi sebepteri: ata-analar baqylaýlarynyń jetkiliksizdigi, jáne qaýipsizdik sharalaryn saqtamaýy bolyp tabylady. Balalardyń qaýipsizdigin qamtamasyz etý máselesi barlyq jaýapty memlekettik organdardyń baqylaýynda. Mınıstrlik tarapynan 2017-2019 jyldarǵa arnalǵan balalardy júzýge úıretýdi uıymdastyrý jónindegi vedomstvoaralyq is-sharalar jospar ázirlendi. Jospar jalpy bilim beretin mektepterdiń óńirdegi qoldanystaǵy basseınderge bekitý kestesin boıynsha is-sharalardy, pedagogtar men ata-analar arasynda túsindirý jumystary jáne balalardy júzýge úıretýmen qamtylǵan balalar sany týraly málimetter monıtorıngi jumystaryn qamtıdy. Osy múmkindikti paıdalanyp, balalar men eresekterge arnalǵan 111 ortalyǵynyń senim telefony táýlik boıy jumys jasaıtyndyǵyn aıtqym keledi», dep atap ótti ol.
Qazaqstan Respýblıkasy Ishki ister mınıstrligi Tótenshe jaǵdaılar komıtetiniń Aqparattandyrý jáne halyqty oqytý bóliminiń bastyǵy Rýslan Imanqulov búgingi kúni balalardyń qaýipsizdik máselesi ózekti bolyp otyrǵanyn jetkizdi.
«TJ komıteti bilim berý, densaýlyq saqtaý mınıstrlikterimen jáne jergilikti atqarýshy organdarmen birigip sýdaǵy jáne órt kezindegi balalardyń qaýipsizdigi boıynsha is-sharalar keshenin ótkizýde. Sonymen qatar aǵymdaǵy jyldyń basynan beri 40 profılaktıkalyq brıfıng ótkizildi. Halyq arasynda 73 myńnan astam úgitteý materıaldary taratyldy. Qoǵamdyq tártipti saqtaýdy jáne qalalyq jaǵajaılarda sýda zardap shekken adamdarǵa alǵashqy medısınalyq kómek kórsetýdi qamtamasyz etý úshin 44 qoǵamdyq qaýipsizdik beketi jáne 15 medısınalyq pýnkt quryldy, 328 kórneki stend ornatyldy. 300 qutqarý beketi qosymsha uıymdastyrylatyn bolady. Sý aıdyndaryna jaqyn ornalasqan balalar lagerlerinde qutqarýshylar jaǵajaılardyń túbin tazartyp, arnaıy aqparattyq stendter ornatylýda. О́rt qaýipsizdigin saqtaý ózekti máselelerdiń biri bolyp tabylady. Sandyq derekterdi keltire keteıik: jyl basynan beri bizdiń bólimsheler órt qaýipsizdigi boıynsha 289 ınteraktıvti sabaq ótkizdi, olarǵa 176 969 oqýshy qatysty. Elimizdiń 21 myńnan astam oqýshysy «Jas qutqarýshy» atty úıirmege qatysady. Biz BUU «IýNISEF» halyqaralyq balalar qory, Qyzyl Jarty Aı sııaqty halyqaralyq qorlarmen belsendi jumys júrgizemiz», dedi ol.
Raýan QAIDAR,
«Egemen Qazaqstan»
