Qordan zeınetaqy tólemderiniń jetkilikti mólsherde júzege asyrylýy – zeınetaqy jarnalarynyń turaqty aýdarylyp turýyna tikeleı baılanysty. Biryńǵaı jınaqtaýshy zeınetaqy qory barlyq eńbekke qabiletti turǵyndardyń jınaqtaýshy zeınetaqy júıesine qatysýy mańyzdy ekendigin túsine otyryp, ózin-ózi jumyspen qamtýshylardy zeınetaqy júıesine tartý boıynsha aqparat berý-túsindirý jumystaryn turaqty júrgizip keledi. Osylaısha zeınetaqy júıesiniń enjar qatysýshylaryn anyqtaý úshin BJZQ salymshylarynyń bazasy taldandy jáne zeınetaqy jarnalary túspeıtin shottardy óńdeý naýqany bastaldy. Sonyń arqasynda salymshylar derekqorynda 2015-2017 jyldar aralyǵynda ashylǵan, biraq sodan beri birde-bir ret jarna túspegen, sondaı-aq, zeınetaqy jınaqtary bar, biraq 2017 jyly jarna túspegen shottar anyqtaldy.
Qordyń óńirlik jelisiniń qyzmetkerleri osy shottardyń ıelerine habarlasyp, zeınetaqy jarnalarynyń ne úshin túspeı jatqandyǵyn anyqtaýmen ári qoldanystaǵy zeınetaqy zańnamasy boıynsha aqparattandyrý jumystaryn júrgizýde.
2018 jyldyń alǵashqy jartysynda 325 myńdaı salymshyny qamtý josparlanǵan bolatyn. Ázirge 2018 jyldyń aqpan-sáýir aılary aralyǵynda 117 264 salymshymen baılanys ornatyldy. Telefon arqyly habarlasý nátıjesinde sol salymshylardyń 19 paıyzy (al bul – 22396 adam) qosymsha aqyl-keńes alý úshin Qorǵa habarlasty. Osylaısha 25 myńnan astam jeke zeınetaqy shotyna jalpy somasy 150 mln teńgege mindetti zeınetaqy jarnalary aýdaryldy. Bul – baılanys ornatylǵan salymshylardyń 21 paıyzyna teń.
Saýalnama júrgizý nátıjesinde baılanys ornatylǵan salymshylardyń jartysyna jýyǵynyń jumyssyz ekendigi, al qalǵandary – ózin-ózi jumyspen qamtýshylar, jeke kásipkerler, beıresmı jumyspen qamtylǵan azamattar ekendigi anyqtaldy. Qor baılanys ornatqan soń jarna aýdarǵan salymshylardyń shamamen 41 paıyzy – 18 jastan 25 jasqa deıingi jastar, shamamen 34 paıyzy – 25 jastan 40 jasqa deıingiler, 14 paıyzdan astamy – 40 jastan 50 jasqa deıingiler jáne 11 paıyzdan astamy - 50 jastan asqan azamattar.
Baılanys ornatylǵan salymshylarǵa jınaqtaýshy zeınetaqy júıesi týraly aqyl-keńes jáne ónimdi jumyspen qamtý jáne jappaı kásipkerlik sekildi áleýmettik baǵdarlamalar boıynsha tolyqqandy málimet berildi.
Zeınetaqy Qory ekonomıkalyq turǵydan belsendi azamattardyń barlyǵyn jınaqtaýshy zeınetaqy júıesimen qamtý maqsatynda bul baǵyttaǵy jumystar odan ári jalǵastyrady.
Aınash ESALI,
«Egemen Qazaqstan»
ALMATY
