О́zara senim ózegi

Parlament Senaty Tóraǵasynyń orynbasary Aleksandr Sýdın bastaǵan palata depýtattary GFR IIM Parlamenttik Stats-hatshy, Federaldyq úkimettiń kóshi-qon jáne az ulttar jónindegi ýákili, Qazaqstanda turatyn nemister máselesi jónindegi Qazaq­stan-Germanııa Úkimetaralyq komıssııasynyń teń tóraǵasy Krıstof Bergnermen kezdesti. Kezdesý barysynda Qazaqstan men Germanııanyń ekijaqty qaty­nas­taryn odan ári damytý máse­le­leri talqylandy. «Germanııa Qazaqstannyń Eýropadaǵy ma­ńyz­dy áriptesi bolyp taby­la­dy», – dedi A.Sýdın jáne ol eki memleket arasyndaǵy saıası syndarly únqatysýdy atap ótti. «Qazaqstanda Germanııa Federal­dyq kansleri A.Merkeldiń ót­ken jylǵy shildedegi resmı sa­pa­rynyń nátıjeleri joǵary ba­ǵa­landy», – dedi tóraǵanyń oryn­basary jáne ol Qazaqstanda nemis dıasporasynyń bolǵany men Ger­manııada turatyn Qazaqstan­nyń burynǵy azamattary eki­jaq­ty qatynastardy nyǵaıtýda basty arqaý bolatynyn atap ótti. Sondaı-aq ol memleketaralyq qatynastarda parlamentaralyq yntymaqtastyq negizgi quramdas­tyń biri bolatynyn aıta kelip, Senatta Germanııa Federaldy parlamentimen yntymaqtastyq toby, al GFR Býndestagynda «Germanııa-Ortalyq Azııa» parlamenttik toby jumys isteıtinin atap ótti. Kezdesý barysynda A.Sýdın Parlament Qazaqstan Respýb­lı­kasy Memlekettik táýelsizdiginiń 20 jyldyǵy deklarasııasyn qa­byldaıtyny týraly aıtty. Onda osy kezeńdegi negizgi nátıjeler kórinis tabatyn bolady, dedi ol. Ol sondaı-aq aldaǵy jylǵy qań­tar aıynda Parlament Májilisi men jergilikti ókildi organdar – más­lıhattardyń saılaýy ótetinin jetkizdi. Biz saılaý naýqanyna basa nazar aýdaramyz», – dedi A.Sýdın jáne Parlament saı­laýy ha­lyqaralyq erejeler men stan­dart­­tarǵa sáıkes ótetinin málimdedi. K.Bergnerdiń aıtýynsha, Qa­zaqstan men Germanııanyń eki­jaq­ty qatynastary aýqymdy jáne ózara senim turǵysynda sı­pat­talady. «Qazaqstanda barlyq jaǵdaı jasalǵan, nemisterdiń baılanystyrýshy róli osylaı aıqyndalady», – dedi K.Bergner. Onyń pikirinshe, «yntymaq­tas­tyq­tyń bul baǵyty Qazaqstan men Germanııanyń ekijaqty qaty­nastarynyń irgetasyndaǵy ma­ńyzdy kirpish bolyp tabylady. K.Bergner qazaqstandyqtardy Táýelsizdiktiń 20 jyldyǵymen quttyqtady jáne aldaǵy Parlament Májilisi saılaýynyń tabysty ótýine tilektestigin bildirdi, dep habarlady Parlament Senatynyń baspasóz qyzmeti.