Otandyq arnalarǵa ortaq shańyraq

Elbasynyń qatysýymen senbi kúni Elordada paıdalanýǵa berildi Elimiz Táýelsizdiginiń 20 jyldyǵy qar­sa­ńyn­da Astana qalasynda kópshiliktiń qýany­shy­na aınalǵan kóptegen nysandar ashylýda. Sondaı júrekjardy jańalyqtan jýrnalıster qaýymy da qalys qalǵan joq. Elbasy Nur­sultan Nazarbaev Astanadaǵy «Qazaqstan temir joly» ulttyq kompanııanyń basty ofısi janynan oryn tepken «Qazmedıa orta­ly­ǵy» qurylys nysanynyń aıaqtalýyna baılanysty onyń tusaýyn kesti. «Qazmedıa ortalyǵynyń» qu­ry­lysy 2010 jyldyń 8 jel­toq­sanynda bastalǵan bolatyn. Jańa teleortalyqtyń tapsyrys berýshisi – «Qazaqstan temir joly» Ulttyq kompanııasy» AQ, al bas merdigeri «Sembol Ýlýs­la­ra­rysy» kompanııasy. Jalpy aýmaǵy 75 500 sharshy metrdi quraıtyn «Qazmedıa ortalyq» ǵımaratynyń barlyq tehnolo­gııa­lyq alańdary «Sony», «Om­neon», «Dalet», «Pharos», «Ever­ts», «Apple», «Avid» syndy álem­degi ozyq óndirýshilerdiń sońǵy ónim­derimen jabdyqtalǵan. N.Na­zar­baev «Qazmedıa ortalyǵy» jańa teleradıokeshenin aralap kórdi. Memleket basshysyna qa­zirgi zaman talabyna jaýap beretin jańa medıaortalyqtyń múm­kindikteri men keleshegi týraly Baılanys jáne aqparat mınıstri Asqar Jumaǵalıev baıandap berdi. El­ba­syǵa sondaı-aq tele­se­rıal­dardy túsirýge arnalǵan  ap­parattyq stýdııalyq keshen, ja­ńalyqtar men telebaǵdarlamalar stýdııa­lary, sımfonııalyq orkes­trl­erdiń konsertterin jazýǵa múmkindik beretin stýdııa jáne sınhrondyq aýdarma jasaý júıe­simen qamtamasyz etilgen kınokonsert kesheni kórsetildi. Buryn munyń barlyǵy da eki-úsh stýdııada oryndalyp, taqy­ry­byna qaraı únemi  ózgerip, áý­re-sarsańǵa salatyn. Buryndary telestýdııalardy túsirý úshin jaryq, dekorasııalyq qural-jab­dyqtar, jyljymaly stansalar syrttaǵy túsirilim alańdaryna ta­sylyp jatatyn bolsa, endi munyń barlyǵy da keshenniń ózinde júzege asyrylady. Sony­men qatar, merekelik sharalardyń ózin de stýdııalarda atqaryp, onyń sapaly da kórkem etip kó­rermenge jol tartýyna qol jet­kizilip otyr. Medıa-ortalyqtyń 22-qabatynda eki panoramalyq stýdııa (Sky Studio) ornalasqan. Bul stýdııalarda tikeleı efır júrgizý nemese baǵdarlamalar tú­sirý kezinde elordanyń tamasha kórinisin panorama retinde paı­dalanýǵa bolady. Astana kórkin joǵarydan tamashalaýǵa múmkindik beretin osy bir panoramalyq stýdııaǵa jı­nalǵan buqaralyq aqparat qu­ral­dary ókilderin quttyqtaýǵa kelgen Elbasy bylaı dedi: «Táýel­­sizdigimizdiń 20 jyly ishin­de buqaralyq aqparat qural­dary­nyń egemendigimizdi baıandy etýde sińirgen eńbegi ushan-teńiz dep sanaımyn. Osyndaı ǵımarat salý kópten oıda júrgen. Minekı, mu­nyń da sáti tústi. Kóp joba­lardyń ishinen osy tańdap alyn­dy». Osylaı dep sózin sabaq­ta­ǵan Nursultan Ábishuly munda ornatylǵan álemdegi eń ozyq degen qural-jabdyqtardy satyp alýǵa 33 mıllıard teńge jum­salǵanyn tilge tıek etti. Almatyda qalǵan telear­na­lar­dy kóshirip ákelý máselesi de nazardan tys qal­maıdy. Jańa keshenge «Habar», «Caspionet», «Qa­zaqstan», «Balapan», «Mır» mem­leketaralyq te­leradıo­kom­pa­nııa­sy», «Pervyı kanal Evrazııa» jáne «Mádenıet» telearnalary, sondaı-aq «Qazaq radıosy», «Shal­qar» jáne «Astana» ra­dıo­lary ornalasady. Bu­dan basqa teleortalyqta «Bilim» jáne «Habar-24» taqyryptyq ar­na­lary­nyń redaksııalary jumys isteıdi dep kútilýde. Nursultan Nazarbaev sondaı-aq buqaralyq aqparat quraldary basshylaryna qaratyp, qyzyqty baǵdarlamalardy shetten ala bermeı, Qazaqstannyń ózinde ja­saýǵa qol jetkizý tıimdi ekenin kóldeneń tartty. «Qazaqstan» respýblıkalyq teleradıo kor­po­ra­sııasy»  AQ basqarma tóraıy­my Nurjan Muhamedjanova men «Habar» agenttigi» AQ basqarma tóraǵasy Aıdos Úkibaev bastaǵan basshylar toby Elbasyǵa rıza­shylyqtaryn jetkize otyryp, kórermender kóńilinen shyǵatyn dúnıelerdi ázirleýge daıyn ekendikterin bildirdi. Oraıy kelgende Memleket basshysy Senat tarapynan qa­byldanǵan «Halyq Qaharmany» ataǵyn berý týraly Zańǵa óziniń qol qoımaıtyndyǵyn málimdedi.  Memleket basshysy ózine esh­qandaı marapattyń qajet emestigin aıta kelip, eger marapatty qabyldasam, onda bolashaq prezıdentterge qandaı úlgi qal­dy­ramyn deı kelip, ózi úshin Qa­zaqstan halqynyń 95 paıyz daýys berip, prezıdenttikke qaı­ta saılaýynyń ózi úlken marapat ekenin atap kórsetti. Al Tuńǵysh Prezıdent saılanǵan 1 jeltoq­san kúnin «Prezıdent kúni» dep ataýǵa qarsy emestigin bildirdi. «Ondaı dataly kúnder álem tájirıbesinde bar», dedi atalǵan máselege qatysty Elbasy. Buqaralyq aqparat quraldary eldiń básekege qabilettigin art­ty­rýǵa serpin qosatyn sala bolyp tabylady. Eldiń qol jetkizgen tabystaryn kórsetip, adamdardy otansúıgishtikke tárbıeleý, máde­nıetti damytýǵa úles qosý, ós­kin­der tálim alatyn baǵdarlamalar jasaý osy salanyń basty mindeti bolǵandyqtan, memleket osyndaı qadamǵa baryp otyrǵanyn bildirgen el Prezıdenti qazirgi zaman qondyrǵylarymen jaraqtalǵan stýdııalarda qalaǵan  teleserıal­dar­dy túsirýge bolatynyn da qaperge saldy. Máselen, «Gollıvýdta» kóptegen fılmder stý­dııa­larda túsiriledi. Qazaqstandy jáne onyń turǵyndarynyń qol jetkizgen jetistikterinen álem habardar bolýy tıis. «Biz soǵan laıyqpyz. Jıyrma jyl ishinde júz jylǵa tatyrlyq ister at­qaryldy. Biz álemde tanymal bola bastadyq, bizdi alda úlken josparlar kútip tur», dedi Memleket basshysy. Sóz sońynda «Qazmedıa orta­ly­ǵynyń» barlyq tehnolo­gııa­lyq alańy álemdik jetekshi  ón­dirýshilerdiń jańa ónimderimen jabdyqtalǵandyǵyn aıta ketken jón. Sondaı-aq keshenniń óndi­ristik bazasyn biryńǵaı zamanaýı tehnologııaǵa jáne aıqyndyǵy joǵary (HD) pishinge saı keltirý josparlanǵan. Prezıdent sondaı-aq Beıbitshilik jáne kelisim saraıynda ótken, elordanyń Astana qala­syna kóshirilý kúnine arnalǵan konsertti tamashalady. Astana egemen Qazaqstannyń basty sım­volyna, onyń maqtanyshy men zor jetistigine aınaldy. Konserttik baǵdar­lamaǵa Qazaqstan astanalarynyń júrip ótken joly baıandaldy. Sonymen birge, baǵdarlamaǵa patrıotızmdi, elor­daǵa, Qazaqstanǵa degen súıis­penshilikti jyrlaıtyn shyǵarma­lar engizilgen. Konsertke qazaq­standyq estrada juldyzdary qatysty. Asqar TURAPBAIULY.